1 maja na płatformie Vodblisk źjavicca film Darji Žuk «Kryštal» i jaje karotkamietražnyja pracy («Sapraŭdnaja amierykanka», «Chapaj turystaŭ», «Pavietra ŭnutry jaje»). Tyja, chto znachodzicca na terytoryi Biełarusi, sioleta mohuć hladzieć filmy na płatformie Vodblisk biaspłatna.
«Žyvaja, iraničnaja kamiedyja pra sutyknieńnie kultur», — jomista apisała viadučaje amierykanskaje miedyja Variety film «Kryštal» Darji Žuk. Uvohule ž ekśpierty nazyvajuć jaho praryvam dla biełaruskaha kiniematohrafa. Aproč Variety, pra «Kryštal» napisali stanoŭčyja vodhuki ŭpłyvovyja suśvietnyja vydańni: Hollywood Reporter, Screen International. Dziakujučy hetamu filmu ŭ Biełarusi ŭpieršyniu za dvaccać hadoŭ źbiraŭsia oskaraŭski kamitet.
Stužka źjaŭlałasia na ekranach najbujniejšych fiestyvalaŭ, a taksama atrymała šerah uznaharod.
Refleksiŭnaja historyja dydžejki Vieli, jakaja maryła źjechać ź Minska ŭ Čykaha na radzimu ŭlubionaha muzyčnaha stylu, znojdzie vodhuk i ŭ tych, chto žyŭ u 90-ja ŭ Biełarusi, i ŭ tych, chto hety pieryjad nie zaśpieŭ, ale praz ekran zmoža adčuć uvieś bol postsavieckaha biazładździa.
Pa siužecie z-za pamyłki druku ŭ padroblenaj ankiecie na amierykanskuju vizu maładaja Viela apynajecca ŭ zavodskim miastečku Kryštalny. Tam jana źbirajecca luboj canoj damahčysia ažyćciaŭleńnia svajoj «amierykanskaj mary».
Sama Darja Žuk u adnym ź intervju adznačała, što jaje film nie prosta pra 90-ja, a kankretna pra 1996-ty, pra histaryčny momant dla Biełarusi, kali jana pačała ruchacca pa ściežcy dyktatury.
U asnovie scenaryja lažyć sapraŭdnaja historyja, jakuju režysiorka pačuła ad siabroŭki, kali pačynała vučycca ŭ Štatach. Scenarystka Chielha Łandaŭer aformiła ideju ŭ sinopsis, tady dziaŭčaty dasłali scenar na «Biełaruśfilm», dzie jon nieruchoma pralažaŭ paŭtara hoda, paśla čaho Darja sama stała šukać hrošy na zdymki. U vyniku «Kryštal» padtrymali finansami ažno čatyry krainy: Hiermanija, ZŠA, Biełaruś, Rasija.
Zdymki filma prachodzili ŭ Biełarusi. Nad stužkaj pracavała mižnarodnaja zdymačnaja hrupa, a hałoŭnyja roli vykanali Alina Nasibulina, Ivan Mulin i byłaja aktrysa kupałaŭskaha teatra Śviatłana Anikiej. U epizadyčnaj roli filma navat źjaŭlajecca śpiavak Chaski.
Režysiorka, apisvajučy svoj film, kaža: «Z adnaho boku, «Kryštal» abhornuty ŭ takuju kalarovuju vydatnuju abhortku, jak ladziaš, jaki moža być horkim u kancy. Heta ž kamiedyja spačatku, ale potym film imkniecca być niečym jašče».
«Kryštal» budzie dastupny tolki dla hledačoŭ, jakija znachodziacca na terytoryi Biełarusi. U 2023 hodzie jany zmohuć hladzieć film biaspłatna, jak i ŭvieś repiertuar miedyjateki Vodblisk. A pakul možna pahladzieć trejler.
U aŭdytoryi z zamiežža budzie mahčymaść pahladzieć luby z troch karotkamietražnych filmaŭ Darji Žuk («Sapraŭdnaja amierykanka», «Chapaj turystaŭ», «Pavietra ŭnutry jaje») za 5$ albo nabyć ich tańniej usie razam za 9$. Dostup da filma zachoŭvajecca 30 dzion z momantu pieršaha prahladu, pry hetym hladzieć jaho možna lubuju kolkaść razoŭ.
Praciahvajučy temu emihracyi i «amierykanskaj mary», film «Sapraŭdnaja amierykanka» pieranosić hledača ŭ 1994 hod i raskazvaje historyju Ali, studentki z postsavieckaj prastory, jakaja pryjechała pa abmienie ŭ Amieryku. Dziaŭčyna sprabuje zrazumieć adroźnieńni kultur, upisacca i być sapraŭdnaj amierykankaj. Za hety film Darja Žuk atrymała pryz za najlepšuju režysuru ad New York Women in Film and Television.
«Chapaj turystaŭ» — karotki mietr 2014 hoda. Siužet dastatkova prosty: turyst znajomicca ź miascovaj dziaŭčynaj i niečakana dla siabie akazvajecca ŭciahnuty ŭ luboŭny trochkutnik. Adnak za hetaj prastatoj chavajecca chupavaje i zapaminalnaje vykanańnie hetaj historyi ź cikavym siužetnym tvistam.
«Pavietra ŭnutry jaje» — samaja pieršaja karotkamietražnaja praca Darji Žuk, stvoranaja ŭ 2011 hodzie. Film pra šaścihadovuju Kaciu, jakaja ŭpieršyniu daśleduje śmierć i adkryvaje dla siabie žyćcio takim, jakim jaho nikoli raniej nie bačyła.
Vodblisk — anłajn-kinateatr biełaruskaha kino, jaki stvaryła kamanda kinafiestyvalu «Paŭnočnaje źziańnie», kab hledačy mieli mahčymaść adkryvać dla siabie sučasnyja niezaležnyja dakumientalnyja i ihravyja filmy, zroblenyja biełarusami i biełaruskami.
Čytajcie taksama:
Z 1 krasavika ŭ anłajn-kinateatry biełaruskaha kino Vodblisk źjavicca novy film
Kamientary