U Homieli školnikaŭ trymali 1,5 hadziny na vulicy, kab jany pahladzieli saviecki vajenny film. Tempieratura — 7 hradusaŭ
Prydumanuju čynoŭnikami inicyjatyvu vykonvali navat niahledziačy na niespryjalnaje nadvorje.
Miascovaja siaredniaja škoła № 42 zładziła da Dnia Pieramohi kinapakaz pad hołym niebam. Praviadzieńniem patryjatyčnaha mierapryjemstva pachvaliłasia vydańnie «Homielskije viedomosti».
Uviečary na naciahnuty na tarec budynka škoły ekran prajektar tranślavaŭ saviecki film «U boj iduć adny staryja». Film vyjšaŭ na ekrany ŭ 1974 hodzie, abo bolš jak 50 hadoŭ tamu.
Možna tolki ŭjavić, jakuju cikaŭnaść da temy vajny mahła vyklikać u školnikaŭ, pryciahnutych da jaje prahladu, čorna-biełaja savieckaja stužka, uzrost jakoj pieravyšaje navat uzrost ichnich baćkoŭ.
Da taho ž prahlad byŭ nie samym kamfortnym — praz anamalnaje chałodnaje dla pačatku maja nadvorje, tempieratura pavietra ŭ Homieli ŭviečary vychadnych nie pieravyšała 9 hradusaŭ, a ŭčora — 7 hradusaŭ. Tempieratura nie minusavaja, ale zusim niekamfortnaja dla taho, kab siadzieć biez ruchu na vulicy. Hledačy chutalisia ŭ kurtki i nasoŭvali kapiušony na hałavu. Siadzieć treba było doŭha, bo film doŭžycca 90 chvilin.
«Viečar skončyŭsia, ale tema vajny, pradstaŭlenaja na ekranie, jašče doŭha hučała ŭ sercach hledačoŭ. I heta značyć, što meta mierapryjemstva była dasiahnuta: pamiać pra hierojaŭ žyvaja, i jana budzie pieradavacca z pakaleńnia ŭ pakaleńnie», — pafasna padsumoŭvaje vydańnie.
Nijakaj prablemy ŭ tym, kab pakazać toj ža film dla ŭsich achvotnych, naprykład, u aktavaj zale škoły, a nie marozić ludziej na vulicy, nie było. Ideja kinapakazu pad hołym niebam, vidać, zaradziłasia ŭ nietrach kabinietaŭ ideołahaŭ, bo ŭviečary 8 maja ŭ skviery imia Hramyki ŭžo pakazvali chity savieckaha kino, a aficyjny telehram-kanał staršyni harvykanama Uładzimira Pryvałava publikavaŭ fotazdymki hledačoŭ studenckaha ŭzrostu, jakija čysta vypadkova zachapili z saboj ciopłyja pledy.
Ideja kinapakazaŭ pad hołym niebam sama pa sabie nie błahaja, ale ŭ biełaruskich realijach prymaje dziŭnyja formy. Zahady, spuščanyja čynoŭnikami padniavolnym biudžetnikam, musiać vykonvacca, navat kali ich vykanańnie vyhladaje kamična.
Ciapier čytajuć
Što zdaryłasia ź Mikitam Miełkazioravym, jaki raptoŭna pamior nočču?31
Kamientary