Zachop akaŭnta, istotnyja praŭki, kryminalnaja sprava. Što viadoma pra zatrymanaha redaktara «Vikipiedyi» Paŭła Piernikava

28 sakavika prakuratura Bresckaj vobłaści raskazała ab pieradačy ŭ sud kryminalnaj spravy suprać 30-hadovaha miascovaha žychara P. Pavodle viedamstva, z 29 śniežnia pa 30 krasavika 2021 hoda P. publikavaŭ u «Vikipiedyi» i na sajcie Mižnarodnaha tavarystva pravoŭ čałavieka (ISHR) «zaviedama iłžyvyja źviestki» ab pracy biełaruskaj milicyi i orhanaŭ ułady.

Akramia taho, jon «pieradaŭ zaviedama iłžyvyja źviestki ab datyčnaści orhanaŭ ułady Biełarusi da zabojstva ŭ kastryčniku 2004 hoda žurnalistki Vieraniki Čarkasavaj, a taksama da katavańniaŭ i zabojstvaŭ ludziej». Śledstva kvalifikavała heta jak dyskredytacyju Respubliki Biełaruś (artykuł 369-1 KK).

Jak raspaviali «Miedyjazonie» krynicy ŭ supolnaści vikipiedystaŭ, havorka moža iści pra redaktara ź nikam Pr12402. Adnajmienny akaŭnt u Tvitary naležyć karystalniku pa imieni Pavieł Piernikaŭ.

Pr12402 redahuje Vikipiedyju z 25 žniŭnia 2014 hoda. Za siem hadoŭ jon unios bolš za 84 tysiačy pravak. Uvosień 2021 hoda ŭładalnik hetaha akaŭnta redahavaŭ artykuły, pryśviečanyja biełaruskim ŚMI, zatrymanamu žurnalistu «Kamsamolskaj praŭdy ŭ Biełarusi» Hienadziu Mažejku, žurnalistcy «Tutbaj» Kaciarynie Barysievič, hurtam IQ48 i «Lapis Trubiacki».

28 śniežnia 2021 hoda jaho ulikovy zapis byŭ zabłakavany, u jakaści pryčyny błakavańnia pakazany «Zachop ulikovaha zapisu/ŭzłom parola».

Za dzień da błakavańnia, 27 śniežnia, u niekalki artykułaŭ «Vikipiedyi» na «taraškievicy» z akaŭnta Pr12402 byli ŭniesienyja šeść pravak. Usie jany byli zroblenyja z 17:10 da 17:52.

Naprykład, z artykuła pra Alaksandra Łukašenku źnik abzac ab uviedzienych suprać jaho piersanalnych sankcyjach, z artykuła pra Vieraniku Capkała — zhadka pra ŭznaharodžańnie premijami imia Lva Kopieleva i Fryca Coklicha, a z artykuła pra Maryju Kaleśnikavu — raździeł ab mižnarodnaj reakcyi na jaje zatrymańnie.

Artykuł «Svaboda słova ŭ Biełarusi» straciŭ amal uvieś raździeł ab padziejach 2020-2021 hadoŭ, a ŭ artykule pad nazvaj «Režym Łukašenki» prapaŭ abzac ab rezalucyi kanhresa ZŠA z asudžeńniem falsifikacyj na vybarach, represij suprać mirnych demanstrantaŭ i pryznańniem režymu nielehitymnym. U artykule «Cpis zahinułych padčas akcyj pratestaŭ u 2020 i 2021 hadach» całkam źnik raździeł «Reakcyi».

U toj ža dzień z 13:19 pa 13:56 Pr12402 unios čatyry praŭki i ŭ ruskamoŭnuju «Vikipiedyju».

Z artykuła pra Maryju Kaleśnikavu jon vydaliŭ zhadki ab jaje statusie palitviaźnia, ab uzmacnieńni žorstkaści sankcyj suprać Biełarusi paśla abviaščeńnia prysudu apazicyjaniercy i ab pryzyvie pasła ZŠA u ABSIE da vyzvaleńnia Kaleśnikavaj.

Z artykuła pra Łukašenku prybraŭ abzac ab tym, što jon utrymlivaje ŭładu daŭžej za ŭsich dziejučych kiraŭnikoŭ dziaržaŭ u Jeŭrazii (akramia manarchaŭ i vyšejšaha kiraŭnika Irana), i słovy pra «aŭtarytarny režym kiravańnia».

Z artykuła «Cenzura ŭ Biełarusi» źnikli zhadki pra zakony 2020—2021 hadoŭ, jakija abmiažoŭvajuć svabodu słova, i šmatlikija fakty cisku na niezaležnyja ŚMI: zabarony, błakavańni, admovy ad druku i raspaŭsiudžvańnia, papiaredžańni, a taksama kryminalnyja spravy suprać rabotnikaŭ miedyja i zabojstva ŭ 2004 hodzie žurnalistki haziety «Salidarnaść» Vieraniki Čarkasavaj.

Usie praŭki, uniesienyja ad imia Pr12402, byli amal adrazu admienienyja, a aryhinalnyja viersii staronak — adnoŭlenyja. «Adrazu zrazumieła, što niešta zdaryłasia. Tamu jaho i zabłakavali», — tłumačyć biełaruski vikipiedyst Maksim Ł.

