Top sieryjałaŭ ad žurnalistaŭ «Našaj Nivy». Niekatoryja ź ich dakładna stanuć adkryćciom dla vas

Heta subjektyŭnaja padborka roznaha pa žanry kino. Tut jość jak novyja prajekty, tak i sieryjalnaja kłasika.

Dla zručnaści my raździalili ŭsie na piać katehoryj:

• dramy
• sitkamy
• fantastyka i fentezi
• kryminał i detektyvy
• supierhieroi i mifičnyja istoty.

Dramy

«Va ŭsie ciažkija» (Breaking Bad)

Kruty sieryjał pra hienijalnaha nastaŭnika chimii, jaki praz svaju finansavuju niepaśpiachovaść i rak kidajecca va ŭsie ciažkija i pačynaje varyć miet razam ź biazdarnym studentam, jaki siadzić na narkacie sam i sprabuje baryžyć. Kali šmat jakija sieryjały nadakučvajuć paśla pieršaj pary siezonaŭ, to tut usio naadvarot: čym dalej, tym cikaviej. A apošni siezon — sapraŭdny razryŭ, kali na konie staić usio, a abliččy hierojaŭ paradaksalnym čynam mianiajucca i stanovicca jasna, dla kaho što nasamreč było važna. 

«Faŭda» (iŭr. פאודה, ad arab. فوو — «chaos» )

Izrailski sieryjał pra hrupu bajcoŭ kontrterarystyčnaha śpiecpadraździaleńnia Armii abarony Izraila, jakija pracujuć pad prykryćciom dy supraćstajać CHAMAS i inšym terarystyčnym hrupoŭkam. 

«Fors-mažory» (The Suits)

Zachaplalny sieryjał pra jurystaŭ, prahlad jakoha vyklikaje sapraŭdnaje intelektualnaje zadavalnieńnie. Razbłytvańnie kryminalnych spravaŭ źmiešvajecca z historyjaj čałaviečych adnosin unutry bujnoj jurydyčnaj kampanii. Ź plusoŭ — sieryjał nie hruzić, naadvarot, jon zaciahvaje, zajmaje, čaplaje i dazvalaje trošku zabyć pra ŭłasnyja budni.

«Adčajnyja chatnija haspadyni» (Desperate Housewives)

Kamiedyjny detektyŭ, jaki niemahčyma nie palubić za jaho žyćciovaść. Tut vam adnosiny z kachanymi, ź dziećmi, z susiedziami, z baćkami, karjernyja ŭźloty i padzieńni, zamožža i haleča, sakrety, intryhi, śmierci i šmat-šmat dobraha i złoha humaru. 

Sitkamy

«Małady Šełdan» (Young Sheldon) 

Heta pryhožy, śvietły, humarny sieryjał pra niezvyčajnaha, ale hienijalnaha chłopčyka, što ros u pačatku 90-ch u Techasie, pra staleńnie jaho i jaho brata i siastry. Šmat momantaŭ, u jakich vy znojdziecie niešta blizkaje i asabistaje, a moža, navat pierahledzicie adnosiny z rodnymi.

«Jak ja sustreŭ vašu mamu» (How I Met Your Mother)

Kamiedyja pad kakavu pra kachańnie, siabroŭstva i fejły z padkatami. Što jašče skazać? Lehien… — pačakajcie-pačakajcie — …darna!

Fantastyka i fentezi

«Čałaviek u vysokim zamku» (The Man in the High Castle)

Sieryjał pra alternatyŭnuju rečaisnaść, dzie apisvajecca, jakim byŭ by śviet, kali b nacysty i Japonija pieramahli ŭ Druhoj suśvietnaj vajnie. Śviet padzieleny pamiž Trecim rejcham i Japonijaj, navokał represii, etničnyja čystki, zabarona relihii i niemahčymaść supracivu.

Hałoŭnaja hierainia Džulijana žyvie zvyčajnym žyćciom i nie ŭmiešvajecca ni ŭ što, pakul na jaje vačach palicyja nie zabivaje jaje siastru. Pierad śmierciu taja pieradaje hałoŭnaj hieraini videastužku z kadrami parada pieramohi sajuźnikaŭ pa supraćhitleraŭskaj kaalicyi i prosić pieradać heta supraciŭleńniu. Zrabić heta nie tak prosta, bo za dziaŭčynaj raspačynajuć palavańnie i nacysty, i japoncy. 

