Žurnalistku Irynu Słaŭnikavu abvinavačvajuć u stvareńni ekstremisckaha farmavańnia, joj pahražaje da 7 hadoŭ

Iryna Słaŭnikava i jaje muž Alaksandr Łojka byli zatrymanyja 30 kastryčnika 2021 hoda ŭ aeraporcie Minska, kali viartalisia z adpačynku. Pieršapačatkova para była asudžanaja da 15 sutak aryštu za «publikacyju ŭ Facebook ekstremisckaha kantentu».

Havorka išła pra materyjały «Biełsata» pieryjadu, kali telekanał jašče nie byŭ pryznany ekstremisckim. Sutki skončylisia, ale ni muža, ni žonku nie adpuścili. Ich pryvieźli ŭ inšaje RUUS, dzie jany pačuli, što znoŭ zatrymanyja — nibyta «za drobnaje chulihanstva». I znoŭ im dali pa 15 sutak aryštu. 26 listapada 2021 hoda žurnalistku pryznali padazravanaj pa kryminalnaj spravie, a zatym pieraviali ŭ śledčy izalatar № 1 u Minsku.

Pavialičyć

Jaje muža vypuścili na volu paśla jašče adnaho 15-dzionnaha turemnaha źniavoleńnia — hetym razam za toje, što jon nibyta «nie padparadkavaŭsia» zahadam siłavikoŭ.

— Irynie pieršapačatkova było pradjaŭlenaje abvinavačvańnie pavodle artykuła 342 KK RB, častka 1. Artykuł tyčycca «arhanizacyi hrupavych dziejańniaŭ, jakija hruba parušajuć hramadski paradak ci ŭdziełu ŭ ich», — kaža Alaksandr Słaŭnikaŭ, baćka žurnalistki.

Hety artykuł standartna vykarystoŭvajecca ŭ dačynieńni da ŭdzielnikaŭ maršaŭ paśla sfalsifikavanych režymam Łukašenki vybaraŭ. Pavodle jaho pahražaje pakarańnie ŭ vyhladzie abmiežavańnia voli na termin ad 2 da 5 hadoŭ abo pazbaŭleńnie voli na termin da 4 hadoŭ. Mienavita pa hetym artykule byli asudžanyja da 2-ch hadoŭ kałonii ahulnaha režymu žurnalistki «Biełsata» Kaciaryna Andrejeva i Darja Čulcova — ich abvinavacili ŭ tym, što jany stali saarhanizatarami akcyi pamiaci pra zabitaha Ramana Bandarenku.

— Niekatory čas tamu, kali advakat skłaŭ skarhu na zatrymańnie Iryny i jaje ŭtrymańnie ŭ SIZA, jon daviedaŭsia, što maju dačku taksama abvinavačvajuć pavodle artykułu 361-1, častka 1, jakaja hučyć tak: «Stvareńnie ekstremisckaha farmavańnia, a roŭna farmavańnia, dziejnaść jakoha nakiravana na reabilitacyju nacyzmu, albo kiraŭnictva takim farmavańniem abo strukturnym padraździaleńniem, jakoje ŭvachodziać u jaho, — kaža baćka žurnalistki. — Nakolki ja pamiataju, heta da 7 hadoŭ pazbaŭleńnia voli.

Śledčy kamitet nie pieradaje miedyja infarmacyju pra chod spravy ŭ dačynieńni da Iryny Słaŭnikavaj. Usie advakaty, što baranili jaje, byli abaviazanyja dać padpisku ab nierazhałošvańni. Adpaviedna, navat baćki i muž žurnalistki nie viedajuć, u čym mienavita jaje abvinavačvajuć.

3 listapada 2021 hoda — užo paśla aryštu Iryny Słaŭnikavaj — biełaruskaje MUS pryznała ekstremisckim farmavańniem niezaležny telekanał «Biełsat». Žurnalistka ŭ minułym supracoŭničała z kanałam, adnak na momant zatrymańnia była štatnaj supracoŭnicaj TVP, padkreślivaje jaje baćka.

Tak, maja dačka pracavała na «Biełsacie», ale heta było 10 hadoŭ tamu, a moža być, i bolš. A ciapier jana pracavała z Polskim telebačańniem. Kali ŭžo i TVP pryznali ekstremisckim, to ja ŭ šoku, — kaža Słaŭnikaŭ.

— Advakat kaža, što niama nijakich padstaŭ dla zakrytaha sudovaha pracesu. Tym nie mienš, jon ličyć, što słuchańni buduć zasakrečanyja pa toj pryčynie, što dokaznaja baza vielmi słabaja i, kali sud budzie publičnym, usie zrazumiejuć, što Iryna nie vinavataja ŭ tych złačynstvach, u jakich jaje abvinavačvajuć.

U suviazi z absurdnaściu abvinavačvańniaŭ i adsutnaściu dokazaŭ jaje blizkija vielmi raźličvajuć na toje, što jana vyjdzie z zały suda volnym čałaviekam. Adnak jany razumiejuć, što na sudach žurnalistaŭ u Biełarusi apraŭdalnych prysudaŭ niama.

— Što b ni zdaryłasia, my ŭsio roŭna viedajem, što naša dačka nievinavataja i ŭ kančatkovym vyniku budzie reabilitavanaja. I chaj hety prysud lažyć na sumleńni tych, chto jaho vyniesie, — zakančvaje razmovu z nami Alaksandr Słaŭnikaŭ.

• 1
• 0
• 0
• 0
• 0
• 3
• 9
• 0