Biełaruś naviedaŭ amierykanski błohier na «łambardžyni». Polskija pamiežniki prapanoŭvali jamu raźviarnucca
Amierykaniec vykazaŭsia pra Mak.by i damy ŭ Baranavičach.
Aŭtar błoha Camperghini — amierykaniec pa imieni Konar — ładzić kruhaśvietnaje padarožža. Jon zvolniŭsia z pracy i pradaŭ usio, što mieŭ, dziela taho, kab nabyć Lamborghini Urus, zrabić jaho prydatnym dla žyćcia i padarožža pa śviecie.
Sa Štataŭ u Jeŭropu mašynu dastavili hruzavym samalotam, jaki dastaviŭ Lamborghini u Hiermaniju.
Šykoŭnaje aŭto jon kupiŭ viasnoju 2023 hoda, a zimoju 2025-ha ŭžo paśpieŭ dabracca da Biełarusi. Naša kraina stała 31-j u maršrucie amierykanca.
Na biełaruska-polskaj miažy błohier prastajaŭ 7 hadzin. Jon nazvaŭ jaje miažoj pamiž Zachadam i Uschodam. Chłopiec adznačyŭ, što polskija pahraničniki papiaredzili jaho, što jašče nie pozna viarnucca.
U Breście amierykaniec naviedaŭ Bresckuju krepaść. A znachodziačysia pobač z Mak.by, pažartavaŭ, što tak vyhladaje padsankcyjny McDonald's.
Pa darozie ŭ Minsk jon prajechaŭsia praz Baranavičy. Novyja mikrarajony z typovymi dla našaj krainy šmatpaviarchovikami amierykaniec nazvaŭ zabudovaj u savieckim styli.
Na biełaruskaj zapraŭcy błohiera sa Štataŭ cikaviła pytańnie, ci nie razbaŭlajuć na našych AZS paliva i ci možna być upeŭnienym, što pad markaj AI-98 budzie mienavita taki bienzin.
U Minsku amierykaniec nočyŭ na parkoŭcy niepadalok ad Nacyjanalnaj biblijateki. Na śniadanak jon smažyŭ sabie jaječniu, a paśla sa ździŭleńniem naziraŭ za tym, jak ludzi katajucca na kańkach pa Śvisłačy.
Naturalna, što ŭ kulturnuju prahramu amierykanca ŭvachodziła ekskursija ŭ samu biblijateku i na ahladalnuju placoŭku.
Taksama padčas padarožža pa Biełarusi Konar sustreŭsia z aŭtaamatarami z kłuba VagBelarus, jakija padaryli jamu svaju kłubnuju nalepku.
A taksama paśpieŭ paradavać biełaruskich dziaciej, jakich puściŭ za styrno mašyny i dazvoliŭ im pahazavać.
Paśla Biełarusi Konar płanuje naviedać Rasiju, a potym adpravicca ŭ Kazachstan. Pa ŭsioj bačnaści amierykaniec nie aścierahajecca naviedvać krainy z aŭtarytarnymi režymami.
U śniežni 2024 hoda jon užo byŭ u Prydniastroŭi, a ŭ adnym ź intervju Konar pryznaŭsia, što chacieŭ by trapić na svajoj Lamborghini Urus u Paŭnočnuju Kareju.
U instahramie za kruhaśvietnym padarožžam Konara sočać 65 tysiač čałaviek i amal 11 tysiač padpisčykaŭ u jutubie.
Ciapier čytajuć
«Pračytajcie jaje historyju». Łukašenku daviałosia apraŭdvacca pierad Pucinym za hieorhijeŭskija stužki10
Kamientary
"Automobili Lamborghini S.p.A. (itał: Lamborghini — [lamborˈɡiːni] — Łamborhíni[7])"