«Hulnia ŭ kalmara» (Squid Game)

Vostrasacyjalnaja drama ad paŭdniovakarejskaha režysiora Chvan Don Chioka, dzie ludziej uciahvajuć u hulniu na vyžyvańnie i abiacajuć pieramožcu hihanckuju sumu hrošaj. U kožnaj sieryi samaje cikavaje — vybar, jaki robiać hieroi i jaki vykryvaje ŭ adnych ich ludskaść, a ŭ inšych — nialudskaść. A taksama toje, jak instynkt samazachavańnia i praha hrošaj mohuć źmianiać ludziej da niepaznavalnaści.

«Doktar Chto» (Doctor Who)

Lehienda brytanskaj fantastyki, sieryjał, jaki pačaŭ vychodzić jašče ŭ 1962 hodzie. Historyja takaja: amal nieśmiarotny inšapłanietnik padarožničaje ŭ časie i prastory na svaim kaśmičnym karabli, što zvonku vyhladaje jak palicejskaja budka, i pakazvaje ŭsie cudy Suśvietu svaim spadarožnikam ź liku ziamlan. Za fantastyčnym fasadam i brytanskim humaram chavajecca navuka dabryni i taho, jak važna nie hublać zdolnaść ździŭlacca i vyrašać prablemy słovami, a nie zbrojaj.

«Raździaleńnie» (Severance)

Saj-faj sieryjał z dvajnym dnom i cudoŭnym akciorskim składam. Maje šmat drobiaziaŭ, jakija pryciahvajuć, dla jaho charakternyja davoli dobry temp i azdableńnie.

«Hulnia tronaŭ» (Game of Thrones)

Zdajecca, kožny pieršy ŭžo pahladzieŭ, ale kali vy ŭsio jašče sumniavajeciesia, to nie sumniavajciesia: jon adnaznačna varty. Niemahčyma adarvacca, nazirajučy, kudy zanosić los kožnaha hieroja, jak niečakana mohuć mianiacca abstaviny, jak niečakana ŭ ich mohuć mianiacca sami hieroi. Składanaść u tym, što vaš lubimy piersanaž moža ŭ lubuju chvilinu pamierci, tut šmat žorstkaści i niespraviadlivaści. Zmahańnie za tron idzie ŭvieś čas, a vakoł jaho paŭstaje prablema jašče bolšaha maštabu — baraćba sa śvietam ciemry.

«Raspovied słužanki» (The Handmaid's Tale)

Šykoŭnaja antyŭtopija, zasnavanaja na padziejach, apisanych u adnajmiennym ramanie kanadskaj piśmieńnicy Marharet Etvud, ź niejmaviernaj Elizabiet Mos u hałoŭnaj roli. U sieryjale raspaviadajecca pra tatalitarnuju dziaržavu Hałaad, dzie, kab vyrašyć prablemy z naradžalnaściu, usich žančyn, jašče zdolnych naradzić, robiać słužankami ŭ siemjach kirujučaj viarchuški. Zadača słužanki — začać ad čužoha muža, vynasić, naradzić i addać dzicia čužoj siamji. Tut jość usio: palityka, drama žančyny i siamji, praha svabody i adčajnaje zmahańnie z tatalitaryzmam. 

«Luboŭ. Śmierć. Robaty» (Love. Death. Robots)

Animavany sieryjał, jaki nie maje adzinaha siužeta. Heta — niejmaviernaja sumieś nie źviazanych pamiž saboj historyj, kožnaja ź jakich zachaplaje pa-svojmu. Kožnaja sieryja — heta vynik pracy roznych kamand, što možna zaŭvažyć pa stylach animacyi. 

«Čornaje lusterka» (Black Mirror)

Napeŭna, adziny ŭ svaim rodzie sieryjał, što pakazvaje, jakija vykliki mohuć stajać pierad nami ŭ budučyni. Absalutna nie źviazanyja miž saboj historyi, kožnaja sieryja — samastojny film. I amal kožnaja — prosta vaŭ, bo stavić pierad hledačom składanyja ekzistencyjnyja pytańni. 

