Jaje apaznali pa fota ruki z manikiuram, jakoje bačyŭ uvieś śviet. Historyja Iryny Filkinaj — adnoj z zahinułych žycharak Bučy
Kali pieršyja zdymki z vyzvalenaj Bučy patrapili ŭ suśvietnyja ŚMI, siarod ich asabliva vyłučałasia fota ruki zahinułaj žančyny z čyrvonym manikiuram. Ciapier stała viadoma, što heta 53-hadovaja Iryna Filkina. Mienavita pa manikiury jaje i apaznała miascovaja vizažystka, u jakoj Iryna brała ŭroki pierad vajnoj, piša Zerkalo.io.
Vizažystka Anastasija Subačava raspaviała ŭ Fejsbuku, što adrazu źviarnuła ŭvahu na strašny kadr, ale nie mahła zrazumieć, što jaje ŭ im čaplaje. Praz paru dzion dziaŭčyna ŭspomniła, što taki manikiur bačyła ŭ svajoj klijentki z Bučy. Iryna Filkina chadziła da jaje na ŭroki makijažu. Apošni ŭrok byŭ napiaredadni vajny — 23 lutaha.
«Jana skakała ad radaści, bo ŭpieršyniu ŭ žyćci ŭ jaje źjaviłasia ŭłasnaja kaśmietyka, jakuju my kupili, — piša Anastasija. — Kožny raz jana adpracoŭvała našy ŭroki tak staranna, jak nichto. Prychodziačy znoŭ, raspaviadała, jak jaje makijaž acanili novyja prychilniki i jak vydatna jana pačuvajecca. Jana źbirałasia na kancert Volhi Palakovaj, zaviała Instagram… Jana kazała: «Ja na staraści hadoŭ narešcie zrazumieła hałoŭnaje — treba lubić siabie i žyć dla siabie, i narešcie ja budu žyć, jak ja chaču!».
Iryna Filkina žyła ŭ Bučy i pracavała apierataram kacielni ŭ centralnym ofisie sietki mahazinaŭ «Epicentr».
«Jana była vielmi dobrym čałaviekam, ja da hetaha času nie mahu pavieryć. Kali my apošni raz bačylisia, ja asabista rabiŭ kamplimient nakont jaje manikiuru», — raspavioŭ načalnik žančyny.
Jak vyśvietliłasia, Iryna zahinuła 5 sakavika.
«Viartałasia dadomu, tudy, dzie dla kožnaha čałavieka, jak mnie raniej zdavałasia, samaje biaśpiečnaje miesca… jaje rasstralali, pasiarod vulicy, nie dajechała 15 chvilin… kulaj pamieram z moj palec», — napisała dačka zahinułaj Volha Ščyruk u Instahramie.
Iryna nie chacieła evakujavacca i kidać dom. Jak jaje rodnyja raspaviali, bajavyja dziejańni zaśpieli žančynu na pracy, transpart nie chadziŭ, i jana ŭziała ŭ supracoŭnika rovar, kab patrapić dadomu. Tady ŭ ich z dačkoj i adbyłasia apošniaja telefonnaja razmova — za paŭkiłamietra da miesca, dzie Irynu zabili.
Na nastupny dzień dačce paviedamili, što ŭ jaje maci stralali i jana, vierahodna, zahinuła. Da taho ž, taja bolš nie vychodziła na suviaź. Ale jašče amal miesiac, jak raspaviała Volha The New York Times, jana spadziavałasia, što maci ŭsio ž niejkim čynam vyžyła. Kančatkova rodnyja pierakanalisia ŭ hibieli žančyny tolki 1 krasavika — u jaje dzień naradžeńnia — kali im dasłali videa z Bučy, na jakim vidać cieła, jakoje lažyć pobač z rovaram, a zatym i fatahrafii ruki z tym samym manikiuram.
Pachavać Irynu Filkinu ŭ rodnych nie atrymlivajecca dahetul — usie cieły zabitych z vulic zabrali dla sudmiedekśpiertyzy.
«Jany kažuć, kudy, ale nie kažuć, jość u ich ci nie. Jany nie viedajuć, bo vas tam tak šmat. Im treba viedać, ad čaho ty pamierła. Ja pavinna čakać, pakul praviaduć ekśpiertyzu. Jeŭropie treba dakazać, što ŭ nas adbyvajecca, bo słoŭ i fota im mała, im treba, kab było na papiery. Na papiery jany napišuć, što ciabie i praŭda zabili i heta hienacyd. … Mnie zdajecca, kali b u knižkach pa historyi pisali nie suchija fakty ź ličbami, a zmahli pieradać choć 1% taho, što adčuvajuć ciapier ludzi, to bolš nichto b nie zachacieŭ kryčać «možam paŭtaryć», — napisała dačka zahinułaj.
Praź niekalki dzion Volha raspaviała, što ŭ pamiać pra mamu, jakaja zaŭsiody kazała joj nie siadzieć na miescy i dziejničać, jana razam ź siastroj vyrašyła adkryć dabračynny fond, jaki budzie dapamahać z reabilitacyjaj dzieciam, jakija stracili rodnych na vajnie.
Kamientary