Švied supakojvaje: Kali kamisija pryznaje, što da čałavieka pretenzij niama, to niešta suprać jaho rabić možna tolki sa zhody hienprakurora
Hienieralny prakuror Andrej Švied u efiry prahramy «Razmova ŭ Prezidenta» na kanale «Biełaruś 1» raspavioŭ pra toje, jak budzie pracavać mižviedamasnaja kamisija i kaho ź biełarusaŭ, jakija źjechali, režym hatovy puścić u krainu. Źmiest jahonaha vystupleńnia pierakazała Reform.by.
Pa słovach Švieda, kamisija budzie tłumačyć tym, chto źjechaŭ, ichni status i paradak viartańnia. Jašče adna jaje zadača — prymianić pravavyja miechanizmy ŭ adnosinach da tych, chto raskajaŭsia, «z tym, kab jany i dalej byli paŭnavartasnymi hramadzianami našaj krainy».
Taksama jon raskazaŭ pra prykładny paradak dziejańniaŭ pry zvarocie ŭ kamisiju. Hramadzianinu nieabchodna budzie napisać zajavu, prykłaści da jaje kopiju pašparta, rastłumačyć abstaviny znachodžańnia za miažoj, napisać, čamu jon ličyć, što da jaho mohuć być pretenzii. Taksama spatrebiacca zapeŭnivańni, što hramadzianin jość abo budzie zakonapasłuchmianym i nikoli nie parušyć łukašenkaŭskich zakonaŭ. Paśla taho kamisija razhledzić rašeńni i daść piśmovy adkaz.
Švied pieraličyŭ katehoryi biełarusaŭ, jakija mohuć padać zvarot u kamisiju.
U pieršuju hrupu ŭvachodziać tyja, chto «ščyra pamylajecca» adnosna najaŭnaści da ich pretenzij z boku dziaržavy.
«Jany dumajuć, što da ich jość niejkija pretenzii, ale nasamreč ich niama apryjory, i jany ščyra pamylajucca», — zajaviŭ Švied.
U druhoj hrupie — hramadzianie, jakija ździejśnili niaznačnyja z punktu hledžańnia režymu praviny, naprykład, źviazanyja z administracyjnaj adkaznaściu, abo jakija majuć prykmiety złačynstva, nie ŭjaŭlajuć vialikaj hramadskaj niebiaśpieki ci pamylajucca adnosna nastupstvaŭ svaich dziejańniaŭ.
«Moža być tam daŭno minuŭ termin daŭniny. Moža być, tam miera pakarańnia, nie źviazanaja z abmiežavańniem i pazbaŭleńniem voli», — rastłumačyŭ prakuror.
Treciaja hrupa — tyja, jakija ździejśnili «mienš ciažkija złačynstvy», raskajalisia, publična pra heta zajavili, vykłali svaje matyvy raskajańnia i zapeŭnivańni.
«Jość dastatkovaja kolkaść miechanizmaŭ pravavych, dzie hetaja asoba ŭ adpaviednaści z zakonam paniasie adkaznaść, ale hetaja adkaznaść dakładna nie budzie źviazanaja z pazbaŭleńniem albo abmiežavańniem voli. I takija harantyi, što heta asoba atrymaje», — zajaviŭ Švied.
Pa słovach Švieda, toj, chto źviarnuŭsia ŭ kamisiju, zmoža atrymać padpisany dakumient ab adsutnaści pretenzij i pakazać jaho na miažy.
Adnosna ž zaściarohaŭ, što pretenzii karnych orhanaŭ mohuć uźniknuć užo paśla viartańnia ŭ Biełaruś paśla adkazu kamisii, Švied adznačyŭ, što takoje mahčyma tolki ź jaho zhody.
«Kali kamisija prymaje rašeńnie ŭ dačynieńni da dziejańniaŭ, učynienych da pryniaćcia rašeńnia ab mahčymaści ŭjezdu, to jakija-niebudź dziejańni ŭ dačynieńni da hetaj asoby mahčymyja buduć tolki sa zhody hienieralnaha prakurora, heta značyć staršyni kamisii.
