«Ludzi nie chočuć, kab rašeńni za ich prymalisia za miažoj». Pasoł ZŠA prakamientavała sproby Makieja naładzić dyjałoh
Jak u ZŠA ŭsprymajuć prapanovy biełaruskich uładaŭ naładzić dyjałoh? Ci stała takich sihnałaŭ bolš? U abmien na što Zachad hatovy asłabić sankcyi? Na hetyja i inšyja pytańni adkazała ambasadarka ZŠA, jakaja zajmajecca Biełaruśsiu, Džuli Fišer.
Niadaŭna šyroka abmiarkoŭvaŭsia list ministra zamiežnych spraŭ Uładzimira Makieja ŭ ES z prapanovaj naładzić adnosiny miž krainami. Što ZŠA dumaje nakont takich sihnałaŭ, ci hatovyja jany havaryć z Łukašenkam i Makiejem i kali tak, to pry jakich umovach?
«Hety list pakazvaje, što Minsk razumieje, što jon ciarpić ad izalacyi, jakuju stvaryŭ Łukašenka. Pytańnie pieramoŭ z režymam važnaje. I Złučanyja Štaty vyrazna kazali pra toje, što treba, kab raźviarnuć našy adnosiny, kab my asłabili sankcyi i jakija kroki treba zrabić.
Heta vyzvaleńnie palitviaźniaŭ jak pieršy krok. Druhi — asensavany dyjałoh ź biełaruskim narodam, jaki pryviadzie da novych vybaraŭ pad mižnarodnym nahladam. Taksama važnaje patrabavańnie — spynieńnie padtrymki vajny Rasii va Ukrainie.
Biełaruś praciahvaje trymać pasolstva ŭ Vašynhtonie, ale pytańnie, buduć tyja, chto prymaje rašeńni ŭ Biełarusi, sapraŭdy chacieć dyjałohu ci nie», — adkazała ambasadarka padčas pres-kanferencyi ź biełaruskimi žurnalistami.
Ci stała bolš sihnałaŭ z prośbaj naładzić adnosiny? Džuli Fišer kaža, što składana akreślić tendencyju, bo listy iduć nie da adnaho čałavieka ci ŭ adnu stalicu.
«Ale vyrazna bačna, što ŭ Minsku MZS važnuju rolu adyhryvaŭ u tym, kab abmiežavać mahčymaść [zamiežnych] dypłamataŭ pracavać u Biełarusi, jany vyhnali mnohich i nadzvyčaj varoža pastavilisia da svaich abaviazkaŭ pa Vienskaj kanviencyi. I budzie vielmi składana luboj zachodniaj stalicy ŭspryniać heta jak surjoznuju sprobu, bo Biełaruś nastolki daloka adyšła ad svaich mižnarodnych abaviazkaŭ. Biełaruś praciahvaje padtrymlivać dypłamatyčnyja stasunki z zachodnimi krainami ŭ bolšaści vypadkaŭ, ale jany vielmi słabyja praź dziejańni ŭładaŭ u Biełarusi».
Ambasadarka prakamientavała taksama pytańnie pra toje, ci hatovyja byli b ułady ZŠA pryznać urad u vyhnańni, kali b Śviatłana Cichanoŭskaja, Pavieł Łatuška i inšyja pradstaŭniki demsiłaŭ jaho stvaryli.
«My pracavali ščylna z našymi partniorami ŭ Jeŭropie. My akazali padtrymku Śviatłanie Cichanoŭskaj, jak lidaru biełaruskaha demakratyčnaha ruchu, i budziem praciahvać heta rabić. Takuju ž patrymku jana atrymlivała ŭ stalicach Jeŭropy, pakolki jaje pazicyi pryznajuć, pryznajuć, što vybary byli sfalsifikavanyja, što jana atrymała šmat padtrymki padčas vybaraŭ.
Pytańnie, jak demakratyčnyja siły buduć pracavać razam, jak jany siabie pastaviać u śviecie represij, jak vykarystajuć hety momant u Biełarusi. Heta pytańnie, jakoje musiać rašać jany, i heta ich rašeńnie, jak arhanizavać hetuju pracu.
My budziem praciahvać pracavać z usimi demakratyčnymi siłami, asabliva sa spadaryniaj Cichanoŭskaj, kab pakazać padtrymku ZŠA narodu Biełarusi».
Džuli Fišer taksama zaŭvažyła, što ZŠA adroźnivaje režym u Minsku, jaki padtrymlivaje vajnu, i narod Biełarusi, jaki supraćstaić hetaj vajny.
«Ja chaču padkreślić śmiełaść tych, chto ŭ Biełarusi publična vykazvaje niazhodu z vajnoj, viedajučy, što jany mohuć być aryštavanyja. Dla hetaha patrebnaja vialikaja śmiełaść, kab stać za spraviadlivuju spravu ŭ takim asiarodździ. I heta adna z tych rečaŭ, jakuju Pucin i Łukašenka nie praličyli.
Biełaruski demakratyčny ruch atrymaŭ novaje dychańnie, bo narod Biełarusi fundamientalna suprać uvarvańnia ŭ susiednija krainy, i ludzi bačać, što zmahajucca razam z narodam Ukrainy za svaju dziaržaŭnaść i suvierenitet», — vykazałasia jana.
«Vyrazna vidać, što biełaruski narod u svajoj bolšaści — praciŭnik hetaj vajny. Jon nie choča, kab biełaruskija sałdaty vajavali va Ukrainie, jon nie choča, kab ruskija sałdaty ŭryvalisia va Ukrainu ź Biełarusi i nie choča, kab ruskija sałdaty zastavalisia ŭ Biełarusi. Ludzi nie chočuć, kab rašeńni za ich prymalisia za miažoj», — dadała Džulija Fišer.
ZŠA, pa jaje słovach, pa-raniejšamu źviartaje ŭvahu na situacyju ŭ Biełarusi, adsočvaje parušeńnie pravoŭ čałavieka ŭ našaj krainie.
«A što ŭ vas za prablemy? Daloka da Minska ci niama kamu padvieźci?» Publičnaja pikiroŭka Łukašenki i Pašyniana10
Kamientary