Łukašenka padpisaŭ sakretny ŭkaz ab eksparcie kalijnych uhnajeńniaŭ
3 sakavika 2022 hoda Alaksandr Łukašenka padpisaŭ ukaz «Ab eksparcie». Ciapier dakumient apublikavany na Nacyjanalnym pravavym internet-partale i ŭstupaje ŭ siłu pa častkach. U tym liku dziejańnie adnaho z punktaŭ ukaza raspaŭsiudžvajecca na adnosiny, jakija ŭźnikli z 3 śniežnia 2021 hoda, piša reform.by.

Zrazumieć, pra što va ŭkazie idzie havorka, składana. Bo dva jaho punkty — dla słužbovaha karystańnia, i ich tekst nie publikujecca.
U trecim, apublikavanym punkcie havorka idzie pra toje,što AAT «Biełaruskaja kalijnaja kampanija» atrymlivaje prava vykarystoŭvać u naźvie (u rekvizitach dakumientaŭ abo rekłamnych materyjałach) słova «biełaruskaja» i mieć piačatku, štampy i błanki z vyjavaj Dziaržaŭnaha hierba Respubliki Biełaruś.
Ukaz taksama admianiaje 14 papiarednich ukazaŭ, jakija tak ci inakš rehulavali ekspart kalijnych uhnajeńniaŭ.
Nahadajem, 2 śniežnia 2021 hoda Minfin ZŠA ŭnios «Biełaruskuju kalijnuju kampaniju» i jaje daččynaje pradpryjemstva TAA «Ahraroskvit» u sankcyjny śpis. Licenzija Upraŭleńnia pa kantroli za zamiežnymi aktyvami (OFAC) na ažyćciaŭleńnie ździełak z hetymi kampanijami, u jakich AAT «Biełaruśkalij» maje majomasnyja intaresy, dziejničaje da 1 krasavika 2022 hoda.
Kamientary