Rasijanie skuplajuć kvitki na avijarejsy. Ekanamisty kažuć pra novuju chvalu emihracyi
Jašče ŭčora, kali čakaŭsia vystup prezidenta RF, rasijanie stali huhlić, «jak źjechać z Rasii». Siońnia jany raskupili avijakvitki na najbližejšyja dni.
Niahledziačy na toje, što Pucin abviaściŭ «častkovuju» mabilizacyju, rasijanie kinulisia skuplać avijabilety tudy, kudy jašče mohuć ulacieć. Paśla ŭviadzieńnia sankcyj praz vajnu va Ukrainie mahčymaściej u ich zastałosia nie tak i šmat.
Samyja papularnyja nakirunki — Biełaruś, Armienija, Azierbajdžan, Sierbija, Turcyja, Hruzija i Kazachstan.
Kvitki na najbližejšyja paru dzion pa hetych napramkach raskuplenyja, na piatnicu, 23 vieraśnia, kvitki časta kaštujuć ad tysiačy dalaraŭ.
Jašče niadaŭna rasijanie mahli vyjechać u krainy «šenhiena» na mašynie ci aŭtobusie (Jeŭrasajuz zakryŭ nieba dla rasijskich samalotaŭ z-za vajny va Ukrainie), ale z 19 vieraśnia Litva, Łatvija i Estonija pierastali puskać hramadzian RF z turystyčnymi vizami.
Zastajecca mahčymaść vylecieć praź Biełaruś. Na zaŭtra i piatnicu možna kupić kvitok z Maskvy ŭ Minsk za 1922 biełaruskija rubli. Heta biez bahažu.
Paśla zvarotu Pucina nie było aficyjnych zajavaŭ pra jakija-niebudź zabarony na vyjezd z Rasii, źviazanyja z «častkovaj mabilizacyjaj». Ale takaja mahčymaść nie vyklučanaja. U artykule 21 zakona «ab mabilizacyjnaj padrychtoŭcy i mabilizacyi» skazana, što «hramadzianam, jakija stajać na vajskovym uliku, z momantu abviaščeńnia mabilizacyi zabaraniajecca vyjezd ź miesca žycharstva biez dazvołu vajennych kamisaryjataŭ, fiederalnych orhanaŭ vykanaŭčaj ułady».
Ekanamisty miarkujuć, što praz mabilizacyju emihracyja z Rasii pavialičycca i moža pieravysić viasnovuju chvalu. Ucioki kvalifikavanych, vysokaapłatnych kadraŭ z Rasii mohuć mieć bolšy ŭpłyŭ na ekanomiku, čym sama pa sabie mabilizacyja — pavodle płanaŭ uładaŭ, u 300 tysiač čałaviek.
Kamientary