U adpačynak na samalocie. Kudy i pačym možna palacieć ź Minska, Varšavy i Vilni
Siezon adpačynkaŭ u samym razhary, tamu my vyrašyli pahladzieć ceny na avijabilety.
Praz sankcyi, nakładzienyja paśla incydentu z pasadkaj samalota Raynair, biełarusy ŭžo bolš jak hod nie majuć mahčymaści lotać naŭprost ź Minska ŭ krainy Jeŭropy. Z pačatkam vajny situacyja tolki ŭskładniłasia, pakolki rasijskija aviakampanii taksama trapili pad sankcyi.
Na biahučy momant bieź pierasadki z Nacyjanalnaha aeraporta možna palacieć tolki ŭ 10 krain. Siarod ich jość siem krain, kudy možna adpravicca na mora.
Hruzija
Sioleta adnym z najbolš papularnych kirunkaŭ zastajecca Hruzija. Samaloty z Nacyjanalnaha aeraporta latajuć u Tbilisi, Batumi i Kutaisi. Ceny na kvitki da hruzinskaj stalicy pačynajucca ad 260 jeŭra. Minsk — Kutaisi — ad 340 jeŭra. Nabyć kvitki Minsk — Batumi možna nie raniej, čym na pačatak vieraśnia, ceny ad 260 jeŭra.
Turcyja
Aproč Hruzii, ź Minska jość štodzionnyja pramyja rejsy ŭ Turcyju. Kvitki da Stambuła kaštujuć ad 370 jeŭra, kali razhladać pieralot praz 3-4 tydni. Ceny na bolš rannija vylety pačynajucca z adznaki ŭ 570 jeŭra.
Azierbajdžan
Adpačynak na Kaśpijskim mory nielha nazvać papularnym kirunkam, ale tym nie mienš ź Minska jość štodzionnyja pramyja rejsy ŭ Baku. Kali nabyvać kvitki na kaniec žniŭnia ciapier, to pieralot ź Minska ŭ Baku i nazad budzie kaštavać kala 500 jeŭra. Kali lacieć u stalicu Azierbajdžana najbližejšy tydzień-dva, to varta raźličvać na kvitki pa 360-460 jeŭra ŭ kožny bok.
Kazachstan
Dla padarožža ŭ Kazachstan lepš abirać Ałmaty, adkul možna dabracca da voziera Issyk-Kul, Kapčahajskaha vodaschovišča ci voziera Bałchaš. Ceny na pramyja kvitki ź Minska startujuć z 310 jeŭra ŭ adzin bok.
AAE
Dvojčy na tydzień ź Minska lotajuć pramyja rejsy ŭ Dubaj. Ale bližejšyja kvitki bieź pierasadak na dastupnyja tolki na vierasień. Tamu dabiracca da AAE daviadziecca z adnoj pierasadkaj u Tbilisi ci Maskvie. Kvitki ekanom-kłasu kaštujuć ad 510 jeŭra ŭ adzin bok.
Jehipiet
Ź pierasadkaj u Stambule ci Maskvie, možna dalacieć da Jehipta. Praŭda, bližejšyja volnyja kvitki dasiažnyja tolki na druhuju pałovu vieraśnia. Kaštujuć jany ad 400 jeŭra ŭ adzin bok.
Rasija
Paśla ŭviadzieńnia ŭsich abmiežavańniaŭ kolkaść varyjantaŭ, kudy možna dalacieć ź Minska ŭ Rasiju, stabilna pavialičvajecca. Jość pramyja rejsy ź Minska da ŭźbiarežža Čornaha mora. Samaloty ź Minska ŭ Sočy lotajuć trojčy na tydzień. Ceny na bilety pačynajucca ad 150 jeŭra, kali hladzieć na druhuju pałovu žniŭnia. Na bolš rannija daty ceny ŭzrastajuć da 350 jeŭra.
Na hetym śpis krain, kudy možna adpravicca da mora naŭprost ź Minska, zakančvajecca. Značna bolš šyrokija pierśpiektyvy adkryvajucca pierad tymi, u kaho jość dziejnaja jeŭrapiejskaja viza. Paśla źniacca ŭsich kavidnych abmiežavańniaŭ biełarusy znoŭ mohuć lotać z Varšavy ci Vilni.
Ispanija
Za 300-400 jeŭra možna nabyć kvitki z Varšavy ŭ Małahu na bližejšyja tydni. Kali razhladać varyjanty ź pierasadkami, to vydatki mohuć skaracicca da 150-250 jeŭra.
Ceny na pieralot z Varšavy da Barsiełony — ad 200 jeŭra tudy-nazad. U kancy vieraśnia jość varyjanty za 130 jeŭra ŭ abodva baki. Uličycie, što samyja tannyja kvitki na łaŭkostach nie ŭklučajuć bahaž.
Lotajuć i pramyja rejsy ź Vilni ŭ Barsiełonu. Takoje padarožža abydziecca ŭ 350-500 jeŭra da kanca leta. U vieraśni možna adšukać varyjanty za 170 jeŭra tudy-nazad.
Charvatyja
Źlotać na adpačynak z Varšavy ŭ Dubroŭnik možna pa jašče bolš pryjemnych cenach. Kali ŭdała padabrać daty, to na kvitki bieź pierasadki ŭ abodva baki vykładziecie pa 150-200 jeŭra. Na kaniec žniŭnia — pačatak vieraśnia možna padabrać pieraloty łaŭkostami za 105 jeŭra.
Hrecyja
Za 160-300 jeŭra ŭ abodva baki pramymi rejsami z Varšavy možna dabracca i na hrečaskija marskija kurorty. U vieraśni jość tańniejšyja varyjanty.
Pramymi rejsami ź Vilni dalacicie da Afin, Korfu ci Santaryni. Bilety ŭ dva baki kaštujuć ad 200 jeŭra. U vieraśni jość maršruty i za 100 z chvościkam jeŭra tudy-nazad.
Atrymlivajecca, što ŭładalniki jeŭrapiejskich vizaŭ majuć mahčymaść dabiracca da raznastajnych jeŭrapiejskich kurortaŭ pa cenach, jaki ŭ siarednim u dva razy tańniejšyja za pieralot ź Minska. Jak bačym, u bolšaści vypadkaŭ pieralot da marskich kurortaŭ z Varšavy ci Vilni ŭ abodva baki kaštuje, jak kvitok ź Minska ŭ adzin bok.
Čytajcie taksama:
Biełaruskija turfirmy dahetul prapanujuć pajezdki ŭ Krym. Kolki biaruć?
Kavid zabraŭ u Biełarusi 90 tysiač žyćciaŭ, a nie 7 tysiač, jak śćviardžali ŭłady14
Kamientary
a u nas, kromie krasivoj prirody i krasivych ludiej) druhich bohatstv voobŝiem-to i niet