«Demany da Vinčy» (Da Vinci's Demons)

Fantastyčnaja impravizacyja na temu, što było nasamreč u žyćci Leanarda. Vydatnyja hałoŭnyja aktory (asabliva hałoŭny antahanist da Vinčy), cikavyja siužetnyja linii. Kali nie maješ čakańniaŭ i nie pravodziš paralelaŭ z realnaj historyjaj, atrymaješ asałodu ad vidovišča, jak i ad aluzij, jakimi našpihavanaja kožnaja sieryja.

«Čužaziemka» (Outlander)

Maładaja miedsiastra Kłer praviała na froncie Druhuju suśvietnuju i ciapier, paśla pieramohi, jedzie ŭ Šatłandyju, kab raźviejacca z mužam. Tam jana niečakana adkryvaje partał dla padarožžaŭ u časie, pieranosicca ŭ miaciežnuju Šatłandyju XVIII stahodździa, dzie znajomicca z sapraŭdnymi horcami i robicca žonkaj adnaho ź ich, i heta — tolki pačatak jaje padarožža daŭžynioj u žyćcio. «Čužaziemka» — sieryjał, u jakim šmat pryhožych kaściumaŭ, zbroi, zvyčajaŭ, abradaŭ i seksu.

«Skroź śnieh» (Snowpiercer)

Ujavicie, što žyćcio na ziamli zamierła. Kruhom staić choład, u jakim niemahčyma isnavać. Žyćcio praciahvajecca tolki na ciahniku, jaki biaskonca ruchajecca vakoł ziamli, i ŭnutry ciahnika jość roznyja sacyjalnyja kłasy dla pasažyraŭ z roznym dachodam. Pasažyry pieršaha kłasa, jakija žyvuć u šykoŭnych prastornych vahonach, nikoli nie pierasiakajucca z pasažyrami apošniaha, što nie majuć ani ciapła, ani dobraj ježy, ani asabistaj prastory. Ale adnojčy pasažyry, jakim nie pašancavała apynucca ŭ chvaście, rašajucca paŭstać suprać niespraviadlivaści. A hałoŭnaje — u ich źjaŭlajecca lidar, jaki ačolvaje pratest. 

«Žyćci matroški» (Russian Doll)

Hałoŭnaja hierainia zavisaje ŭ časavaj piatli. Kožny raz, kali jana pamiraje, jaje žyćcio pačynajecca nanoŭ z adnaho i taho ž miesca. Jana absalutna nie razumieje, jak vybracca z hetaj pastki, tamu štoraz sprabuje pražyć svoj nievialički adrezak času pa-inšamu. U peŭny momant jana vypadkova sutykajecca z hierojem, jaki hetaksama sprabuje vybracca ź piatli. 

«Vielmi dziŭnyja spravy» (Stranger Things)

Fantastyčnaja historyja, u jakoj dzieci zmahajucca ź siłami zła. Kałarytnyja piersanažy, mahija, dramatyčny siužet upieramiežku z humaram — komba, jakoje vymušaje hladzieć i hladzieć sieryjał zapojem. U kožnym novym siezonie raskryvajucca vielmi niečakanyja padrabiaznaści minułaha hałoŭnaj hieraini — dziaŭčynki, jakaja vałodaje supiersiłaj. Tolki jana zdolnaja vyratavać śviet ad pahłynańnia jaho siłami zła, a jaje školnyja siabry ŭ hetym dapamahajuć. I paviercie, heta zusim nie dziciačy sieryjał.

«Klučy Łokaŭ» (Locke & Key)

Jašče adzin sieryjał pra dziaciej, jakija vajujuć sa złom. Tut historyja zaviazanaja na mahičnych klučach niezvyčajnaha siamiejnaha doma, kudy jany pierajazdžajuć žyć. Kožny kluč daje asablivuju siłu, ale niekatoryja ź ich adčyniajuć dźviery ŭ inšy śviet, žychary jakoha tolki i marać pra mahčymaść vybracca vonki. Supierdynamičny siužet pahłynaje całkam, hetaksama jak i ŭ Stranger Things.