U hetym vypadku my, viadoma, budziem raźbiracca. U hetym vypadku my dajom harantyju taho, što, viadoma, nijakija miery pracesualnaha prymusu nie buduć prymianiacca, kali tolki jon nie ździejśniŭ ciažkaje abo asabliva ciažkaje złačynstva, jakoje jon ŭtojvaje», — skazaŭ Švied.
Hienprakuror zajaviŭ, što kamisija budzie staranna vyvučać kožnaha z taho, chto źviarnuŭsia, kab nie prapuścić u Biełaruś «ekstremistaŭ i terarystaŭ». Pravierka budzie prachodzić «u ramkach tych infarmacyjnych resursaŭ i masivaŭ, jakija jość u pravaachoŭnaj sistemie».
Pa słovach Švieda, u pieršuju čarhu kamisija budzie pracavać z tymi biełarusami, jakija raskajalisia i zajavili pra heta publična.
Švied taksama raspavioŭ, jakoje pakarańnie moža prymianiacca da ludziej, kali kamisija vyznačyć ich vinu. Siarod mahčymych zachadaŭ — uniasieńnie hrašovaha zakładu.
«Ździejśniŭ złačynstva. Jon źviartajecca da nas. My havorym: tak, abjektyŭna paćviardžajecca vaša vina ŭ ździajśnieńni takoha złačynstva, za jakoje moža być u adpaviednaści z zakonam pryznačanaja takaja i takaja miera pakarańnia. U vypadku vašaha dziejnaha raskajańnia, publičnaha raskajańnia vy možacie viarnucca. My vam harantujem, što ŭ dačynieńni da vas nie budzie abranaja miera strymańnia, źviazanaja z abmiežavańniem svabody, ale pry hetym ukaranionyja inšyja instytuty: paručalnictva, hrašovy zakład, inšyja miery strymańnia, nie źviazanyja z abmiežavańniem svabody», — zajaviŭ Švied.
Takim čynam, možna kanstatavać, što ŭsie harantyi, jakija moža dać režym tym, chto jamu pavieryć i vyrašyć viarnucca, — heta jahonaje česnaje słova. Navat tuju papierku ab nibyta adsutnaści pretenzij, jakija abiacajuć vydavać, možna lohka pieratvaryć u ništo, kali na heta daść zhodu Švied. Kłasifikacyi «złačynstvaŭ» adnosna ich ciažaru taksama ničoha nie vartyja ŭ sistemie, dzie zakanadaŭstva traktujecca advolna. Da taho ž pieršapačatkovaja «adsutnaść pretenzij» nie harantuje taho, što hetyja pretenzii nie mohuć źjavicca paśla taho, jak čałaviek pryjedzie ŭ Biełaruś i jaho dadatkova nie vyvučać «u ramkach tych infarmacyjnych resursaŭ i masivaŭ, jakija jość u pravaachoŭnaj sistemie».
I nie moža nie naściarožvać apošni abzac, u jakim Švied havoryć pra «inšyja instytuty: paručalnictva, hrašovy zakład, inšyja miery strymańnia, nie źviazanyja z abmiežavańniem svabody». Pry prymianieńni hetych «instytutaŭ» całkam moža stacca tak, što čałavieka sapraŭdy nie pasadziać, ale abkładuć paborami ŭ niejmaviernych pamierach — jak heta ŭžo zdaryłasia z prahramistami, da jakich prymianiajuć dziesiacikratnyja multyplikatary.
«Kubło takoje». Ź pierapisak Kabančuka robicca jasna, čamu Vieramiejčyka paličyli niebiaśpiekaj i zabaranili jamu ŭjezd va Ukrainu34
Kamientary
Dla šviedaŭ i roznych hubazaŭ - biasprojhryšnaja temka. Ci papaŭnieńnie biudžeta, ci papaŭnieńnie kałonij - tak i tak zorka na pahon i premija. Adno pytańnie: na jakich durniaŭ heta raźličana, chto sam siabie zdaść, kali "časam nie da zakonaŭ"?