Jon nazyvaje vandalnyja praŭki «zvyčajnaj zabaŭkaj niejkich nie vielmi narmalnych, napeŭna, ludziej». Vikipiedyst kaža, što vydaleńnie cełych abzacaŭ, a tym bolš raździełaŭ, adrazu kidajecca ŭ vočy, tamu «razumnyja vandały» dadajuć u artykuł prykładna taki ž abjom tekstu, jaki vydalili. «Udzielniki mohuć navat nie źviarnuć na heta ŭvahi: «Nu, tam, kosku papraviŭ». A tam, na samaj spravie, paŭartykuła zamienienyja naboram znakaŭ», — raspaviadaje jon.

— U hetym niama nijakaha sensu. Byvajuć ludzi, jakija dumajuć, što jany škodziać. Im dastaŭlaje zadavalnieńnie naškodzić. Chto-niebudź dumaje, što nasamreč moža vydalić častku artykuła. Ale heta niemahčyma. Heta prosta biessensoŭnaje tryźnieńnie. Albo čałaviek nie razumieje, albo [dziejničaje] u nadziei, što heta nie budzie zaŭvažanaje — razvažaje Maksim pra matyvy vandałaŭ.

Pa słovach vikipiedysta, padobnaje adbyvajecca štodnia i «prybirajecca za siekundy». Ale ŭ vypadku sa śniežańskimi praŭkami artykułaŭ pra biełaruskuju palityku i presu jon upeŭnieny, što ich unosiŭ nie sam Pr12402, a złamyśnik, jaki atrymaŭ dostup da ŭlikovaha zapisu redaktara.

— Kali prosta čałaviek pryjšoŭ i za dziesiać chvilin pavydalaŭ vialikija kavałki ŭ niekalkich artykułach, to zrazumieła, što jon niešta robić drennaje. Čałaviek, u jakoha nie adna praŭka, u jakoha 80 z čymści tysiač pravak — jon takoha rabić nie budzie» — reziumuje Maksim.

***

U Fejsbuku Pavieł Piernikaŭ nazyvaje siabie členam praŭleńnia Mižnarodnaha tavarystva pravoŭ čałavieka (MTPČ), daśledčykam hulni Football Manager, redaktaram wiiu.pro i mieniedžaram minskaj hrupy Bristeil. Akramia taho, Piernikaŭ — administratar forumu, pryśviečanaha tvorčaści hurta Bee Gees.

U 2020-2021 hadach Piernikaŭ aktyŭna repościŭ materyjały pra pieraśled niezaležnych biełaruskich vydańniaŭ — haziety «Novy čas», Hrodna.life, Intex-Press, «Bresckaj haziety» i inšych.

Apošni zapis u jaho ŭ Fejsbuku datavany 17 vieraśnia 2021 hoda, heta repost tekstu ab pracy biełaruskich žurnalistaŭ va ŭmovach vymušanaj rełakacyi; apošni repost u Tvitary zrobleny 26 kastryčnika.

Na Change.org Piernikaŭ padpisvaŭ pietycyi za vyzvaleńnie ksiandza Uładzisłava Łazara i suprać zabudovy na skryžavańni praśpiekta Niezaležnaści i vulicy Makajonka ŭ Minsku; akramia taho, jon davaŭ spasyłku na zvarot da vydaŭcoŭ sieryi hulniaŭ Pokemon z prośbaj pierakłaści ich na ruskuju movu.

U 2013 hodzie, budučy studentam BrDU, Piernikaŭ udzielničaŭ u konkursie studenckich rabot, pryśviečanych 20-hodździu Suśvietnaj kanfierencyi pa pravach čałavieka, i atrymaŭ dypłom Pradstaŭnictva AAN u Biełarusi.

Ab cyrymonii ŭznaharodžańnia student raspavioŭ u natatcy dla partała «Virtualny Brest» i padpisaŭsia: «Piernikaŭ P. A., pieramožca konkursu, člen praŭleńnia RHAAPČ». Chutčej za ŭsio, aŭtar mieŭ na ŭvazie Respublikanskaje hramadskaje abjadnańnie abarony pravoŭ čałavieka, jakoje zarehistravanaje ŭ Biełarusi jak siekcyja Mižnarodnaha tavarystva pravoŭ čałavieka. U jakaści kantaktu RHAAPČ na sajcie Instytuta parłamientaryzmu i pradprymalnictva pakazanaja pošta karystalnika ź imiem pr12402.

U vieraśni nastupnaha hoda Piernikaŭ, miarkujučy pa fatahrafii ŭ Fejsbuku, naviedvaŭ Radu Jeŭropy ŭ składzie moładzievaj delehacyi.

Na sajcie Mižnarodnaha tavarystva pravoŭ čałavieka jaho imiem padpisanyja natatki ab sieminary ŭ Breście i ab škole «junych pravaabaroncaŭ»; u 2019 hodzie jon skłaŭ spravazdaču pra kruhły stoł pa prablemie dezinfarmacyi ŭ miedyja; akramia taho, Piernikaŭ byŭ u liku biełaruskich pravaabaroncaŭ, jakija vystupili z zajavaj «ab rasavaj dyskryminacyi ŭ ZŠA» paśla zabojstva Džordža Fłojda. U apošnich publikacyjach Piernikaŭ paznačany jak kiraŭnik pres-centra BS MAPČ.

Raniej paviedamlałasia, što suprać redaktara «Vikipiedyi» Marka Biernštejna zaviedzienaja kryminalnaja sprava.

• 0
• 0
• 0
• 0
• 0
• 2
• 3
• 0