Chto i jak nabiraje dobraachvotnikaŭ u PVK na vajnu suprać Ukrainy i kolki im płaciać

Kali ŭ pošukaviku «Jandeksa» ŭvieści zapyt «ČVK Vahniera», to ŭžo piaty radok u vydačy pryviadzie na sajt wagner2022.org. Jon zarehistravany mienš za dva miesiacy tamu ŭ Paŭdniovaj Hałandyi, pravincyi na zachadzie Niderłandaŭ, vynikaje z dadzienych servisu Whois, jaki dazvalaje atrymlivać infarmacyju pra damieny.

Sajt z zahałoŭkam «WAGNER PMC aka HRUPPA VAHNIERA» składajecca tolki z adnoj staronki. Na joj — ahitacyjny rolik pra toje, jak hrupa Vahniera sustrakała 8 sakavika ŭ Palmiry (Siryja), i tekst nastupnaha źmiestu: «PMC Wagner užo na Ukrainie i znoŭ pieramahaje. Chočaš unieści svajo imia ŭ historyju bajavoj słavy, ale nie chočaš zmahacca ź biurakratyjaj i pravierkami? Tady dla ciabie dobryja naviny: arkiestru patrebnyja muzyki na Ukrainie! Jany ŭžo vyzvalili Papasnuju — dałučajsia, kab vyzvalić uvieś Danbas! Vypraŭlajsia ŭ svoj pieršy bajavy pachod z žyvymi lehiendami industryi!»

Tym, chto žadaje vypravicca ŭ bajavy pachod, prapanujecca zapoŭnić formu dla zvarotnaj suviazi albo źviarnucca ŭ adno z 26 rehijanalnych pradstaŭnictvaŭ dla atrymańnia infarmacyi. Nasuprać kožnaha z pradstaŭnictvaŭ (Maskva, Staŭrapolski kraj, Kalininhradskaja vobłaść i h.d.) paznačany numary mabilnych telefonaŭ.

Karespandent RBK, pradstaŭlajučysia maładym mužčynam, što žadaje ŭziać udzieł u śpiecyjalnaj vajennaj apieracyi, patelefanavaŭ pa niekatorych ź ich i vyśvietliŭ, jak PVK Vahniera adbiraje i rychtuje svaich supracoŭnikaŭ dla adpraŭki va Ukrainu, kolki možna zarabić, ustupiŭšy ŭ šerahi PVK, i jakija zadačy daviadziecca vykonvać.

Kaho biaruć

U pradstaŭnictvie PVK pa Maskoŭskaj vobłaści (horad Dziaržynski) na pytańnie «heta ČVK Vahniera?» mužčynski hołas adkazaŭ «tak» i adrazu prapanavaŭ usie nastupnyja temy abmierkavać u čacie mesendžara WhatsApp abo Telegram. Tam supracoŭnik pradstaŭnictva paviedamiŭ, što ŭładkavacca ŭ kampaniju možna z pašpartam luboj krainy, akramia tych, što ŭvachodziać u ES i NATA, a taksama akramia Ukrainy; pažadana mieć miedycynski strachavy polis (OMS).

Kandydatu bieź śpiecyjalnaj padrychtoŭki pavinna być ad 24 da 50 hadoŭ albo 23 hady, kali jon adsłužyŭ poŭny kantrakt. Minimalny ŭzrostavy paroh dla kandydata — 22 hady, u hetym vypadku jon pavinien byŭ udzielničać u bajavych dziejańniach va Ukrainie, raspavioŭ supracoŭnik padmaskoŭnaha adździaleńnia PVK.

«Starejšyja za 50 hadoŭ razhladajucca śpiecyjalisty, zapatrabavanyja dla kampanii, z dobrym zdaroŭjem — u indyvidualnym paradku», — napisaŭ jon. Pavodle jaho, štomiesiačnaje ŭznaharodžańnie składaje 240 tys. rub. (biez uliku premij), termin kamandziroŭki ahavorvajecca pa fakcie prybyćcia. «Raźličvajcie na 4+ miesiacy», — dadaŭ surazmoŭca RBK.

U kandydata nie pavinna być cukrovaha dyjabietu, ankałahičnych zachvorvańniaŭ, narkatyčnaj zaležnaści, tubierkulozu, VIČ, prancaŭ i hiepatytu V, S (kali prajšoŭ lačeńnie, to z saboj mieć PŁR-test), pieraličyŭ supracoŭnik PVK.

Akramia hetaha, u kampaniju nie prymuć z sudzimaściu za raspaŭsiud narkotykaŭ, bandytyzm, teraryzm. «Usio, što źviazana z pałavoj niedatykalnaściu, — admova. Astatnija sudzimaści abmiarkoŭvajucca pa fakcie prachodžańnia sumoŭja», — paviedamiŭ jon.

