«Ździviŭ jon navat biehłuju apazicyju». Prapahanda nie prosta falšuje spravazdaču ICAO, a stvaraje paralelnuju realnaść
Biełaruskija ŭłady baluča začapiła spravazdača ICAO pa incydencie z samalotam Ryanair z Pratasievičam na borcie. Prapahanda stvaraje paralelnuju realnaść, kab biełarusy ničoha nie zrazumieli pa sutnaści vysnoŭ mižnarodnaha rasśledavańnia.
«Uzrovień abjektyŭnaści ŭ vysnovach, zdavałasia b, pavažanaj arhanizacyi, nabližajecca da nula — adznačajuć ekśpierty, jakija vyvučyli tezisy dakładu. Ździviŭ jon navat biehłuju apazicyju, u šerahach jakoj spravazdaču nazvali niepierakanaŭčaj», — śćviardžajecca ŭ prapahandysckim siužecie ANT.
Spačatku ŭ siužecie supraćpastaŭlajecca ciapierašniaja spravazdača ICAO spravazdačy, apublikavanaj u studzieni. Maŭlaŭ, tady, u studzieni «havaryłasia, što lotčyk samastojna vyrašyŭ lacieć u Minsk, pierachopu nie było, a Biełaruś staranna vykanała ŭsie nieabchodnyja pracedury».
Ale heta manipulacyja. Pa-pieršaje, pieršaja spravazdača była zaviedama zasnavanaja vyklučna na infarmacyi i źviestkach, jakija krainy (u tym liku Biełaruś) padali ŭ rasparadžeńnie ICAO, i ŭklučaje ŭ siabie ekspłuatacyjnyja padrabiaznaści, techničny analiz roznych mieraŭ i pryniatych rašeńniaŭ. Tam byŭ tolki pieralik faktaŭ i padziej dnia 23 maja 2021 hoda. Jana pa svajoj sutnaści nie praduhledžvała nijakich kančatkovych vysnovaŭ, a tym bolš apraŭdańniaŭ dziejańniaŭ biełaruskaha boku.
U toj spravazdačy havaryłasia, što piłotam nie ŭdałosia źviazacca sa svajoj kampanijaj, bo častata dla suviazi z aeraportam u Vilni «nie dabivała» — samalot byŭ zadaloka. U 09:34:49 piłoty paprasili Minsk dać častatu, jakaja «dabje», ale tyja dali tuju ž častatu. Kali b piłoty zmahli źviazacca ź Vilniaj, to pasadzili b samalot tam, a nie ŭ Minsku.
Dalej prapahandysty śćviardžajuć, što adzin z hałasoŭ na aŭdyjozapisie incydentu naležyć nie aficeru KDB, a Jaŭhienu Cyhanovu, kiraŭniku palotaŭ «Biełaeranavihacyi». Maŭlaŭ, jon davaŭ ukazańni dyśpietčaru. Prapahandysty śćviardžajuć, što niama nijakich dokazaŭ taho, što zapisany hołas aficera KDB.
«Zamiest dokazaŭ — śćviardžeńnie, cytata, što ŭłady Polščy i ZŠA praviali pracu. Jakuju — nie nazyvajecca», — havorycca ŭ siužecie. Ale i heta niapraŭda.
U jakaści dokazaŭ — pakazańni dyśpietčara Halehava polskim i amierykanskim śpiecsłužbam i sam zapis.
«U Polščy śćviardžali, što Halehaŭ vyrašyŭ zvolnicca i źbieh z krainy razam ź mihrantami ź Blizkaha Uschodu. Heta, darečy, taksama chłuśnia», — vykryvaje «chłuśniu» ANT.
Ale ŭ Polščy nie śćviardžali, što Halehaŭ źbieh z krainy razam ź mihrantami ź Blizkaha Uschodu. Z samaha pačatku było viadoma, što Halehaŭ źjechaŭ u Hruziju. Prapahandysty sami prydumali hetuju historyju, prypisali jaje inšym, a potym «vykryli», kab maksimalna zabłytać hledačoŭ.
Dalej prapahandysty źviartajuć uvahu na toje, što zvyčajna pasažyrskija rejsy pa maršrucie Afiny — Vilnia pačynali źnižeńnie zadoŭha da miažy, a voś u vypadku z «Rajnejram» takoha źnižeńnia nie było (samalot lacieŭ na poŭnaj chutkaści i maksimalnaj vyšyni). I z hetaha čamuści robiać vysnovu, što piłoty nibyta z samaha pačatku nie źbiralisia lacieć u Vilniu. Chacia absalutna łahična, što naadvarot: piłoty nie źnižali chutkaści, kab chutčej vylecieć ź biełaruskaj pavietranaj prastory.
«Samalot znachodziŭsia ŭ pavietry, a roznyja infarmacyjnyja resursy, jakija kantraluje polski ŭrad, užo trubili va ŭsiu, što zatrymany adzin z pasažyraŭ rejsa», — havorycca ŭ siužecie.
Znoŭ niapraŭda. Pieršyja paviedamleńni pra incydent u niezaležnych ŚMI źjavilisia ŭžo paśla pasadki łajniera. Pra toje, što na borcie byŭ Pratasievič, stała viadoma jašče paźniej. Kožny moža sam padniać infarmacyjnyja stužki taho dnia i pravieryć.
Incydentaŭ, kali samalot prymusova viaduć na pasadku, vyklikajuć bajavuju avijacyju, — dastatkova, kažuć prapahandysty. I zhadvajuć historyju z prymusovaj pasadkaj u 2013-m u Vienie samalota prezidenta Balivii. Na borcie šukali Edvarda Snoŭdena. Ale cikava, što sam Snoŭden adnaznačna asudziŭ dziejańni biełaruskich uładaŭ za incydent z Ryanair. Dy i Snoŭden — były rabotnik śpiecsłužb, śpiecyjalist pa infarmacyjnaj biaśpiecy, jaki vydaŭ dziaržaŭnyja sakrety publicy i parušyŭ zakon. Jon, u adroźnieńnie ad Pratasieviča, nie palityčny dysident, tamu situacyi zusim roznyja. I pry pasadcy nichto nie prydumlaŭ kazak pra bomby, pra listy Chamas: šukali kankretna Snoŭdena.
«U vypadku z padziejaj u niebie Biełarusi faktaŭ niama, dokazaŭ niama, śviedak niama, ale tendencyjnaje rašeńnie jość. Rasšyfroŭki niejkich pieramovaŭ chapiła», — kaža prapahanda, śviadoma stvarajučy paralelnuju realnaść.
Kamientary