Łukašysty adpravili hetaha ajcišnika na chimiju. A jon uciok i stvaryŭ startap pa pieravodzie tekstu ŭ aŭdyjo
Andrej Paźniak moh zaraz być na «chimii», jakuju jamu prysudzili ŭ lutym 2021-ha, ale mužčyna ŭciok ź Biełarusi va Ukrainu i pačaŭ pracavać nad svaim IT-prajektam. «Naša Niva» parazmaŭlała z chłopcam pra toje, jak paśpiachova realizavać startap, čamu inviestary hatovy ŭkładacca ŭ mabilnyja prahramy i ad čaho zaležyć pamier inviestycyj.
Andreju Paźniaku 30 hadoŭ. Jaho zatrymali ŭ žniŭni 2020-ha i vystavili abvinavačańni pa 342 artykule KK (arhanizacyja i padrychtoŭka dziejańniaŭ, jakija hruba parušajuć hramadski paradak). U SIZA №1 ajcišnika trymali paŭhoda, a ŭ lutym 2021-ha vynieśli prysud — 3 hady «chimii» z nakiravańniem va ŭstanovu adkrytaha typu.
Pakul nie adbyłasia apielacyja i prysud nie nabyŭ zakonnuju moc, Andrej byŭ u Minsku. U červieni minułaha hodu jon źjechaŭ va Ukrainu.
«U mianie zastałosia dva-try tydni da taho, jak mianie raźmiarkujuć i adpraviać krucić chvasty karovam. Naŭprost praź miažu, viadoma, vyjechać nie moh. Pryjšłosia jechać inšym šlacham», — kaža jon.
Pa słovach Andreja, adnaŭlacca jamu paśla SIZA nie pryjšłosia. Za kratami jon imknuŭsia zachavać fizičny i psichałahičny stan na dobrym uzroŭni.
«Čałaviek dosyć chutka da ŭsiaho pryvykaje. I ŭ cełym nastrojvaŭ siabie pazityŭna. Zajmalisia tam sportam, chadzili na prahułki, kab vočy adpačyvali ad śviatła ŭ kamiery, tam jano vielmi drennaje. Imknulisia vykonvać dyjetu, jeli toje, što ŭ pasyłkach pieradavali. Takim čynam zachavali siabie», — raskazvaje ajcišnik.
Pracavać u śfiery IT Andrej pačaŭ jašče na druhim kursie va ŭniviersitecie. Jon vučyŭsia ŭ BDUIR na fakultecie kampjutarnych sistem i sietak.
U Biełarusi Andrej pracavaŭ u aŭtsorsinhavych i praduktovych kampanijach.
«Apošniaje miesca, dzie ja byŭ da ŭsich padziej, — ISsoft Solutions. Potym pierajechaŭ va Ukrainu i pačaŭ zajmacca tolki svaim prajektam, nidzie nie pracavaŭ», — kaža jon.
Ciapier mužčyna žyvie ŭ Polščy. Pierajechaŭ jon tudy z Ukrainy ŭ listapadzie minułaha hoda.
«Tut, mabyć, mnie paščaściła. Jašče da vajny», — dzielicca jon.
Na pytańnie ab tym, jak dasiahnuć pośpiechu ŭ IT, Andrej adkazvaje, što ŭ hetaj śfiery «kłasnyja ŭmovy i jakasnaja publika, kab pracavać, raści pa karjery».
«Dla kahości pośpiech — heta kali jość dobraja pasada, jana narmalna apłačvajecca i ŭvohule cikava. Ale ŭ hetaj śfiery ŭvieś čas treba zajmacca samaraźvićciom, prachodzić roznyja navučańni.
Mnie zdajecca, što pośpiech u IT — heta kali ty zmoh pabudavać prybytkovuju kampaniju, jakaja robić žyćcio ludziej krychu praściejšym za košt jakaści pradukta.
U Biełarusi pačynajučy z 2020-ha IT amal zabili. Usie namahańni našych ludziej pa ŭźniaćci reputacyi krainy ŭ mižnarodnaj supolnaści byli pierakreśleny litaralna za niekalki dzion.
Usio stała značna horš paśla pačatku vajny. My majem šmat kampanij, jakija pracujuć na zachodni rynak, naprykład, na Paŭnočnuju Amieryku. Heta dobra, tamu što jon bolš płaciežazdolny. Ale ŭ šmatlikich bujnych karparacyjach paśla 24 lutaha šmat u čym pamianialisia praviły. Ciapier kampanii jurydyčna nie majuć prava pracavać z kamandami ź Biełarusi.
Tamu ŭsie zaraz vymušany terminova rełakavać supracoŭnikaŭ, što vielmi zatratna. Plus u Jeŭropie hetym ludziam treba płacić zarobak značna vyšej.
Sama śfiera ŭ Biełarusi nie moža pracavać. Ni aŭtsorsinhavaja, ni praduktovaja kampanii. Nijakamu inviestaru navat u samych vilhotnych snach nie pryjdzie ŭ hałavu ŭkłaści hrošy ŭ Biełarusi, tamu što ludziej prosta sadžajuć. U płanie rostu i pierśpiektyŭ u IT tut zaraz navat nie nul, a minus», — razvažaje Andrej.
Nad mabilnaj prahramaj Peech mužčyna pačaŭ pracavać paśla taho, jak źjechaŭ z krainy. Jano pieraŭtvaraje adskanavany ci zahružany tekst u aŭdyja.
