U ramkach čarhovaha pakieta ŭzbrajeńniaŭ Ukraina atrymaje ad ZŠA nie tolki broniemašyny Bradley i zienitnyja kompleksy Patriot, pra pieradaču jakich užo abviaściŭ Bieły dom, ale i kiravanyja rakiety RIM-7 Sea Sparrow («Marski vierabiej»).
Pra heta sa spasyłkaj na svaje krynicy paviedamiła vydańnie Politico.
Pryznačanyja dla pierachopu pavietranych celaŭ rakiety Sea Sparrow byli pryniatyja na ŭzbrajeńnie ŭ ZŠA jašče ŭ 1976 hodzie, adnak i praz amal paŭstahodździa ŭdaskanalenyja viersii rakiet vykarystoŭvajucca VMS i marskoj piachotaj ZŠA, a taksama fłatami inšych krain. Pa danych Politico, ukrainskija vajskoŭcy zmohuć zapuskać takija rakiety nie z karabloŭ, a z naziemnych płatformaŭ. Krynicy vydańnia paviedamili, što dla zapusku Sea Sparrow atrymałasia prystasavać puskavyja ŭstanoŭki raspracavanych u časy SSSR kompleksaŭ «Buk».
Da hetaha času ŭ jakaści elemientaŭ naziemnaj sistemy SPA Sea Sparrow vykarystaŭ tolki Tajvań, jaki atrymaŭ niekalki sotniaŭ takich rakiet u pačatku 1990-ch.
Sea Sparrow — raspracavanaja karparacyjaj Raytheon kiravanaja rakieta kłasa «karabiel — pavietra» z paŭaktyŭnaj radyjołakacyjnaj hałoŭkaj samanaviadzieńnia. Dalokaść palotu rakiety i jaje chutkaść VMS ZŠA nie raskryvajuć, adnak, pa danych ekśpiertaŭ, novyja viersii rakiety zdolnyja razhaniacca da chutkaści, jakaja ŭ čatyry razy pieravyšaje chutkaść huku, i mohuć źniščać samaloty i kryłatyja rakiety na adlehłaści da 50 km.
Ciapier čytajuć
Vučniaŭ, jakija z matam parvali ekzamienacyjnyja bilety pa historyi Biełarusi, prymusili vybačacca kala manumienta Pieramohi51
Kamientary