«Barsiełona» vylataje ź Lihi Jeŭropy! Damašniaja niaŭdača 2:3 u zmahańni z «Ajntrachtam» spyniła katałoncaŭ u čverćfinale turnira
Favaryt spabornictva prapuściŭ užo na čaćviortaj chvilinie — i tolki naprykancy sustrečy pieratvaryŭ parazu z haniebnaj u bolš-mienš prystojnuju. Fijaska stała dla «błaŭhrany» pieršym z 20 studzienia.
Liha Jeŭropy — adziny turnir, u jakim «Barsiełona» za ŭsiu svaju historyju nikoli nie pieramahała. Sioleta raźlik byŭ vypravić hetuju statystyku. Tym bolš, što ŭzrovień majsterstva futbalistaŭ z Katałonii vidavočna pieraŭzychodziŭ siarednija pakazčyki kankurentaŭ.
Adnak «błaŭhrana» spatyknułasia ŭžo ŭ čverćfinale. Spačatku ŭ haściach, kali pahadziłasia na ničyju 1:1 z «Ajntrachtam», jaki apošniuju čverć hadziny sustrečy hulaŭ u mienšaści. A paśla — doma, kali padaravali niemcam pienalci ŭžo na čaćviortaj chvilinie. Hoł Kościča staŭ samym chutkim, jaki katałoncy kali-niebudź prapuskali z «kropki» za usie časy ich vystupaŭ u kantynientalnych spabornictvach.
Kančatkova ž intryhu ŭ pary zabiŭ Bore, jaki padvoiŭ pieravahu «Ajntrachta» jašče da pierapynku. Paśla ž trojka centralnych abaroncaŭ z Frankfurta litaralna raźbirała pa brykiecikach usie atakujučyja kanstrukcyi supiernika. A na 67-j chvilinie Kościč aformiŭ dubl, čym pasprabavaŭ pieratvaryć tryumf haściej u sapraŭdny razhrom «Barsiełony».
Da honaru katałoncaŭ, jany nie pahadzilisia z hańbaj dy ŭ dadadzieny da asnoŭnaha čas dvojčy adznačylisia. I tym samym krychu adbialili reputacyju. Adnak heta byŭ maksimum, jaki paŭpłyvaŭ tolki na samaśćviardžeńnie kamandy Chavi.
Ź ničyi 1:1 u pieršym matčy taksama viktoryju vycisnuŭ «Lejpcyh». Niemcy skarystalisia traŭmami ŭ składzie «Atałanty» i spustošanaściu italjanskich lidaraŭ: aktyŭna pačali, zabili adnosna chutki miač i nie ścišvali chady ažno da samaha finišu. Hierojem sustrečy staŭ Nkunku, jaki aformiŭ dubl.
U inšych parach anhlijski «Vest Chem» upeŭniena pierajhraŭ francuzski «Lijon» 3:0 (4:1 pa sumie dvuch matčaŭ), a šatłandski «Rejndžers» u oviertajmie skaryŭ partuhalskuju «Brahu» 3:1 (3:2 sumarna).
U paŭfinale Lihi Jeŭropy sustrenucca «Lejpcyh» — «Rejndžers»; «Ajntracht» — «Vest Chem».
U Lizie Kanfierencyj najbolš cikavym było pytańnie, ci zdoleje «Roma» likvidavać deficyt u adzin miač (1:2) paśla vizitu tydniovaj daŭniny da narviežskaha «Bude-Hlimtu». Kamanda Žaze Muryńju sfarmulavała adkaz usiaho za 30 startavych chvilin, kali zabiła trojčy. Uvohule ž viečar italjancy skončyli ź likam 4:0 — i tryumfalna patrapili ŭ paŭfinał.
A voś anhlijski «Lester» tudy ž prabiŭsia ź niervami. Paśla prapuščanaha ad Zachavi miača na 27-j chvilinie pierad «lisami» paŭstała sapraŭdnaja pahroza pakinuć turnir. I damokłaŭ mieč, što padviesiŭ hałandski PSV, visieŭ nad imi amal da skančeńnia dvuboju.
Adnak hały Medzisana i Pierejry pad zasłonu sustrečy pierakulili raskłady ŭ pary z noh na hałavu — i paradavali «Lester» paśla 0:0 u pieršym matčy.
U inšych parach «Marsel» u haściach akazaŭsia macniejšym za hrečaski PAOK 1:0 i pa sumie matčaŭ atrymaŭ pieramohu 3:1. A hałandski «Fiejenord», skaryŭšy 3:1 pražskuju «Słaviju», pakročyŭ u nastupny raŭnd z ahulnaj pieravahaj 6:4.
U paŭfinale zhulajuć «Roma» — «Lester»; «Marsel» — «Fiejenord».
Ciapier čytajuć
Kolki biełarusaŭ hałasavała za Łukašenku na raniejšych vybarach? Apublikavanyja zakrytyja ličby dziaržaŭnych apytańniaŭ18
Kolki biełarusaŭ hałasavała za Łukašenku na raniejšych vybarach? Apublikavanyja zakrytyja ličby dziaržaŭnych apytańniaŭ
«U mianie na stale piać hadoŭ lažała papiera ź pieradačaj prava apieki nad synam». Volha Sieviaryniec — pra hady strachu, antydepresanty i nadzieju1111
Kamientary