«Uvieś biznes prosta stanie». Što aznačajuć novyja sankcyi dla biełaruskich pieravozčykaŭ
Jeŭrasajuz pryniaŭ šerah novych sankcyj, siarod jakich zabarona na dziejnaść biełaruskich transpartnych kampanij na terytoryi ES. «Naša Niva» pahutaryła sa śpiecyjalistam u halinie mižnarodnych hruzapieravozak, kab daviedacca, jak heta moža adbicca na biełaruskim biznesie.
Patok hruzaŭ ź Jeŭropy značna skaraciŭsia
Sa słoŭ surazmoŭcy, peŭnyja prablemy ŭ biełaruskich pieravozčykaŭ pačalisia jašče da pačatku vajny.
«Pieršym surjoznym udaram pa hruzapieravozkach staŭ mihracyjny kryzis. Z-za mihrantaŭ čas na pierasiačeńnie miažy prykmietna pavialičyŭsia. Zakryćcio «Bruzhoŭ» pryviało da taho, što fury pačali tydniami stajać u čarzie ŭ abodva baki», — adznačaje śpiecyjalist.
Z časam rynak adreahavaŭ na situacyju z čerhami, i staŭki na pieravozku hruzu pa maršrucie Jeŭropa — Biełaruś (Jeŭropa — Rasija) značna pavialičylisia.
«Ciapier ža praz vajnu i sankcyi situacyja znoŭ stała horšać. Patok hruzaŭ ź Jeŭropy ŭ Rasiju i Biełaruś skaraciŭsia. Chtości nie moža apłacić tavar, častka kampanij prypyniła adhruzku tavaraŭ na našy krainy. Ciapier my pryjšli da taho, što staŭki na dastaŭku hruzaŭ ź Biełarusi ŭ ES stali vyšejšymi, čym ź ES u Biełaruś, choć zaŭždy było naadvarot».
U firmie našaha surazmoŭcy jość mašyny nie tolki na biełaruskaj rehistracyi, ale i na polskaj. Paśla taho jak Biełaruś nadała svaju terytoryju dla ahresii Rasii suprać Ukrainy, z mašynami na biełaruskaj rehistracyi pačalisia prablemy.
«Našy polskija mašyny pastajanna pracujuć, a biełaruskija pieryjadyčna prastojvajuć. Dajšło da taho, što adzin z našych bujnych biełaruskich klijentaŭ, jaki zajmajecca impartam tavaru z Hiermanii, paviedamiŭ, što praciahnie pracavać z nami, ale budzie zakazvać pieravozku praz našu polskuju firmu. Za heta jon navat hatovy pierapłočvać.
Pavodle jaho słoŭ, heta patrabavańnie niamieckich partnioraŭ, jakija bolš nie chočuć adhružać tavar biełaruskim pieravozčykam. Vynikaje, što pakul častka biełaruskich mašyn prastojvaje, na pasłuhi pieravozki polskimi hruzavikami vyras popyt i staŭki», — adznačyŭ śpiecyjalist.
Ciarpić i jeŭrapieski biznes
Tym nie mienš, jak adznačaje surazmoŭca, u samoj Jeŭropie taksama nie ŭsio tak hładka.
«Niekatoryja bujnyja litoŭskija i polskija firmy mieli filijały, zarehistravanyja ŭ Rasii, atrymlivajecca, jany taksama pacierpiać. Mahčyma, pasprabujuć pieravieści transpart pad jurysdykcyju svaich firmaŭ na terytoryi ES. Bo pradać ich budzie amal nierealna.
Praz skaračeńnie hruzapatokaŭ taksama cierpiać polskija i litoŭskija firmy, bo peŭnaja častka ich pracy była nakiravana na pieravozki va ŭschodnim kirunku. Akramia taho, niadaŭna ŭ ES ŭviali «pakiet mabilnaści», jaki ŭskładniŭ pracu kiroŭcam. Ciapier jany musiać kožny raz pry pierasiačeńni miežaŭ unutry ES adznačać u tachohrafie, dzie znachodzicca mašyna. Praz heta vyrasła i padatkovaja nahruzka. U dadatak za apošni čas mocna vyraśli ceny na paliva».
Sa słoŭ surazmoŭcy, niekatoryja jeŭrapiejskija pieravozčyki strajkujuć abo rychtujucca da strajkaŭ.
«Sankcyi i niestabilnaść u rehijonie, biezumoŭna, adbivajecca i na jeŭrapiejskim rynku, ale hetyja nastupstvy nie paraŭnalnyja z našymi. U vypadku ŭviadzieńnia zabarony na pracu našych transpartnych kampanij na terytoryi ES naš aŭtapark prosta stanie. Treba razumieć, što ŭ Biełarusi zarehistravana kala 6000 mižnarodnych pieravozčykaŭ. Bolšaść ź ich pracavali ź Jeŭropaj».
Pieraaryjentacyju takoj kolkaści pieravozčykaŭ na ŭnutrany rynak JEAES śpiecyjalist ličyć niemahčymaj.
«Na ŭnutranym rynku niama takoha abjomu, kab usim chapiła pracy. Akramia taho treba razumieć, što častka bolš-mienš novych mašyn absłuhoŭvalisia ŭ toj ža Polščy. U Biełarusi i Rasii prosta niama dastatkovaj kolkaści servisaŭ i zapčastak, kab ich absłužyć. Da taho ž, jazda pa rasijskich darohach pryviadzie da taho, što vy prosta vielmi chutka dabjecie mašynu. Tamu bolšaść prosta vymušana prypynić pracu.
Unutrany rynak nie maje takoj patreby ŭ pieravozkach furami. Kali kolkaść prapanoŭ ad pieravozčykaŭ pavialičycca, to mocna pamienšajuć staŭki. Ale zastanucca tyja, chto vymušany płacić za lizinh abo kredyt. Jany buduć hatovyja pracavać za lubyja hrošy, kab jašče bolš nie sychodzić u minus», — upeŭnieny śpiecyjalist.
Na dumku surazmoŭcy, u najbolš spryjalnych umovach apynucca tolki biełaruskija pieravozčyki, jakija majuć firmy i hruzaviki, zarehistravanyja ŭ krainach ES. U ich prynamsi zastajecca mahčymaść pracavać unutry ES.
Śpiecyjalist adznačaje, što situacyja moža značna pahoršycca, kali Biełaruś uviadzie kontrsankcyi. Ich nastupstvy mohuć zakranuć nie tolki pieravozčykaŭ i biznes, ale i šerahovych spažyŭcoŭ.
«Zaraz ništo nie pieraškadžaje našym uładam uvieści lusterkavyja sankcyi i zabaranić pracu jeŭrapiejskich kampanij na našaj terytoryi. Heta moža pryvieści da surjoznych prablem. U takim vypadku moža atrymacca, što dastaŭlać hruzy budzie prosta niama kamu.
Čytajcie taksama:
Jeŭrasajuz zaćvierdziŭ novyja sankcyi: zabarona na dziejnaść transpartnych kampanij z Rasii i Biełarusi
Zaachvočvańnie ekspartu, źnižeńnie pošlin — urad zaćvierdziŭ płan padtrymki ekanomiki
Aleksijevič narešcie vykazałasia pra Izrail i Paleścinu24
Kamientary