Kala 30 čałaviek zvolnili z adnoj arhanizacyi ŭ Hłybokim pa palityčnych matyvach
Takoje masavaje zvalnieńnie ludziej pa palityčnych matyvach, jak u «Hłybockich elektryčnych sietkach», — pieršy viadomy ŭ Viciebskaj vobłaści, piša «Viciebskaja viasna».
U pačatku sakavika ŭ Hłybockim haradskim domie kultury adbyłosia ŭračystaje mierapryjemstva, pryśviečanaje 60-hodździu z dnia ŭtvareńnia «Hłybockich elektryčnych sietak». A ŭžo praź niekalki dzion paśla hetaha ŭ arhanizacyi pačalisia čystki pa palityčnych matyvach.
Pa infarmacyi «Viciebskaj viasny», tam byli zvolnieny ludzi nie tolki za toje, što chadzili na akcyi, ale i za toje, što stavili podpisy padčas minułaj prezidenckaj kampanii nie za Łukašenku, za toje, što dapamahali finansava tym, kaho ŭłady niezakonna štrafavali, uvohule za salidarnaść ź inšymi biełarusami i niełajalnaść da ciapierašniaj ułady ŭ Biełarusi.
«I choć raniej, niekalki miesiacaŭ tamu, u kožnuju arhanizacyju Hłybokaha siłaviki pieradali śpisy niepažadanych, jakija naličvali dziasiatki čałaviek u kožnaj, kiraŭniki pradpryjemstvaŭ nie śpiašalisia zvalniać ludziej, a časam navat za ich ustupalisia. Tady byli zvolnieny adzinki. Ale zaraz pastupiła takoje ŭkazańnie ŭ kantory i asabista ideołaham na pradpryjemstvach, što kali nie pačnucca bolšyja zvalnieńni, to ich samich prybiaruć z pracy», — pišuć pravaabaroncy.
Na jašče adnym vialikim hłybockim pradpryjemstvie Małočna-kansiervavym kambinacie masavych zvalnieńniaŭ niama. Ale ludziam, jakija ŭ śpisach niełajalnych, pa zakančeńni kantrakta jaho nie praciahvajuć. To-bok zvalnieńni atrymlivajucca pastupovyja. «Da taho ž pačało raźvivacca stukactva, kali adny rabotniki pačynajuć danosić na inšych prosta tamu, što znachodziacca ŭ drennych stasunkach ci chočuć kaho pasunuć pa pracy», — dadajuć pravaabaroncy.
Pa infarmacyi «Viciebskaj viasny», padčas zvalnieńniaŭ nie škadujuć nikoha — ni žančyn, jakija hadujuć adny dziaciej biez muža, ni šmatdzietnych baćkoŭ. Ludzi takija zvalnieńni pamiž saboj nazyvajuć «čorny bilet», bo paśla jaho vielmi składana kudyści ŭładkavacca ŭ Biełarusi.
Ciapier čytajuć
Łukašenka apraŭdvajecca za ideju z pryjezdam 150 tysiač pakistancaŭ — heta, kab «zachavać naš narod»28
Kamientary