Pavodle jaho, kali kandydat prachodzić pa ŭsich hetych patrabavańniach, to moža jechać u chutar Molkina (Krasnadarski kraj) dla sumoŭja i dalejšych pravierak. «Na KPP spytać pijanierski łahier, na bramcy skazać: «Ad Morhana». 11 lipienia budzie aŭtobus ad kantory z Maskvy», — adznačyŭ surazmoŭca, dadaŭšy, što možna dabracca samastojna, prajezd kampiensujuć.

Supracoŭnik krymskaha pradstaŭnictva PVK taksama bolš padrabiazna raspavioŭ pra hrašovyja vypłaty.

«Kamandziroŭka ŭ nas doŭžycca čatyry miesiacy. Zarobak — 240 tys. rub. u miesiac na ruki plus premija. Pracujem tolki z najaŭnymi. Nijakich kartak, nijakich pieravodaŭ», — padkreśliŭ jon. Hrošy, pavodle jaho, možna atrymać dvuma sposabami: albo ŭsiu sumu paśla kamandziroŭki, albo napisać davieranaść na svaich svajakoŭ, jakija buduć jaje atrymlivać štomiesiac. «Jaje možacie padzialić na dvaich. Heta značyć 30% atrymaje maci, 70% — žonka. Buchhałteryja budzie telefanavać im u kancy kožnaha miesiaca, čysła 20—25-ha, i zaprašać na atrymańnie hrašovaj uznaharody», — rastłumačyŭ surazmoŭca RBK.

Pavodle jaho, za hrašyma ŭ Krasnadar jechać nieabaviazkova, u kožnym rehijonie jość adździaleńnie buchhałteryi ČVK.

Premija moža być roznaj — ad 150 tys. da 700 tys. rub., pamier zaležyć ad pasady i paśpiachovaści vykanańnia pastaŭlenych zadač, praciahnuŭ supracoŭnik krymskaha pradstaŭnictva. «Vam niejkuju zadaču pastavili — vy jaje vykanali. I ŭžo kamandzir padaje vyšejšamu kiraŭnictvu: maŭlaŭ, my vykanali. Kiraŭnictva paćvierdziła, ci sapraŭdy heta tak. Chtości lepš papracavaŭ, chtości siarednie — usim pa 240 nakinuli, bajcam, jakija adznačylisia — pa 300, naprykład», — rastłumačyŭ jon.

Zadačy buduć bajavymi, skazaŭ jon u adkaz na ŭdakładniajučaje pytańnie: «Naprykład, uziać nasieleny punkt niejki. Viadoma, vas nie vykapać akop kličuć». U adkaz na pytańnie, ci praciahnucca vypłaty svajakam, kali supracoŭnik PVK budzie ŭziaty ŭ pałon, pradstaŭnik skazaŭ: «U nas takaja arhanizacyja, što naŭrad ci kahości buduć brać u pałon, razumiejecie? Upieršyniu čuju, kab kandydat zadavaŭ takoje pytańnie. Ja ŭdakładniu, ale, napeŭna, naŭrad ci [buduć vypłaty]».

Pradstaŭnik pieciarburhskaha adździaleńnia PVK prapanavaŭ «sustrecca asabista, kali nieabchodna». «Jakija zadačy my budziem vykonvać? Takija, jakija nam pastaviać», — dadaŭ jon. Pa jaho słovach, u «arhanizacyi» šmat «roznych śpiecyjalnaściaŭ». «Jość i artyleryja i bronietechnika. Vy budziecie vykonvać zadačy, zychodziačy z taho, kim vy budziecie pracavać u našaj kampanii. U nas jość i druhi ešałon, jaki budzie zajmacca achovaj abjektaŭ niepasredna tam. Heta škoły, dziciačyja sadočki, važnyja dla nas administracyjnyja centry. Praca roznaja», — skazaŭ na zakančeńnie supracoŭnik pieciarburhskaha adździaleńnia PVK.

Chto jašče zajmajecca rekrutynham

Uziać udzieł u bajavych dziejańniach va Ukrainie možna nie tolki praz PVK, ale i praz aficyjnyja rasijskija struktury — jak fiederalnyja, tak i rehijanalnyja.

U pryvatnaści, u kancy červienia — pačatku lipienia na sajcie HeadHunter źjaviłasia niekalki vakansij z najmieńniem «vajskoviec pa kantrakcie», raźmieščanych padraździaleńniami Fiederalnaj słužby vojskaŭ nacyjanalnaj hvardyi Rasii. U ich apisańni paznačana: «Słužba pa kantrakcie ŭ dyvizii śpiecnaza na pieryjad praviadzieńnia śpiecyjalnaj vajennaj apieracyi» albo «vajennaja słužba pa kantrakcie na pieryjad praviadzieńnia śpiecyjalnaj vajennaj apieracyi». Paśla zapytu RBK u Rashvardyju jany byli vydalenyja (u redakcyi majucca skrynšoty, jakija paćviardžajuć vakansii).

