Paranieny na pratestach-2020, nosić z saboj hranatu na vypadak akružeńnia: chto taki dobraachvotnik «Janki» ŭ vobrazie vusataha husara
Hetaha biełaruskaha dobraachvotnika z husarskimi vusami vy dakładna bačyli — videa ź im nie raz raźlatalisia pa sacsietkach. Jaho pazyŭny «Janki», sapraŭdnaje imia Ihar. Da vajny jon pracavaŭ u pryvatnaj achovie i zajmaŭsia džyu-džycu. «Naša Niva» pahutaryła z chłopcam.
«Byŭ futbalistam, a potym pačaŭ zajmacca adzinaborstvami»
Ihar ź Minska, skončyŭ kaledž. Va Ukrainu jon pryjechaŭ u kancy vieraśnia 2020 hoda, paśla taho, jak im, jak udzielnikam biełaruskich pratestaŭ, zacikavilisia siłaviki.
«Z samych pieršych dzion ja byŭ razam sa svabodnymi biełarusami. Ja paciarpieŭ ad śviatłošumavoj hranaty, mnie paškodziła nahu. Spačatku nikomu nie było spravy, paśla pačali šukać ludziej. Tak pa mianie i pryjšli — pryjechali z vobšukam da baćkoŭ, a ja tam naohuł nie žyvu, byŭ prapisany tolki. Paśla hetaha ja źjechaŭ», — raskazvaje chłopiec.
U Minsku jon byŭ mieniedžaram pa prodažach u kramie Apple. Va Ukrainie apošni hod pracavaŭ u pryvatnaj achovie.
Ihar — spartsmien.
«Spačatku byŭ futbalistam, ale ŭ hod 15 atrymaŭ traŭmu, jakaja była niesumiaščalnaja z hetym sportam. Potym pačaŭ zajmacca adzinaborstvami, bo nie zmoh doma prosta siadzieć, usim patrochu. Kali pierajechaŭ u Kijeŭ, moj najlepšy siabar paznajomiŭ mianie z takim vidam sportu, jak džyu-džycu, mnie spadabałasia, pačaŭ treniravacca, vystupać. Pradstaŭlaŭ kłub «Rakieta kijeŭskaja», jon ža ATOS».
«Ruskija sałdaty apranutyja, jak bamžy, narmalna vyhladajuć tolki desantniki»
«Janki» raskazvaje, jak pryniaŭ rašeńnie iści vajavać.
«Razmovy pra vajnu byli praz paŭhoda, jak ja pierajechaŭ. Z tych časoŭ ja pačaŭ zadumvacca, pajdu na vajnu, ci nie. Za hod hetaja kraina stała maim druhim domam, ukraincy padstavili mnie ŭ ciažki čas plačo. U moj druhi dom pryjšoŭ vorah, i ja liču, što treba dapamahać bratam.
Jak tolki pačałasia pieršaja bambiožka a 5-j ranku, praz paŭhadziny ja ŭžo vychodziŭ z rečami z domu.
Mianie lohka ŭziali ŭ dobraachvotniki, bo ja trapiŭ da svaich znajomych, mianie ŭsie viedali».
Ihar vajuje razam z ukraincami.
U kantraktniki chłopiec nie pajšoŭ. Kali skončycca vajna, kaža, składzie zbroju ŭ šafu dalej.
«Ja nie vajenny čałaviek, ja nikoli nie słužyŭ, i mnie ŭ pryncypie nie padabajecca vajna. Kali chtości dumaje, što ja atrymlivaju ad hetaha zadavalnieńnie, to nie. Ja chaču žyć zvyčajnym žyćciom».
U rolikach, što jość u siecivie, «Janki» pavodzić siabie pa-husarsku. Heta vobraz?
«Usie hetyja videa atrymlivalisia spantanna, — tłumačyć chłopiec. — A nakont vusoŭ — ja ich daŭno adpuskaŭ. Paśla haliŭ, paśla znoŭ adpuskaŭ».
Z rasijanami na froncie biełarus sutykaŭsia. «Apranutyja jak bamžy», — jomista charaktaryzuje jon tych vajskoŭcaŭ.
«Amunicyja, adzieńnie — nibyta ich źbirali hadoŭ sto tamu. Mnie zdajecca, usio, što śpisanaje, na ich apranuli i skazali: idzicie vajavać. Jość desantnyja vojski — jany apranutyja narmalna, u ich novyja AK, kulamioty dobryja. Desantnyja vojski jeździać na BTRach apošnich», — dzielicca nazirańniami Ihar.
«Ja nie źbirajusia zdavacca ŭ pałon»
«Janki» abaraniaŭ aeraport u Baryspali, vyzvalaŭ sioły ŭ Kijeŭskaj vobłaści.
«Nie moža być ničoha dobraha na froncie, ja tabie tak skažu. Samaje ciažkaje na słužbie — hublać znajomych i siabroŭ. Ja čałaviek dziesiać blizkich zhubiŭ».
— Ty nie baišsia, što trapiš u pałon i ciabie paznajuć?
— Ja nie źbirajusia zdavacca ŭ pałon. U mianie zaŭsiody jość z saboj hranata. I ja lepš pamru svabodnym.
Biełarusaŭ, jakija vajavali suprać Ukrainy, bajcu asabista bačyć nie davodziłasia.
«Ale pa infarmacyi, jakuju davali mnie, pad Hastomielem była raźbitaja hrupa «Alfa». Ja nie viedaju, heta praŭda ci nie».
— Što b ty skazaŭ tym aficeram, jakija słužać u biełaruskaj armii ciapier?
— Što mnie im možna skazać? Lepš, chłopcy, siudy nie pryjazdžajcie, čyj by heta zahad ni byŭ.
«Naša Niva» adnaŭlaje zbor danataŭ — padtrymać prosta
Čytajcie taksama:
«Mianie možna nazvać pamočnikam kamandzira». Vadzim Prakopjeŭ raskazaŭ pra połk «Pahonia»
Śmiarotna paranieny, zastaŭsia prykryvać svaich. Chto taki biełarus «Tur», zabity pad Kijevam
«Biełarusy buduć cichieńka dumać svajo. A vada kamień točyć, dyj Łukašenka fizična nie viečny». Hłyboki manałoh byłoha mytnika Alesia Jurkojcia6
Kamientary