Ułady Biełharodskaj vobłaści pačynajuć evakuacyju horada Šabiekina, jaki znachodzicca za piać kiłamietraŭ ad miažy z Charkaŭskaj vobłaściu Ukrainy. Zakliki da evakuacyi pryhraničnych nasielenych punktaŭ hučali ŭ Rasii i raniej, ale ŭpieršyniu rašeńnie ab vyvazie žycharoŭ datyčyć rajcentra z nasielnictvam 40 tysiač čałaviek, piša BBC.
Abstreły Šabiekina i jaho navakollaŭ uzmacnilisia apošnija niekalki dzion. Miascovyja žychary paviedamlali ab razryvach snaradaŭ. Apošnija dni ŭ horadzie pastajannyja pieraboi z elektryčnaściu i vadoj.
U čaćvier ranicaj u sacyjalnych sietkach raspaŭsiudziłasia videa padpalenaha šmatpaviarchovaha budynka, jak miarkujecca, internata, u centry horada, pobač z haradskoj administracyjaj. Ahoń, jak bačna na kadrach, achapiŭ uvieś dach budynka, pažarnych słužbaŭ pobač nie było.
Napiaredadni hubiernatar Biełharodskaj vobłaści Viačasłaŭ Hładkoŭ paviedamiŭ, što damoviŭsia z uładami niekalkich rehijonaŭ ab pryjomie kala 1200 čałaviek. Jon zajaviŭ, što pieršyja niekalki socień žycharoŭ buduć vyviezieny ŭ Pienzu i ŭ Kałužskuju vobłaść. U sieradu miascovyja ŭłady paviedamlali taksama, što žycharoŭ Šabiekina buduć pieravozić u Varoniežskuju vobłaść.
U čaćvier ranicaj Hładkoŭ zapisaŭ paviedamleńnie, u jakim skazaŭ, što padčas intensiŭnych abstrełaŭ evakuacyja budzie prypynienaja, adnak paabiacaŭ, što tym, kamu treba budzie źjechać terminova, dapamohuć.
Hładkoŭ admaŭlaŭ paviedamleńni ab praniknieńni bajavych hrup z Ukrainy na terytoryju Biełharodskaj vobłaści.
Pa śćviardžeńni pradstaŭnika Minabarony Rasii, vajskoŭcy spynili sprobu praniknieńnia na terytoryju Šabiekinskaha rajona bajavych farmiravańniaŭ z Ukrainy.
Na hetym fonie bajcy Ruskaha dobraachvotnickaha korpusa, jaki atrymaŭ viadomaść paśla niadaŭniaha rejdu praź miažu Ukrainy z Rasijaj u susiedni z Šabiekinskim Hrajvaronski rajon Biełharadčyny, zajavili ŭ čaćvier ranicaj, što rychtujucca trapić u Šabiekina. «Zusim chutka budzie miaža Šabiekina», — zajaviŭ adzin z bajcoŭ hetaha padraździaleńnia ŭ apublikavanym videa.
Paźniej va ŭkrainskich kanałach źjavilisia videa pierastrełki, jakaja, jak paviedamlałasia, idzie na ŭskrainie Šabiekina. Identyfikavać miesca pierastrełki ciažka, śćviardžajecca, što bai iduć u Novaj Tavałžancy i Citoŭcy, dvuch nasielenych punktach na paŭdniovy zachad ad Šabiekina. Tavałžanka amal uščylnuju prylahaje da miažy z Ukrainaj.
«Patelefanujcie mnie, prašu»
U ranišnim paviedamleńni hubiernatar Hładkoŭ kazaŭ, što za minułyja sutki vosiem čałaviek atrymali ranieńni ŭ vyniku abstrełaŭ. Paźniej źjavilisia paviedamleńni ab 11 paciarpiełych u niekalkich nasielenych punktach Šabiekinskaha i susiedniaha ź im Hrajvaronskaha rajona.
«Dziesiać čałaviek pastupiła z Šabiekinskaj haradskoj akruhi i adzin žychar Barysaŭskaha rajona. Usie atrymali minna-vybuchnyja traŭmy roznaj stupieni ciažkaści. Čatyry čałavieki z 11 znachodziacca ŭ reanimacyi ŭ ciažkim stanie», — raskazaŭ infarmahienctvu TASS Raman Pracenka, kiraŭnik Biełharodskaj haradskoj balnicy numar 2.
Sacyjalnyja sietki napaŭniajucca abjavami ad ludziej, jakija šukajuć transpart dla taho, kab źjechać. «Kali łaska, dapamažycie zabrać pažyłoha čałavieka z Šabiekina. Choć by da Biełharada, my tudy pryjedziem, zabiarom. Patelefanujcie mnie, prašu», — napisana ŭ adnoj z typovych abjaŭ.
«Pierakładnymi šlachami žycharoŭ vyvoziać»
Uražańni ad taho, jak arhanizavany vyjezd z horada, u žycharoŭ Šabiekina roznyja. «Maja svajačka — adna z tych, chto, nie čakajučy, kali ź joj źviažucca, vyjšła razam z susiedziami na prypynak i ciapier užo jedzie razam ź imi za miežy horada, — cytuje RBK adnu z žycharak, Juliju. — Jany pierakładnymi šlachami žycharoŭ vyvoziać, i starym, i małym — usim dapamahajuć».
Hanna, inšaja žycharka, sprabuje damovicca ab vyvazie niamohłaj svajački.
«Śviakroŭ lažačaja, paśla insultu. Vyvieźci niama kamu. Horad zaraz znoŭ pad abstrełam. Suviazi niama. Da administracyi nie datelefanavacca. Źviartalisia jašče ŭčora ŭ administracyju. Adkazali, što ŭ Maskoŭskuju vobłaść — da nas — nie paviazuć.
Ułady Rasii pakul nie kamientavali situacyju pa sutnaści.
Pres-sakratar prezidenta Pucina Dźmitryj Piaskoŭ zajaviŭ, što rasijski lidar «u suviazi ź situacyjaj vakoł Šabiekina pastajanna atrymlivaje dakłady ź Ministerstva abarony, Pahransłužby, FSB, MNS».
Sam Pucin pravodziŭ dystancyjnuju naradu ŭ honar Dnia abarony dziaciej. Skazaŭ, što vieryć u Dzieda Maroza i što toj važniejšy za jaho.
Vializnaja chvala zatrymańniaŭ — stała zrazumieła, na kaho hetym razam palavali KDB i HUBAZiK4
Kamientary