Tak, u vakansii, apublikavanaj 3 lipienia 2-j rotaj 1-ha pałka palicyi FHKU UVO VNH Rasii pa Maskvie, paviedamlajecca, što nieabchodny supracoŭnik na poŭny pracoŭny dzień. Kandydat moža nie mieć vopytu, ale abaviazany vałodać ruskaj movaj, adpaviadać miedycynskim i prafiesijna-psichałahičnym patrabavańniam vajennaj słužby da kankretnych vajenna-ulikovych śpiecyjalnaściaŭ i mieć dobruju fizpadrychtoŭku.

U vakansii paznačana, što kantrakt mohuć zaklučyć i žančyny, jakija nie znachodziacca ŭ zapasie. «U ciapierašni čas dziejničaje sproščany paradak pryjomu na vajennuju słužbu pa kantrakcie — zaklučeńnie pieršaha kantraktu ab prachodžańni vajskovaj słužby mahčyma na termin da adnaho hoda (na šeść, dzieviać ci 12 miesiacaŭ)», — havorycca ŭ paviedamleńni.

Prapanavany akład — ad 100 tys. da 300 tys. rub. biez padatkaŭ.

U inšaj vakansii, raźmieščanaj 2-m pałkom palicyi FHKU UVO VNH Rasii pa Maskvie 29 červienia, taksama paviedamlajecca, što dośvied pracy nie patrabujecca, ale kandydat pavinien znachodzicca ŭ zapasie ŭ štatna-słužbovaj katehoryi pa vajennym bilecie radavoha abo siaržanckaha składu.

Prapanavany zarobak — ad 260 tys. da 280 tys. rub. u miesiac na ruki. U apisańni paznačana, što dapuskajecca najaŭnaść druhoha hramadzianstva. «Pierad vybyćciom na terytoryju praviadzieńnia śpiecyjalnaj vajennaj apieracyi pravodzicca dvuchmiesiacovaja padrychtoŭka, na pieryjad jakoj vypłačvajecca zarabak 60 tys. rub.», — havorycca ŭ abjavie.

Zaklučeńnie kantraktu mahčyma na termin ad šaści miesiacaŭ, vyznačeńnie prydatnaści kandydata idzie pa sproščanaj schiemie (sproščanaja miedkamisija), skazana ŭ paviedamleńni.

Zaklučyć kantrakt na ŭdzieł u śpiecyjalnaj vajennaj apieracyi na Ukrainie možna taksama prama ŭ meryi horada Hrozny, paviedamlaŭ Telegram-kanał IA «Hroznyj-Inform» (infarmacyjnaje ahienctva zasnavana ŭładami Čačenskaj respubliki) i paćvierdziła krynica RBK, jakaja maje namier zaklučyć taki kantrakt. «Na KPP skažycie, što vy dobraachvotnik. Vas sustrenuć i praviaduć unutr», — instruktavaŭ «Hroznyj-Inform».

Pavodle infarmacyi ahienctva, u jakaści dobraachvotnikaŭ prymajuć «fizična i psichična zdarovych mužčyn» z rasijskim hramadzianstvam va ŭzroście ad 20 da 49 hadoŭ. Vopyt vajennaj słužby nieabaviazkovy. «My nie biarem u svaje šerahi ludziej, u jakich na dadzieny momant jość sudzimaść/umoŭny termin/sud. Tych, chto nie stavić u viadomaść rodnych (maci, baćku, žonku) ab svaich płanach udziełu ŭ Śpiecyjalnaj vajskovaj apieracyi na Ukrainie», — paznačana ŭ paviedamleńni.

Padrychtoŭka zajmaje tydzień. U miesca praviadzieńnia SVO dobraachvotnikaŭ adpraŭlajuć na samalocie. Damova zaklučajecca na miescy na dva miesiacy. Hrašovaje zabieśpiačeńnie — ad 205 tys. da 270 tys. rub. u miesiac z avansam 50 tys. rub., havorycca ŭ abjavie.

Akramia hetaha, praduhledžany sacyjalnyja vypłaty: za atrymanaje ranieńnie — 3 młn rub., u vypadku hibieli — 5 młn rub. Za źniščeńnie techniki abo žyvoj siły praciŭnika dadatkova vypłačvajecca ad 50 tys. da 300 tys. rub. «Hroznyj-Inform» 29 maja pryvodziŭ nastupnyja rascenki:

samalot — 300 tys. rub.;

viertalot — 200 tys. rub.;

tank — 100 tys. rub.;

asabisty skład da ŭzvoda — 100 tys.;

BPŁA, BMP, ZRK, RSZA, SAU, asabisty skład da adździaleńnia — 50 tys. rub.

