Pieradajuć u sud spravu «złodzieja ŭ zakonie» Kušniarova, abvinavačanaha ŭ arhanizacyi zakaznoha zabojstva
Śledčaje ŭpraŭleńnie Upraŭleńnia Śledčaha kamiteta pa Minsku zaviaršyła rasśledavańnie kryminalnaj spravy ŭ dačynieńni da Alaksandra Kušniarova, abvinavačanaha ŭ arhanizacyi zakaznoha zabojstva. Kušniaroŭ viadomy jak «kryminalny aŭtarytet» Saša Kušnier i adzin z klučavych udzielnikaŭ homielskaj «bandy Marozava».
Raniej paviedamlałasia, što Kušniaroŭ (Kušnier) byŭ zatrymany letam 2022 hoda.
Ciapier kryminalnaja sprava pieradadziena prakuroru dla nakiravańnia ŭ sud, paviedamili ŭ Śledčym kamitecie. Tam adznačyli, što ŭ chodzie rasśledavańnia ŭstanoŭlena, što abvinavačany z pomsty ŭ žniŭni-vieraśni 2021 hoda arhanizavaŭ padrychtoŭku da ździajśnieńnia «zakaznoha» zabojstva dvuch čałaviek.
Sa słoŭ śledčych, Saša Kušnier, vykarystoŭvajučy svoj status u kryminalnym asiarodździ («złodziej u zakonie»), znajšoŭ vykanaŭcaŭ zakaznoha złačynstva, za jakoje paabiacaŭ zapłacić 700 tysiač dalaraŭ ZŠA.
Častku hrošaj, zbroju jon pieradaŭ zmoŭščykam, paviedamiŭšy nieabchodnuju infarmacyju ab achviarach, adnak davieści svoj namier da kanca fihurant nie zmoh.
U ramkach rasśledavańnia spravy byli ŭstanoŭlenyja jašče čatyry epizody jaho złačynnaj dziejnaści, źviazanyja ź niezakonnym abarotam zbroi — kanfiskavana 5 adzinak ahniastrelnaj zbroi i bojeprypasy da ich.
Dziejańni 56-hadovaha, raniej nieadnarazova sudzimaha Alaksandra Kušniarova kvalifikavanyja pa č. 1 art. 13, p. 1, 12, 15, 16 č. 2 art. 139 (padrychtoŭka da zabojstva pa najmie, hrupaj asob, asobaj, jakaja raniej učyniła zabojstva), a taksama pa č. 3 art. 295 (niezakonnyja nabyćcio, zachoŭvańnie, pieravozka, pieradača ŭ vałodańnie, našeńnie ahniastrelnaj zbroi i bojeprypasaŭ, učynienyja paŭtorna) Kryminalnaha kodeksa. Prakuror vyznačyŭ jamu mieru strymańnia ŭ vyhladzie zaklučeńnia pad vartu.
Za ŭčynienyja złačynstvy Kušniarovu pahražaje da 25 hadoŭ pazbaŭleńnia voli.
Alaksandr Kušniaroŭ — kiler homielskaj bandy «marozaŭcaŭ».
Siadzieŭ za kradziažy ŭ 1984-1992 hadach. Paśla vyzvaleńnia dałučyŭsia da bandy «marozaŭcaŭ». Praź niekalki hadoŭ znoŭ aryštavany, u 1995-m jaho prysudzili da śmiarotnaha pakarańnia za zabojstvy. Potym sud zamianiŭ prysud na 15 hod turmy, a ŭ vyniku Kušniaroŭ pa amnistyi vyjšaŭ jašče raniej, u 2008-m, i pačaŭ śćviardžacca ŭ kryminalnym śviecie Biełarusi. Aproč taho, siadzieŭ u 2011-m, 2012-2014 hadach.
Zatrymali «złodzieja ŭ zakonie» Kušniarova. Jaho padazrajuć u arhanizacyi zabojstva
Krynicy: Kryminalnaha aŭtaryteta Kušniera, jaki z nažom akazvaŭ supraciŭ pry zatrymańni, adpuścili. Imavierna, biez kryminalnaj spravy
U Žodzinie razahnali schodku kryminalnych aŭtarytetaŭ, na jakoj abmiarkoŭvali, jak dyskredytavać złodzieja ŭ zakonie
Ciapier čytajuć
Vučniaŭ, jakija z matam parvali ekzamienacyjnyja bilety pa historyi Biełarusi, prymusili vybačacca kala manumienta Pieramohi35
Kamientary