«U mianie nasamreč samy standartny startap i zvyčajnyja inviestycyi na jaho — 550 tysiač dalaraŭ, — raskazvaje jon. —Dla taho, kab atrymałasia, patrebnaja dobraja ideja i kamanda (u mianie ŭ joj 10 čałaviek). Potym vy idziacie ŭ roznyja fondy da inviestaraŭ i damaŭlajeciesia ź imi ab finansavaj padtrymcy dla dalejšaha rostu. Ničoha tut niezvyčajnaha niama.
U cełym ideja z hetaj prahramaj niadrennaja. Rola spažyvańnia aŭdyjakantentu ŭ śviecie raście. Dola aŭdyjaknih, podkastaŭ vialikaja. Mnohija ludzi, nie viedaju na ščaście ci na žal, pačynajuć słuchać zamiest taho, kab čytać. Navat ja karystajusia svaim praduktam, kab słuchać niejkija vialikija artykuły, na jakija ŭ mianie nie chapiła času. Jość popyt na takuju pasłuhu».
Pierad tym jak pryciahnuć inviestycyi, Andrej pravioŭ markietynhavyja testy.
«Hladzieli, kolki karystalnikaŭ nam moža prynieści hrošaj, bačyli, što schiema pracoŭnaja.
Sam pamier inviestycyj zaležyć ad stadyi, na jakoj znachodzicca prajekt. Byvajuć startapy, jakija pryciahvajuć inviestycyi jašče na stadyi kanceptu. U nas užo byŭ paŭnavartasny pradukt, naładžany prodaž. Ale mahu skazać, što kali b my, naprykład, byli ŭ ZŠA, to tam atrymali b 2—3 miljony dalaraŭ. U Jeŭropie na startapy dajuć mienš», — kaža jon.
Inviestary nie škadujuć hrošaj na mabilnyja prahramy, tamu što ciapier va ŭsim śviecie ludzi bolš karystajucca telefonam, čym kampjutaram.
«Štohod raście kolkaść hrošaj, jakija karystalniki traciać praz mabilnyja płatformy. Lubomu dobramu praduktu zaraz treba mabilnaja prahrama. Nie dumaju, što, naprykład, čałaviek pojdzie ŭ bank adkryvać rachunak, kali ŭ ich niama narmalnaj mabilnaj prahramy», — tłumačyć startapier.
Ideja dla raspracoŭki takoj prahramy pryjšła Andreju, kali jon razmaŭlaŭ sa svaim siabram. Jany abmiarkoŭvali, što ŭ ich braŭzierach šmat niezačynienych układak.
«Mnohija ź ich visiać pa paŭhoda, tamu što niama kali pračytać. Vyrašyli, što aŭdyja — heta adzin ź vidavočnych sposabaŭ palehčyć hetuju spravu. Zvyčajna słuchaju štości, kali jedu ŭ mašynie ci padčas viačerniaj prabiežki. Moj siabar — kali duš prymaje. Ideja naradziłasia, sychodziačy z našych patreb», — raskazvaje ajcišnik.
Ceny na prahramu Andrej sa svajoj kamandaj zaraz testuje.
«Niedzie ludzi hatovy płacić bolš, niedzie mienš. U ZŠA, naprykład, karystańnie na tydzień kaštuje 3 dalary, miesiac — 15, kvartał — 30, hod — 90 dalaraŭ. U nas katehoryja dastatkova darahich prahram», — tłumačyć jon.
Ahučka na biełaruskaj movie pakul što nie pracuje. Andrej kaža, što heta składana zrabić.
«Kab navučyć niejronavuju sietku dobra ahučvać tekst, treba joj skarmić šmat kantentu na biełaruskaj movie, kab jana razumieła, jak heta ŭsio čytajecca.
Z-za taho, što biełaruskamoŭny rynak dastatkova maleńki, pakul heta niaprosta zrabić. Spadziajusia, što ŭ budučyni my heta zmožam realizavać.
Inviestycyi, jakija zaraz atrymali, pojduć na palapšeńnie jakaści pradukta i rost, budziem šmat układvać u markietynh, teściravać roznyja kanały pa pryciahnieńni karystalnikaŭ. Heta važna, ale i dastatkova doraha.
Uvieś svoj čas ja zaraz pryśviačaju hetamu prajektu. Dumak nakont niejkich novych startapaŭ šmat, ale nam pakul treba skancentravacca. Kali hety prajekt vyjdzie na surjoznuju akuplalnaść, možna budzie realizoŭvać niešta novaje», — dzielicca płanami Andrej.
Čytajcie taksama:
Pres-sakratara «A1» Mikałaja Bredzieleva pačnuć sudzić u kancy žniŭnia
Mastak paprasiŭ štučny intelekt namalavać hierby haradoŭ Biełarusi ŭ styli fentezi. Voś što atrymałasia
Mikita Mikada raskazaŭ, jak PandaDoc syšoŭ z PVT, i nazvaŭ kampanii, jakija istotna źmianili IT u Biełarusi
Ci zdaść Tramp Ukrainu Rasii? Čamu demakraty razhromlenyja? Da čaho pryviadzie kantrol respublikancaŭ nad vykanaŭčaj i zakanadaŭčaj uładaj adnačasova?8282
Kamientary