«Davajcie razmaŭlać». Łukašenka namiaknuŭ na žadańnie adnavić kantakty z Zachadam

«Palaki, inšyja ŭnosiać nam užo prapanovy: «davajcie razmaŭlać». Dobra, davajcie. Ale pakul u MZS jašče ŭ nas tak — z nahi na nahu pierastupajuć», — zajaviŭ Alaksandr Łukašenka.

Što aznačaje hetaja zajava, zroblenaja padčas praciahłaj narady? U minułym takija zajavy nie raz rabilisia, kali Minsk chacieŭ prademanstravać Zachadu hatoŭnaść da pieramovaŭ i kantaktaŭ. 

Hety pryjom — nazaviom jaho paviartańniem kata chvastom — charakterny dla palityčnaha stylu Alaksandra Łukašenki.

Źniščalnyja nastupstvy dla biełaruskaha biudžetu majuć jak zabarona Jeŭrasajuza na transpartavańnie biełaruskaha kaliju, tak i strata ŭkrainskaha rynku ŭ vyniku napadu na Ukrainu Rasii. Pavodle aficyjnych danych, padzieńnie VUP Biełarusi skłała kala 9% u mai i 8% u červieni hetaha hoda.

Aficyjnaje ahienctva BiełTA daje takija cytaty z zajaŭ Alaksandra Łukašenki. 

«Kiraŭnik dziaržavy nazvaŭ niapravilnaj pastanoŭku pytańnia i rytoryku ab tym, što zamiest niesiabroŭskich krain zaraz Biełaruś budzie pracavać vyklučna ź siabroŭskimi. «Nam ni ŭ jakim razie nielha sychodzić ź Jeŭrasajuza. Heta naš bližejšy susied. My pałovu tam, pa-mojmu, pracavali pa eksparcie, — skazaŭ Alaksandr Łukašenka. — Ź imi treba pracavać. Šalenstva palitykaŭ užo adychodzić na zadni płan. Biznes jość biznesam».



I taksama:

«Ale aktyvizavać supracoŭnictva treba imknucca i z tak zvanymi niesiabroŭskimi krainami. «Ničoha nie treba adkidać. Z usimi krainami treba vieści dyjałoh. Sankcyi rana ci pozna adyduć. I hetyja dzikija adnosiny, jakija ŭ nas isnujuć z Zachadam, taksama adyduć u niabyt. Nielha hublać hetyja rynki. Bo potym budziem hieraična na ich viartacca».

Tyja samyja ŭryŭki byli pakinutyja i ŭ videaviersii:

Pikantnaści dadaje toj fakt, što narada adbyłasia 9 žniŭnia 2022 hoda, roŭna praz dva hady paśla sfalsifikavanych vybaraŭ 2020 hoda, jakija vyklikali masavyja pratesty, dla zdušeńnia jakich pačalisia takija ž masavyja represii.

Zajavy Alaksandra Łukašenki prahučali na fonie kontrnastupalnych dziejańniaŭ ukrainskaj armii na paŭdniovym froncie.

Nahadajem, što paśla pravału sproby zachopu Kijeva i adstupleńnia rasijskich vojskaŭ z poŭnačy Ukrainy Uładzimir Makiej 6 krasavika nakiravaŭ krainam Jeŭrasajuza list, u jakim zaklikaŭ da adnaŭleńnia dyjałohu. 

Makiej abiacaŭ, što «Biełaruś nie budzie ŭciahnutaja ŭ vajnu». I prapanoŭvaŭ: «Davajcie vykarystajem dypłamatyčny instrumientaryj, kab adnavić dyjałoh, jaki jość adzinym sposabam, kab znajści darohu napierad u lubych abstavinach».

Makiej u svaim liście adznačaŭ, što i raniej Biełaruś i ES prachodzili roznyja pieryjady ŭ svaich uzajemaadnosinach. Ale pry hetym zmahli dasiahnuć mnohaha, asabliva ŭ 2016—2019 hadach: raźvivałasia handlovaje supracoŭnictva, byŭ asłableny vizavy režym, pracavali transhraničnyja prahramy i inšaje.

«Niaŭžo ŭsie hetyja ŭzajemnyja dasiahnieńni ŭ minułym?» — pytaŭsia Makiej. «Nieščaślivaja čarada padziej, što adbyłasia z 2020 hoda, viarnuła Biełaruś i ES praktyčna ŭ «lednikovy pieryjad», — pisaŭ jon, dadajučy, što na miažy pamiž nami vyrasła novaja «Bierlinskaja ściana».

List vyhladaŭ jak prapanova Jeŭropie ŭciahnucca ŭ novy dyjałoh. U samim liście ničoha nie havaryłasia pra toje, ci zastanucca rasijskija vojski na terytoryi Biełarusi i ci buduć vyzvalenyja i reabilitavanyja tysiačy palitźniavolenych. Tamu jeŭrapiejcy pakinuli list biez adkazu i prosta pieradali jaho ŭ ŚMI.

Ci budzie adkaz Zachadu na novuju sprobu Alaksandra Łukašenki adnavić kantakty, moža zaležać ad taho, na jakija kroki łukašenkaŭcy hatovyja pajści.

Pakul Rasija praciahvaje vykarystoŭvać terytoryju Biełarusi ŭ vajennych metach. Represii ŭ krainie praciahvajucca ŭ tych ža maštabach, u tym liku i katavańni palitviaźniaŭ u turmach. Raspalvańnie varožaści da Zachadu ŭ cełym i susiednich krain u pryvatnaści taksama nie spyniajecca. 

• 6
• 0
• 101
• 15
• 8
• 3
• 30
• 0