Minsk taki ŭchilajecca ad pryznańnia «DNR». Maskva: «Takaja pazicyja skončycca kiepska»
Cikavyja histaryčnyja padziei. Noč i paŭdnia Łukašenka dumaŭ, što rabić z pryznańniem «D(Ł)NR». Jašče i paŭnavartasnaha pryznańnia Kryma rasijskim u vyhladzie pajezdki tudy nie adbyłosia, a ŭžo staić pytańnie bolš krutoha paradku nakont «D(Ł)NR», piša palityčny analityk Andrej Jelisiejeŭ.
Dziaržaŭnyja ŚMI paŭdnia stvarali ŭražańnie, što niby ničoha i nie adbyłosia. Aficyjnaje navinnaje ahienctva statusam hałoŭnaj padziei ŭ śviecie doŭhi čas nadzialała antykaranavirusnyja pratesty ŭ Novaj Ziełandyi (!).
Akramia suchich navinnych zvodak pra peŭnaje rašeńnie Pucina, niejkich razhornutych interpretacyj u aficyjnych biełaruskich ŚMI dahetul niama. U adroźnieńnie ad praŭładnych telehram-kanałaŭ, jakija apantana rady za «D(Ł)NR» i ŭžo pradrakajuć ich uvachodžańnie ŭ sajuznuju dziaržavu (!).
Sam Łukašenka, vystupajučy siońnia z nahody Dnia ŭzbrojenych sił, nijak pra «D(Ł)NR» nie zhadaŭ i tolki niapeŭna «źviarnuŭsia da ŭkrainskaha naroda i kiraŭnictva: davajcie zrobim tak, kab my, słavianie, zaŭsiody žyli ŭ miry i zhodzie. <…> Treba supakoicca, uziać hałavu ŭ ruki i pryniać pravilnaje rašeńnie ŭ intaresach narodaŭ».
MZS Biełarusi, zaŭsiody vielmi apieratyŭna reahuje na padziei kštałtu vyviešvańnia bieła-čyrvona-biełaha ściaha ŭ zamiežnych krajach, maŭčaŭ bolšuju častku dnia. I tolki ŭ rajonie 16 hadzin dnia vydaŭ nie mienš raspłyvistuju zajavu, što «my z pavahaj i razumieńniem usprymajem rašeńnie rasijskaha boku ab pryznańni niezaležnaści Danieckaj i Łuhanskaj narodnych respublik».
Miarkujučy pa siońniašniaj pieraściarozie śpikiera rasijskaj Dziarždumy Viačasłava Vałodzina, Kreml čakaje niečaha bolšaha, čym vykazanyja pavaha i razumieńnie:
«My spadziajemsia, što rašeńnie padtrymajuć i inšyja krainy. I nie buduć imknucca dla ŭsich być dobrymi <…> Takaja pazicyja skončycca drenna. U pieršuju čarhu, dla tych, chto voś tak voś sprabuje padładzicca pad hety źmienlivy śviet».
Voś heta rostani!
Łukašenka sprabuje abstrahavacca i vyjhrać čas, ale talerantnaść Kramla da takoj vymušanaj vytančanaj dypłamatyi Minska, padobna, na zychodzie.
Ciapier čytajuć
«Lublu, kali biełarusy biełarusiacca»: u sacsietkach žartujuć z nadvorja i abmiarkoŭvajuć prablemy3
Kamientary