U ES jašče ŭ listapadzie aceńvali, što Rasija straciła va Ukrainie da 60% bajavych tankaŭ i 250 tysiač vajskoŭcaŭ
Kamandujučy Vajennaj misijaj Jeŭrapiejskaha sajuza admirał Ervie Bležan u listapadzie 2022 hoda padčas vystupleńnia pierad deputatami Nacyjanalnaj asamblei Francyi śćviardžaŭ, što Rasija ŭžo straciła 60% ahulnaha zapasu bajavych tankaŭ. Jak paviedamlaje «Jeŭrapiejskaja praŭda», stenahrama vystupleńnia Bležana na pasiadžeńni kamiteta pa pytańniach nacyjanalnaj abarony francuzskaha parłamienta ad 16 listapada 2022 hoda była apublikavanaja 4 studzienia.
«Pa našych najbolš vierahodnych acenkach, nie mienš za 60 tysiač rasijskich vajskoŭcaŭ było zabita, paraniena ŭtraja bolš. Heta aznačaje, što kala 250 tysiač rasijskich vajskoŭcaŭ ciapier niazdolnyja da viadzieńnia boju», — skazaŭ jon.
Admirał dadaŭ, što straty z ukrainskaha boku acanić ciažej, i ŭ ES miarkujuć, što jany nižejšyja za rasijskija, «ale ŭsio roŭna značnyja».
«Rasija straciła 60% svajho tankavaha arsienała, a taksama 70% svajho zapasu rakiet, prydatnych dla paražeńnia naziemnych celaŭ. Tamu ciapier jana vykarystoŭvaje zienitnyja rakiety dla paražeńnia naziemnych celaŭ, z adpaviednymi prablemami z dakładnaściu, i raźličvaje na pastaŭku abstalavańnia ź Irana ci Paŭnočnaj Karei», — dadaŭ kiraŭnik Vajskovaj misii ES.
Jon udakładniŭ, što charaktar pastavak Pchieńjana acanić ciažka, ale Iran užo tady pradaŭ Rasii bieśpiłotniki, a taksama vialisia pieramovy ab pieradačy balistyčnych rakiet siaredniaj dalokaści.
Taksama Bležan pryvioŭ acenki ES, zhodna ź jakimi Rasija straciła 40% bronietransparcioraŭ i 20% artyleryi z pačatku poŭnamaštabnaha ŭvarvańnia va Ukrainu.
Ervie Bležan sprahnazavaŭ adnaŭleńnie aktyŭnych nastupalnych dziejańniaŭ z boku Ukrainy viasnoj 2023 hoda. Ale dla hetaha Kijevu treba sfarmiravać try novyja vajskovyja karpusy kolkaściu prykładna ŭ 75 tysiač čałaviek — «prykładnaja kolkaść suchaputnaj apieratyŭnaj hrupy francuzskaj armii», adznačyŭ admirał.
«Tamu jak nikoli heta vajna na źniasileńnie, i ŭkraincy majuć patrebu ŭ našaj padtrymcy, kab adnavić svaje siły, adramantavać abo zamianić uzbrajeńnie, padtrymcy ŭ adnaŭleńni svaich sił, ramoncie abo zamienie paškodžanaha ci źniščanaha ŭzbrajeńnia i techniki, a taksama mieć mahčymaść praciahnuć advajavańnie terytoryj, anieksavanych paśla zimy», — padkreśliŭ admirał.
Biełarus žyvie ŭ domie, jaki pabudavaŭ z sałomy, piasku i hliny. Pry hetym jon — adziny žychar vioski. Jak adčuvańni?7
Kamientary