Minskaha kryminalnaha aŭtaryteta padazrajuć u zabojstvie 27-hadovaj daŭniny i piedafilii. I navat troški ŭ palitycy

18 maja 1997 hoda žychary šmatkvaternaha doma na minskaj vulicy Kasmanaŭtaŭ znajšli miortvaje cieła svajho susieda. Toj byŭ marakom, jaki niadaŭna viarnuŭsia z rejsu, tamu asnoŭnaj viersijaj stała ŭzbrojenaje rabavańnie.

Blizkija zahinułaha viedali, što jon pryvioz videakamiery, jakija tady byli redkimi i deficytnymi, i niezadoŭha da śmierci nadrukavaŭ u haziecie abjavu pra ich prodaž.

Kamiery, praŭda, pry hetym nichto nie zabraŭ, prapaŭ tolki akumulatar da adnoj ź ich, i heta padryvała viersiju rabavańnia. Adnak u toj čas vyśvietlić asobu napadnika pa haračych śladach nie ŭdałosia, tamu kryminalnaja sprava pavisła na doŭhija hady.

I tolki ŭ 2015 hodzie, pavodle słoŭ namieśnika načalnika adździeła śledčaha ŭpraŭleńnia USK pa Minsku Vasila Makrušyča, toje zabojstva zmahli źviazać ź minčukom, jaki byŭ šmat razoŭ sudzimy za razboj, kradziažy, uhony, a taksama inšyja złačynstvy.

Akazałasia, što mienavita ź jahonaha revalviera zabili taho maraka.

Mužčyna, adnak, viny nie pryznavaŭ. Zbroja sapraŭdy, maŭlaŭ, była jahonaj, ale stralaŭ nie jon. Pavodle jahonaj viersii, tady jon akurat byŭ pazyčyŭ revalvier znajomamu, jaki mieŭ namier surjozna prystrašyć daŭžnika. Sam ža mužčyna nibyta tolki dapamahaŭ kalektaram za abiacanaje ŭznaharodžańnie, zaviozšy ich da miesca, dzie znachodziłasia achviara. Ale navat uzbahacicca na hetym u vyniku nie ŭdałosia, bo ŭ maraka, maŭlaŭ, najaŭnych hrošaj nie akazałasia.

Dakazać śledčym tady ŭdałosia tolki šerah inšych złačynstvaŭ, ździejśnienych u 1990-ja. Tamu minčuka asudzili na 6 hadoŭ — ale biez zabojstva.

Kali jon adsiedzieŭ i vyjšaŭ, uładkavaŭsia miechanikam na STA — voś takija ŭ Biełarusi «kryminalnyja aŭtarytety». Ale, kažuć siłaviki, usio ž praciahnuŭ ruchacca kryminalnym šlacham. 

Kali ŭ 2023 hodzie pryjšoŭ u hości da svajho byłoha susieda pa kałonii, pahražaŭ jamu i jaho žoncy pnieŭmatyčnym pistaletam.

A paśla kančatkova pakryŭdziŭsia na byłoha susieda i vyrašyŭ abrabavać jaho. Navat znajšoŭ sabie pamahataha. Adnak u vyniku naparnik nie zmoh znajści pistalet i ŭ apošni momant admoviŭsia ad udziełu ŭ hetaj spravie, a samoha arhanizatara napadu zatrymali.

Kali ž «kryminalnaha aŭtaryteta» zatrymali, aprača zvyčajnych złačynstvaŭ, vyrašyli taksama paviesić i papularny ciapier «ekstremizm».

Kažuć, što jon u 2022 hodzie «ŭstupiŭ u tematyčnyja čaty, u jakich padtrymlivaŭ radykalnyja vykazvańni i raźmiaščaŭ publikacyi na asabistaj staroncy z zaklikami da hvałtoŭnaha dziaržaŭnaha pieravarotu».

A jašče jamu vystavili abvinavačvańnie ŭ piedafilii — kab patapić całkam.

Taksama jon

«Pavodle źviestak śledstva, u 2023 hodzie ŭ asabistym internet-profili jon raźmiaściŭ nie mienš za vosiem fotavyjaŭ parnahrafičnaha charaktaru. Ustupiŭ u intymnuju pierapisku z 14-hadovym padletkam, schilaŭ junaka da raspusnych dziejańniaŭ i prasiŭ zrabić dla jaho zdymki nieprystojnaha charaktaru. Akramia taho, mužčyna nastojliva ŭhavorvaŭ školnika ab sustrečy sam-nasam u niefarmalnaj abstanoŭcy».

U vyniku mužčynu buduć sudzić pavodle cełaha bukietu raznastajnych artykułaŭ Kryminalnaha kodeksa. Heta i č. 6 art. 16, č. 3 art. 384 (dapamoha ŭ prymusie da vykanańnia damoŭnych abaviazacielstvaŭ i vypłacie doŭhu, pry adsutnaści prykmiet vymahalnictva, ździejśnienaja hrupaj asob pa papiaredniaj zmovie, z užyvańniem hvałtu, niebiaśpiečnaha dla žyćcia i zdaroŭja paciarpiełaha), i art. 186 (pahroza zabojstvam), i č. 3 art. 361 (publičnyja zakliki da źmieny kanstytucyjnaha ładu Biełarusi, ździajśnieńnia aktaŭ teraryzmu, dyviersij i dziejańniaŭ, nakiravanych na pryčynieńnie škody nacyjanalnaj biaśpieki), i č. 3 art. 361-1 (uvachodžańnie asoby ŭ skład ekstremisckaha farmiravańnia ŭ metach ździajśnieńnia złačynstva ekstremisckaj nakiravanaści), i č. 1 art. 343 (publičnaja demanstracyja parnahrafičnych materyjałaŭ), i č. 1 art. 169 KK (raspusnyja dziejańni, učynienyja ŭ dačynieńni da asoby, jakaja zahadzia nie dasiahnuła 16-hadovaha ŭzrostu).

A voś za toje samaje daŭniaje zabojstva pakul nie sudziać, spravu adkłali znoŭ.

Ciapier abvinavačany znachodzicca pad vartaj, a kryminalnaja sprava nakiravanaja ŭ Minski haradski sud.

• 0
• 0
• 2
• 6
• 3
• 0
• 1
• 0