U Lachavičach prajavili kreatyŭ u afarmleńni aŭtobusnych prypynkaŭ
Ideja niezvyčajna aformić prypynak u Lachavičach upieršyniu ŭźnikła ŭ suviazi z vulicaj, nazvanaj u honar znakamitaha ziemlaka — kinarežysiora Michaiła Ptašuka, jaki naradziŭsia ŭ vioscy Fiedziuki Lachavickaha rajona. A paśla pačataje vyrašyli praciahnuć.
U pamiać pra zasłuhi Michaiła Ptašuka na prypynku, što znachodzicca na vulicy jahonaha imia, da standartnych paviljona i łavački dadali niekalki elemientaŭ. Z adnaho boku kamunalniki pastavili kavanuju kinakamieru, a da procilehłaj ściany prymacavali stend u vyhladzie kinastužki. Na im namalavany Michaił Ptašuk i kadry źniatych im filmaŭ. Pry hetym pakazalnik z nazvaj prypynku nahadvaje kinachłapušku.
Na vulicy Lenina pobač ź dziciača-junackaj spartyŭnaj škołaj Lachavickaha rajona taksama źjaviŭsia art-prypynak. Zdalok jon nahadvaje łaŭku dla hulcoŭ i trenieraŭ na futbolnym stadyjonie. Daminanta kanstrukcyi — vialiki futbolny miač.
«Prypynak treba było madernizavać, pašyryć. Jon raźmieščany na asnoŭnaj vulicy, tam zaŭsiody šmat pasažyraŭ, u tym liku studentaŭ», — rastłumačyŭ dyrektar Lachavickaj słužby ŽKH Andrej Čajkoŭski. Jon adznačyŭ, što na vybar kreatyŭnaj idei paŭpłyvała susiedstva spartyŭnaj škoły.
Na inicyjatyvu miascovyja žychary reahujuć stanoŭča, tamu jaje realizacyja budzie praciahnutaja. «Nastupny prypynak užo vyrablajecca, budzie pobač z himnazijaj. Dyzajn źviazany z abstanoŭkaj u kłasie», — raspavioŭ Andrej Čajkoŭski.
Razvažajuć kamunalnyja słužby pra abnaŭleńnie dyzajnu i na jašče adnym prypynku ŭ Lachavičach.
Juraś Ziankovič raskazaŭ pra svajo vyzvaleńnie i šlach u ZŠA6
Kamientary