«Homiel» pieramoh u mienšaści, chacia sastupaŭ 0:2, a čempijon zvolniŭ treniera ŭsiaho paśla troch turaŭ! Jarki finał futbolnaha paniadziełka ŭ krainie
Kamanda Uładzimira Niavinskaha «zapalvaje» pa viaśnie ŭ ajčynnym futbole. Pieramoha ŭ čverćfinale Kubka, udały startavy matč paŭfinała, a zaraz — siensacyjnaja valavaja viktoryja nad «Biełšynaj» ŭ Babrujsku!
Užo na 18-j chvilinie «bieła-zialonyja» mieli dva miačy adstavańnia. Pryčym adnu z praboin u abaronie supiernikaŭ pakinuŭ Homza — były futbalist «Homiela». Adnak dubl Makasia dazvoliŭ haściam adnavić raŭnavahu. Pieramožny ž miač pravioŭ Afi, čym spryčyniŭsia da samaha efiektnaha «kambeku» hetaha siezona: z 66-j chviliny padnačalenyja Niavinskaha hulali ŭ mienšaści z-za vydaleńnia Mirošnikava.
Adznačym, što ŭ druhim matčy dnia sumnyja nuli na tabło tak i nie źmianilisia ŭ dvuboi «Arsienała» dy «Viciebska». Heta spravakavała chvalu čutak pra chutkaje zvalnieńnie nastaŭnika kamandy z poŭnačy. Kiraŭnictva kłuba rasčaravałasia nie tolki ničyjoj z debiutantam elity, ale i ŭvohule šerymi dziejańniami chłapcoŭ Jaŭhiena Čarnuchina na starcie pieršynstva.
A voś dzie sapraŭdnaje zvalnieńnie adbyłosia, dyk heta ŭ Salihorsku. Ivanu Bijončyku daviałosia tolki try tury pakiravać čempijonami, paśla čaho śpiecyjalista adpravili ŭ adstaŭku. Pry adnoj pieramozie i dźviuch ničyich hałoŭnamu trenieru, padajecca, niama čaho było chvalavacca.
Adnak sapsavanyja adnosiny z futbalistami i mietady kiravańnia, jakija niehatyŭna ŭsprymalisia spartsmienami, vymusili kiraŭnictva razarvać kantrakt.
Cikava, što Bijončyk byŭ vośmym trenieram, jaki kiravaŭ «harniakami» z 2017 hoda. I nivodzin ź ich nie zdoleŭ prapracavać poŭny siezon.
Čakajecca, što novym hałoŭnym trenieram «harniakoŭ» stanie Siarhiej Tašujeŭ. Rasijanin užo ŭznačalvaŭ «Šachcior» u 2018-2019 hadach, ź jakim zdabyvaŭ Kubak našaj krainy.
Paśla troch turaŭ lidarstva čempijanata za barysaŭskim BATE — 9 ačkoŭ z mahčymych. Pa 7 bałaŭ na rachunku staličnych «Enierhietyka» i «Dynama», a taksama hrodzienskaha «Niomana».
Kamientary