U siaredzinie maja partał upraŭleńnia dziaržsłužby zaniataści nasielnictva Karačajeva-Čarkieskaj Respubliki apublikavaŭ paviedamleńnie, što Ministerstva abarony prapanuje zaklučyć karotkaterminovy kantrakt dla ŭdziełu ŭ śpiecapieracyi na termin nie mienš za try miesiacy. Dobraachvotnik, pryniaty na vajennuju słužbu, zabiaśpiečvajecca rečavym zabieśpiačeńniem, charčavańniem, svoječasovaj vypłataj hrašovaha ŭtrymańnia, sacyjalnymi harantyjami, havaryłasia ŭ paviedamleńni.

U kancy maja piermski vajenkamat anansavaŭ u sacsietkach nabor kandydataŭ dla ŭdziełu ŭ śpiecapieracyi va Ukrainie. U pryvatnaści, havorka išła ab zaklučeńni kantraktaŭ na pasady aficerskaha, siaržanckaha i radavoha składu na termin ad troch da 12 miesiacaŭ. Štomiesiačnaje hrašovaje zabieśpiačeńnie kantraktnikaŭ składzie ad 300 tys. rub., davodziłasia ŭ paviedamleńni.

Čamu PVK kidajuć na «składanyja» napramki

PVK, Rashvardyja i Minabarony nie kankurujuć pamiž saboj u płanie naboru ludziej dla ŭdziełu ŭ vajskovaj śpiecapieracyi va Ukrainie, adznačyŭ u razmovie z RBK kiraŭnik kampanii «RSB-Hrupp» Aleh Krynicyn. Usiudy pa-roznamu płaciać, staviać roznyja zadačy, dadaŭ jon.

«U vojsku kantraktniki nie ŭsie jeduć na Ukrainu vajavać — kahości raźmiarkujuć na ramont techniki, achovu abjekta i h. d. PVK, jak praviła, adpraŭlajuć u samyja haračyja miescy», — patłumačyła krynica.

Pavodle słoŭ surazmoŭcy, u čas adboraŭ u PVK nie taki žorstki filtr, jak u vojsku. «Minabarony nie moža ŭziać sudzimych, a PVK pa niekatorych artykułach robić vyklučeńni. Plus chtości nie choča praz vojska, a imkniecca da niejkaj ramantyki», — dadaŭ jon.

Ź infarmacyjna-prapahandysckaha punktu hledžańnia važna toje, što straty PVK nie ŭličvajucca ŭ ahulnych zvodkach, nahadała krynica. «I kali jość składanyja napramki, dzie zahinie šmat ludziej, mohuć adpraŭlać na takija zadačy PVK», — rastłumačyŭ jon. Statystykaj jany achoplenyja nie buduć: «Pry ŭziaćci abjekta zahinuła vajskoŭcaŭ, da prykładu, piać čałaviek, a pa fakcie, z ulikam supracoŭnikaŭ PVK, moža być i 200».

Rasija nie raskryvaje biahučyja straty ŭ miežach vajennaj śpiecapieracyi na Ukrainie. Apošni raz Minabarony aficyjna adspravazdačyłasia ab stratach 25 sakavika, paviedamiŭšy ab hibieli 1 351 vajskoŭca. U pačatku červienia prezident Ukrainy Uładzimir Zialenski zajaviŭ — štodnia hinuć 60—100 ukrainskich sałdat, 500 čałaviek kožny dzień atrymlivajuć ranieńni. U toj ža dzień daradca ofisa prezidenta Michaił Padalak udakładniŭ: štodzionnyja straty Ukrainy składajuć ad 100 da 200 čałaviek.

RBK nakiravaŭ zapyty ŭ Minabarony Rasii i Rashvardyju. U viedamstvach paćvierdzili atrymańnie zapytaŭ, ale pakul nie adkazali na ich.

U PVK Vahniera niama pres-słužby. Na aficyjny zvanok RBK u maskoŭskaje pradstaŭnictva PVK adkazali: «Ja z vami nie budu mieć znosiny pa hetym pytańni, usiaho vam dobraha». Admoviŭsia ad jakich-niebudź kamientaroŭ i Michaił, čyj kantakt paznačany ŭ hrupie pad nazvaj «Vakansii v ČVK Vahnier» u sacsietcy «VKontaktie»; jašče adzin kantakt dla najmu supracoŭnikaŭ, jaki pradstaŭleny ŭ hetaj hrupie jak Bavarac, nie adkazaŭ na zvanok RBK.

• 10
• 0
• 5
• 8
• 13
• 5
• 33
• 0