U Iraku nie pavieryli biełaruskamu Śledčamu kamitetu, što byli złačynstvy palakaŭ suprać mihrantaŭ. Patrebnyja śviedki, videa abo fatahrafii
U Iraku zajavili pra toje, što nijakich dokazaŭ «masavych pakarańniaŭ śmierciu mihrantaŭ na biełaruska-polskaj miažy» niama. Pra heta paviedamlaje irakskaje infarmacyjnaje ahienctva INA sa spasyłkaj na aficyjnaha pradstaŭnika MZS Iraka Achmieda As-Sachafa, piša Reform.by.
Śledčy kamitet Biełarusi na niadaŭniaj sustrečy ź irakskaj delehacyjaj pieradaŭ pradstaŭnikam krainy pakazańni polskaha deziercira Emila Čečki, jaki zajaŭlaŭ ab «masavych pakarańniach śmierciu i tajemnych pachavańniach zabitych biežancaŭ u prymiežnaj zonie» (Čečka abvinavačvaŭ u hetym polskich pamiežnikaŭ).
Pradstaŭnik MZS Iraka rastłumačyŭ, što niama nijakich dakumientalnych abo jurydyčnych śviedčańniaŭ złačynstvaŭ, pra jakija idzie havorka, takich jak śviedki, videa abo fatahrafii.
Achmied As-Sachaf adznačyŭ taksama, što MZS Iraka daručyŭ ambasadzie ŭ Varšavie kaardynavać svaje dziejańni z polskimi ŭładami paśla roznych paviedamleńniaŭ u ŚMI, jakija ŭ vyniku akazalisia niedakładnymi.
«7 lutaha 2022 hoda pasolstva prystupiła da kaardynacyi i rasśledavańnia na vysokim uzroŭni praz adpaviednyja orhany ŭ Polščy, i było dakazana, što naviny, apublikavanyja zamiežnymi i miascovymi ŚMI, byli niedakładnymi», rastłumačyŭ Sachaf. Jon udakładniŭ, što nivodzin hramadzianin Iraka nie padavaŭ skarhi na toje, što było zhadana ŭ navinach.
Achmied As-Sachaf adznačyŭ taksama, što «ŭrad Iraka raniej sfarmavaŭ śpiecyjalizavanuju jurydyčnuju hrupu, jakaja zajmajecca rasśledavańniem hetaj spravy, i jana pradstavić svaju spravazdaču, jak tolki budzie zavieršana rasśledavańnie».
Čytajcie taksama:
Śledčy kamitet raskazaŭ irakcam pra «złačynstvy palakaŭ»
U Biełarusi pierad vybarami mohuć błakavać internet — jak da hetaha padrychtavacca, kab być na suviazi2
Kamientary