Hałoŭny kamiendant polskaj palicyi, u štabie jakoj vybuchnuŭ ukrainski padarunak, raskazaŭ, što było

«Kali ja pierastaŭlaŭ hranatamioty, jakija byli padarunkami ad ukraincaŭ, adbyŭsia vybuch», — kaža hienierał Jarasłaŭ Šymčyk. 

Jak stała viadoma žurnalistam RMF FM ad člena polskaj delehacyi, hienierał Jarasłaŭ Šymčyk atrymaŭ va Ukrainie dva supraćtankavyja hranatamioty (vierahodna, RGW-90), jakija, jak śćviardžali ŭkraincy, pavinny byli być niaspraŭnymi.

Pieršy padarunak pastupiŭ ad hałoŭnaha načalnika Nacyjanalnaj palicyi Ukrainy Ihara Kłymienki. Heta byŭ adpracavany supraćtankavy hranatamiot, ź jakoha abstrelvali rasijskija tanki. Pa vonkavym vyhladzie jon nahadvaje doŭhuju trubku. Jaho pierarabili ŭ hučnahavaryciel. Ihar Kłymienka navat pakazvaŭ jaho ŭ «muzyčnym» dziejańni. Ukraincy zapeŭnivali, što vybuchovych rečyvaŭ tam niama.

Paźniej polskija palicyjanty sustrelisia jašče z kiraŭnikom Dziaržaŭnaj słužby Ukrainy pa nadzvyčajnych situacyjach hienierałam Siarhiejem Krukom. Paśla sustrečy jaho namieśnik Dźmitryj Bondar pravioŭ ich pa zale, dzie byli sabranyja pradmiety, jakija padčas bajoŭ niejtralizavali — snarady, miny.

Narešcie, raźvitvajučysia, hienierał Bondar taksama padaryŭ hienierału Šymčyku padarunak — identyčny hranatamiot. Hety, praŭda, nie byŭ pierarobleny ŭ hučnahavaryciel, ale ŭkraincy zapeŭnili, što hranatamiot adpracavany i biaśpiečny.

Kiraŭnik polskaj palicyi paviedamiŭ, što na nastupny dzień paśla viartańnia jon chacieŭ pieranieści padarunki ad ukraincaŭ. U toj momant, kali jon pierastaviŭ viertykalna na padłozie adzin z hranatamiotaŭ, litaralna praź siekundu adbyŭsia vybuch.

Vybuch byŭ mahutnym — siła ŭdaru prabiła padłohu, a z druhoha boku paškodziła stol.

Infarmacyja ab vybuchu była pieradadziena nie adrazu, a tolki praź dzień, praz bolš čym 30 hadzin.

Adrazu paśla vybuchu, jak vyznačyli žurnalisty, na miesca prybyli pažarnyja i chutkaja dapamoha. Ratavalniki pieraviazali paranienaha kamiendanta i dastavili ŭ balnicu. Hienierał Šymčyk byŭ ćviarozy.

Heta było samazaharańnie? Vajennyja ekśpierty śćviardžajuć, što taki hranatamiot nie moh strelić sam pa sabie — kali tolki jon nie byŭ paškodžany i padčas pierastanoŭki adbyŭsia vybuch. Ale mahčymaja i viersija, što hałoŭny kamiendant palicyi moh nacisnuć niejki elemient hranatamiota, jaki nie praviarali.

Ciapier śledčyja praviarajuć usie abstaviny zdareńnia. Ekśpierty vyśviatlajuć, jak było mahčyma, što ŭ padarunku była vybuchoŭka i jak moh adbycca vybuch.

Razbureńni paśla vybuchu byli na troch pavierchach budynka. U asnoŭnym havorka idzie pra praboiny ŭ padłozie. Akramia hetych paškodžańniaŭ, niama surjoznych strat. Škło z voknaŭ nie vypała, uzharańnia taksama nie było.

Pamiaškańni Hałoŭnaha ŭpraŭleńnia palicyi, paškodžanyja ŭ vyniku vybuchu, užo viernutyja ŭ ekspłuatacyju.

• 3
• 0
• 15
• 39
• 11
• 9
• 2
• 0