Amierykanski navukoviec usumniŭsia ŭ praŭdzivaści historyi pra samahubstva Hitlera. Dośledy pakazali, što čerap nasamreč žanočy.
Skivica j frahmient pradziraŭlenaha čerapa, jaki prypisvajuć Hitleru, zachoŭvajucca ŭ fiederalnym archivie Rasii. Navukoviec Nik Biełatoni vyvučaŭ DNK čerapa i ŭ Rasii, i ŭ Kaniektykuckim univiersitecie dy pryjšoŭ da vysnovy, što jon naležaŭ žančynie ŭ vieku da 40 hadoŭ.
Mierkavańnie, što čerap u takim razie moh naležać Jevie Braŭn, spadarožnicy Hitlera, jon taksama adprečvaje — jana, jak viadoma, atruciłasia cyjanistym kalijem.
Adkryćcio navukoŭca ŭžo lahło ŭ asnovu filma «Vyratavańnie Hitlera» na papularnym kanale «History» j raźlaciełasia pa staronkach haziet.
Dahetul ličyłasia, što Hitler i Jeva Braŭn skončyli žyćcio samahubstvam 30 krasavika 1945 hoda. Tady sama ich cieły spalili prosta la bunkiera, dzie jany chavalisia. 5 traŭnia pareštki znajšli savieckija słužbisty. Asistentka zubnoha lekara Hitlera paćvierdziła padabienstva zubnych pratezaŭ da Hitleravych, ale paśla vyzvaleńnia z savieckich łahieraŭ admoviłasia ad svaich słoŭ. U 1946-m pareštki Hitlera i Jevy Braŭn zakapali na bazie NKUS u Mahdeburhu. U 1970-m, pierad pieradačaj bazy HDR, pareštki vykapali, kremiravali j popieł vykinuli ŭ Elbu. Usio, što zastałosia, — zhadanyja skivica j frahmient čerapa, dyj toj znajšli asobna ad cieła.
Zvažajučy na hetkija abstaviny, teoryja zmovy nikoli nie traciła svaich prychilnikaŭ. Adny mierkavali, što Hitler uciok na svaim samalocie, inšyja — što na padłodcy, adny — što ŭ Afryku, inšyja — što ŭ Arhientynu.
