Pryniaty va Ukrainie zakon nie zabaraniaje ŭvozić dla prodažu vydadzienyja za miažoj knihi biełaruskich aŭtaraŭ — Biełaruski PEN

Takim čynam jana prakamientavała padpisany napiaredadni prezidentam Ukrainy Uładzimiram Zialenskim zakon «Ab uniasieńni źmianieńniaŭ u niekatoryja zakony Ukrainy ab ustalavańni abmiežavańniaŭ na ŭvoz i raspaŭsiud vydavieckaj pradukcyi, jakaja tyčycca dziaržavy-ahresara, Respubliki Biełaruś, časova akupavanaj terytoryi Ukrainy», piša «Radyjo Svaboda».

Pavodle słoŭ Niadbaj, u adpaviednaści z zakonam budzie ŭličvacca hramadzianstva aŭtara knihi: «Kali aŭtar — hramadzianin krainy-ahresara (Rasii), tady takija knihi dla raspaŭsiudu ŭvieźci budzie nielha».

Knihi hramadzian Biełarusi, što vyjšli za miažoj, možna budzie ŭvozić pry ŭmovie, što jany vydadzienyja na biełaruskaj movie.

«Adnak heta budzie pracavać da toj pary, pakul (kali) Biełaruś nie pryznajuć krainaj-ahresaram. Knihi na ruskaj movie, tak jak ruskaja [mova] — dziaržaŭnaja mova krainy-ahresara, mohuć być uviezienyja dla raspaŭsiudu tolki pry najaŭnaści śpiecyjalnaha dazvołu», — adznačyła Niadbaj.

Staršynia Biełaruskaha PENa padkreśliła, što «dla pryvatnaha ŭžytku» fizičnyja asoby mohuć i nadalej uvozić va Ukrainu knihi — da 10 adzinak — niezaležna ad miesca vydańnia i hramadzianstva aŭtara, kali jany nie ŭniesienyja ŭ rejestr vydańniaŭ z antyŭkrainskim źmiestam.

22 červienia Zialenski paviedamiŭ u telehram-kanale, što padpisaŭ zhadany vyšej zakon i ličyć jaho «pravilnym». Tekst hetaha dakumienta, pavodle jaho słoŭ, nakiravany «instytutam ES dla dadatkovaj acenki ŭ kantekście rekamiendacyi zaklučeńnia Jeŭrapiejskaj kamisii pa zajaŭcy Ukrainy na siabroŭstva ŭ ES». Palityk čakaje ad ich acenki, «ci mohuć asobnyja normy zakona paŭpłyvać na vykanańnie abaviazańniaŭ Ukrainy abaraniać pravy mienšaściaŭ, u pryvatnaści, ich prava karystacca nacyjanalnaj movaj».

Sioleta ŭ mai na sajcie ŭkrainskaha prezidenta była zarehistravana pietycyja z patrabavańniem padpisać zhadany zakon, jaki Viarchoŭnaja Rada pryniała jašče 19 červienia 2022-ha.

Siarod inšaha zakon zabaraniaje «ŭvoz na mytnuju terytoryju Ukrainy i (abo) raspaŭsiud na terytoryi Ukrainy vydavieckaj pradukcyi, jakaja maje pachodžańnie, vyrablena i (abo) vypuščana, i (abo) uvozicca z terytoryi dziaržavy-ahresara (Rasii), Respubliki Biełaruś, časova akupavanaj terytoryi Ukrainy,…a taksama knižnych vydańniaŭ, što ŭtrymlivajuć tvory, aŭtary jakich jość abo byli ŭ luby pieryjad paśla 1991 hramadzianami dziaržavy-ahresara, za vyklučeńniem byłych hramadzian dziaržavy-ahresara, jakija na momant śmierci byli hramadzianami Ukrainy i nie mieli hramadzianstva dziaržavy-ahresara».

• 2
• 0
• 0
• 0
• 0
• 0
• 0
• 0