«Teror» (Terror)

Pradukt kanała AMC. Čas i miesca padziej — staraja dobraja viktaryjanskaja Anhlija, pakazanaja z maksimalnym naturalizmam. «Teror» — bliskučaja saha pra mužnaść i honar. A flor šamanskaj mistyki nadaje jakraz tuju razynku, bieź jakoj usia historyja ŭsprymałasia b zvyšrealistyčnaj.

Kryminał i detektyvy

«Tvin Piks» (Twin Peaks)

Kultavy sieryjał ad Devida Linča, jaki nikoli nie sastareje. Heta sapraŭdny kiniematahrafičny džaz — mahija estetyki, mistyka, tonki humar i atmaśfiera sychodziačych 80-ch nie pakinuć abyjakavym nivodnaha hledača. Ź cikavostak — adnu z rolaŭ ihraje ikona kłasičnaha roka Devid Boŭi, časopis «Rolling Stone» ŭ 2019-m pryznaŭ Twin Peaks samym strašnym sieryjałam u historyi, a pa viersii Time jon uvachodzić u lik «Najlepšych TV-šou ŭsich časoŭ».

«Čamu žančyny zabivajuć» (Why Women Kill)

Vielmi stylovy sieryjał, sumieś detektyva i dramy pra adnosiny. U pieršym siezonie, paviercie, vy budziecie spačuvać hałoŭnym hierainiam (ich historyi razhortvajucca ŭ adnym i tym ža domie, ale ŭ roznyja časy). A ŭ druhim — prosta šaleć ad sieryi da sieryi ad pavodzinaŭ chatniaj haspadyni Almy Fiłkat i taho, jak zakruciłasia jaje žyćcio.

«Try sasny» (Three Pines)

Pryhožy, dabrotny i dušeŭny sieryjał pra zabojstvy ŭ vioscy Three Pines. Kožnaja historyja na dźvie sieryi, plus praz uvieś sieryjał idzie mahistralnaja historyja pra źnikłuju dziaŭčynu. Svaimi vyjavami kanadskaj hłybinki i lasoŭ sieryjał moža nahadać vam «Tvin Piks».

«Paŭnočnyja vody» (The North Water)

Žudasnaja detektyŭnaja historyja siarod arktyčnaha lodu, a taksama — mahčyma, najlepšaje pieraŭvasableńnie Kolina Fareła jak akciora. Kolery, rakursy, temp i piersanažy, nad jakimi pralatajuć pryvidy Dzikiensa, Cheminhueja i Džeka Łondana, składvajucca ŭ surovy mužčynski sieryjał, dzie niama miesca santymientam. 

«Papiarovy dom» (La casa de papel)

Dobry vybar, kali chočacca vypaści na paru dzion z realnaści. Hrupa złačyncaŭ zadumvaje dziorzkaje abrabavańnie. Siužet, kaniečnie, fantastyčny, ale nastolki zachoplivaje, što ciažka adarvacca. Kožny raz, kali vy budziecie dumać, što heta pravał, u hierojaŭ budzie płan B (nasamreč tam litar nie chopić na ŭsie zapasnyja płany). Nieliniejny apovied robić siužet jašče bolš cikavym. I asobnaje zadavalnieńnie — kast akcioraŭ. 

«Strajk» (Strike)

Sieryjał pa detektyvach Džoan Roŭlinh, jakija jana piša pad psieŭdanimam Robiert Hiełbrejt. Vielmi cikavaje spałučeńnie hierojaŭ nakštałt «Šerłaka Chołmsa i doktara Vatsana» — Kormaran Strajk i Robin Ełakot.

«Miortvaja chvatka» (Zachowaj spokój)

Sučasny polski sieryjał na Netflix «Miortvaja chvatka» — zachaplalnaja historyja z šaści epizodaŭ. Toj vypadak, kali scenar i hulnia akcioraŭ nastolki filihranna źnitavanyja, što vymušajuć paśla kožnaj sceny nieciarpliva čakać nastupnuju, bo ad dynamičnych siužetnych pavarotaŭ na ekranie niemahčyma adarvacca. Siužet pabudavany tak, što ŭžo paśla pieršych 10-ci chvilin možna zabycca, što hladziš mienavita polski sieryjał. Takaja historyja moža zdarycca jak u Biełarusi, tak i ŭ Łondanie, Varšavie ci Stakholmie, a mienavita ŭniviersalnaść dramatyčnaha dziejańnia zaŭždy padkuplaje. 

