Amierykanskija čynoŭniki raspaviali, jak ZŠA sprabavali pierakanać Pucina nie napadać na Ukrainu
Raźviedka ZŠA daviedałasia pra płany Uładzimira Pucina pačać poŭnamaštabnuju vajnu va Ukrainie jašče ŭ kastryčniku, piša The Washington Post. Vydańnie apublikavała vialikaje rasśledavańnie, zasnavanaje na śviedčańniach amierykanskich čynoŭnikaŭ. U artykule raspaviadajecca, jak Bieły dom sprabavaŭ uhavaryć kiraŭnictva Rasii nie pačynać vajnu, na što atrymlivaŭ abciakalnyja adkazy i patrabavańni zharnuć dziejnaść NATA ŭ krainach Uschodniaj Jeŭropy.
Pavodle źviestak śpikieraŭ vydańnia, u vyniku ściahvańnia rasijskich vojskaŭ da ŭkrainskich miežaŭ u kastryčniku ŭ Biełym domie adbyłasia terminovaja narada z udziełam Džo Bajdena. Tam prezident ZŠA zasłuchaŭ dakład raźviedki ab tym, što zimoj 2022 pačniecca nastup rasijskich vojskaŭ na Ukrainu.
Bajdenu dałažyli, što pieršy asnoŭny ŭdar budzie naniesieny pa Kijevie — vojski buduć ruchacca z poŭnačy. Zimovy čas budzie vybrany z-za bałocistaj hleby na Paleśsi, u pryvatnaści — u rajonie Čarnobylskaj zony adčužeńnia. Taksama nastup budzie ź i tak zaniataha rasijskimi vojskami uschodu Ukrainy i poŭdnia — z terytoryi Kryma. Dakład zasnoŭvaŭsia na spadarožnikavych zdymkach, pierachoplenych pieramovach i źviestkach ad krynic u palityčnym kiraŭnictvie RF, Uzbrojenych siłach i rasijskaj raźviedcy. Za 3-4 dni rasijski śpiecnaz pavinien byŭ znajści i skinuć Uładzimira Zialenskaha, zabiŭšy jaho, kali spatrebicca, a taksama ŭstalavać maryjanietkavy ŭrad.
Pa vynikach dakłada Bajden pryniaŭ rašeńnie nakiravać kahości z amierykanskaha kiraŭnictva ŭ Maskvu, kab papiaredzić ab nastupstvach takoha ŭvarvańnia. Užo na pačatku listapada na pieramovy ŭ stalicu Rasii adpraviŭsia dyrektar CRU i były pasoł ZŠA ŭ Maskvie Uiljam Bierns. U Maskvie ŭ jaho adbyłasia sustreča z pamočnikam Pucina pa zamiežnapalityčnych pytańniach Juryjem Ušakovym. Pry razmovie pa telefonie prysutničaŭ i sam Pucin. Jon znoŭ zajaviŭ ab niedapuščalnaści pašyreńnia NATA. Pa słovach Biernsa, Pucin nie admaŭlaŭ płanaŭ pa ŭvarvańni va Ukrainu.
Taksama Bierns sustreŭsia z sakratarom Rady Biaśpieki Mikałajem Patrušavym, jaki, sa słoŭ kiraŭnika amierykanskaha raźviedvalnaha viedamstva, byŭ nibyta ździŭleny infarmacyi ab budučym napadzie Rasii na Ukrainu. Pry hetym jon dakładna paŭtaryŭ słovy Pucina ab niedapuščalnaści pašyreńnia NATA, što jašče bolš naściarožyła Biernsa.
21 studzienia ŭ Ženievie prajšli pieramovy dziaržsakratara ZŠA Entani Blinkiena i kiraŭnika MZS Rasii Siarhieja Łaŭrova, padčas jakich Blinkien, zastaŭšysia sam-nasam z Łaŭrovym, spytaŭ: sapraŭdy hałoŭnaj pretenzijaj Pucina źjaŭlajecca pašyreńnie NATA ŭ krainach Uschodniaj Jeŭropy, ci ž na samaj spravie prezidentam Rasii ruchaje «amal relihijnaja viera ŭ toje, što Ukraina zaŭsiody była častkaj Rasii». Łaŭroŭ pakinuŭ pytańnie biez adkazu.
Charakternaja sustreča adbyłasia taksama 11 lutaha — za 12 dzion da pačatku vajny. U Maskvu parazmaŭlać z kiraŭnikom Minabarony Siarhiejem Šajhu prylacieŭ ministr abarony Vialikabrytanii Ben Uoles. Apošni papiaredziŭ Šajhu, što ŭ vypadku ŭvarvańnia va Ukrainu Rasija sutykniecca z žorstkim supracivam ukraincaŭ. U adkaz Šajhu zajaviŭ: «Maja maci ŭkrainka. Heta ŭsio častka adnoj krainy». Na papiaredžańnie pra mahutnyja sankcyi kiraŭnik rasijskaha Minabarony skazaŭ: «My možam pakutavać, jak nichto inšy».
Ciapier čytajuć
«Ja jechała ad vajny i bambiožak»: Jaŭhienija Čarniaŭskaja pra pierajezd na Kipr8
Kamientary