Paśla śmierci siabra źnikaje junak. Jaho siamja nie spyniajecca ni pierad čym, kab jaho znajści. Pry hetym ahalajucca pačvarnyja tajamnicy na vyhlad ščaślivaha i paśpiachovaha pryharada Varšavy… 

Uzrovień polskaha kino XXI stahodździa naohuł uražvaje. «Dzień psicha» i «Cieła Chrystova», «Płošča Zbaŭcy» i ŭžo kananičnaja ekranizacyja Siankieviča ad Ježy Hofmana «Ahniom i miačom» — tolki śniažynki na viaršyni ajśbierha. 

«Šerłak» (Sherlock)

Stvareńnie Styviena Mofata i Marka Hecisa, jakoje pieranosić Šerłaka Chołmsa ŭ rečaisnaść XXI stahodździa. Pieršyja try siezony prosta supier, bo jość i dedukcyja, i intryha, i šykoŭnyja piersanažy (ad Bieniedykta Kambierbetča da Uny Stabs i Łary Pułvier). Vizuał Łondana — heta prosta ŭzor taho, jak treba zdymać horad jak azdableńnie.

«Sapraŭdny detektyŭ» (True Detective)

Stylnyja žutkavatyja detektyvy ad Nika Picałata majuć svaju ni z čym nie paraŭnalnuju atmaśfieru, jakaja niaźmienna markirujecca najvyšejšym znakam jakaści. I nie važna, ci heta hałavakružny pošuk adeptaŭ pahanskaj siekty poŭdnia Łuizijany, ci palavańnie na sieryjnych mańjakaŭ u roznych kutach Amieryki. Kožny novy siezon — zaŭždy novy skład akcioraŭ. Samym viadomym i papularnym ličycca pieršy — z duetam Mećju MakKonachi i Vudzi Charelsana, jaki i nadaŭ pracy status kultavaha sieryjała. Krychu mienš paśpiachovymi była druhaja častka z Kolinam Farełam, a taksama treciaja z Machieršałam Ali. U 2023-m čakajecca čaćviorty siezon.

Supierhieroi i mifičnyja istoty

«Pacany» (The Boys) 

Amierykanski sieryjał Eryka Krypkie, jaki byŭ źniaty pa matyvach adnajmiennaha komiksa. Sieryjał dla tych, kamu nadakučyli mejnstrymavyja historyi pra supierhierojaŭ. Praź nieardynarny siužet, kałarytnych piersanažaŭ i vydatny vizuał aŭtary sprabujuć pakazać hledačam, jak by pavodzili siabie zvyšludzi, kali b isnavali ŭ realnym žyćci, i adnačasova krytykujuć sučasnuju amierykanskuju kulturu i ład žyćcia. 

«Pryvidy» (Ghosts)

Jakasny kamiedyjny sieryjał Bi-bi-si pra siamju, jakaja atrymlivaje ŭ spadčynu dom z pryvidami, a paśla vučycca razam ź imi žyć. Adznačym dobra prapisanyja charaktary hierojaŭ, vydatnuju bytavuchu i časam tonki zamaskiravany humar.

«Vyradki» (Mongrels)

Stroha 18+. Lalečny sieryjał VVS z čarnušnym humaram — guilty pleasure dla tych, chto stamiŭsia ad usialakaj palitkarektnaści dy «-izmaŭ». Žyviołki ŭ sieryjale «palać napałmam», kali ty choć krychu razumieješ kantekst.

Što pahladzieć. «Tehieran» — papularny špijonski sieryjał, jaki vy mahli prapuścić

Što pahladzieć. Adkryjcie dla siabie Hadara

Što pahladzieć. «Piasočny čałaviek» — adna z najlepšych fentezi-sah hetaha hoda

• 57
• 5
• 5
• 8
• 10
• 17