U siecivie źjaviłasia finalnaja viersija filma «Kupała», jaki ŭłady nie puścili ŭ prakat
Stužku kinastudyi «Biełaruśfilm» pra biełaruskaha paeta Janku Kupału znoŭ vykłali ŭ internet. Na hety raz mastackuju karcinu Uładzimira Jankoŭskaha, jakaja lažyć na palicy z 2020 hoda, možna pahladzieć u dobraj jakaści i z anhlijskimi subcitrami, jak zaŭvažyŭ reform.by.
Novaja viersija filma źjaviłasia ŭ siecivie ŭ dzień narodzinaŭ kłasika biełaruskaj litaratury — 7 lipienia.
Napeŭna chtości, chto maje dostup da kino, vyrašyŭ nahadać pra los biełaruskaha paeta dy pra prajekt kinastudyi, jaki sapraŭdy možna nazvać nacyjanalnym. U adroźnieńnie ad apošnich karcin «Biełaruśfilma», jakija «trymajuć kurs» na ahulnuju savieckuju historyju i stvarajucca na 80 adsotkaŭ z udziełam rasijskich akcioraŭ i režysioraŭ, «Kupała» źviartaŭsia da biełaruskaj identyčnaści i byŭ zrobleny vysiłkami pieravažna ajčynnych kiniematahrafistaŭ.
«Film apaviadaje pra dramatyčny los narodnaha paeta Biełarusi Janki Kupały. U karcinie raskryvajucca asnoŭnyja viechi žyćciovaha i tvorčaha šlachu paeta, jakija supali z najbolš trahičnymi padziejami XX stahodździa», — havorycca ŭ anatacyi.
Kino, jakoje płanavałasia da vychadu ŭ prakat u kancy 2020 hoda, trapiła ŭ sučasny hramadska-palityčny kantekst — i vybuchnuła. Jakraz tamu karcinu pakłali na palicu, i jana lažyć tam da hetaj pary — nadta šmat paralelaŭ z sučasnaj historyjaj, dy i režym ciapier vybudoŭvaje naratyŭ adzinaj z Rasijaj kulturnaj prastory. «Kupała» vyjaviłasia stužkaj, jakaja pačała «hulać sama za siabie», a nie pa naviazanych joj praviłach — i stała nadta niebiaśpiečnaj.
Darečy, film Uładzimira Jankoŭskaha nie adnojčy traplaŭ u suśvietnaje pavucińnie. U 2020 hodzie vykłali «čarnavuju» viersiju karciny — i hety precedent vyklikaŭ sapraŭdny skandał, bo byŭ spadzieŭ, što stužku raniej ci paźniej pakažuć.
Paŭhoda tamu ŭ internecie adbyłasia jašče adna pirackaja «premjera», jakaja nie nadta adroźnivałasia ad papiarednaha «čarnaviku» — i jaje ŭspryniali bolš łahodna. Bo stała zrazumiełym, što «Kupała» budzie lažać na palicy jašče doŭha.
Ciapier ža «finalny» varyjant słynnaha prajekta znoŭ staŭ dastupny dla hledača. I padobna da taho, što heta jon i jość. Z techničnych paramietraŭ možna adznačyć jakaść vyjavy i anhlijskija subcitry. Ale paćvierdzić abo abvierhnuć, ci jość čarhovaja viersija aryhinałam, pa-raniejšamu mohuć tolki jaje stvaralniki.
U filmie zdymalisia Mikałaj Šestak, Vieranika Plaškievič, Uładzimir Jankoŭski, Alaksandr Abramovič, Alena Hironak, Hanna Pałupanava, Uładzimir Jankoŭski, Alaksandr Jafremaŭ, Alaksandr Iljin, Maksim Krečataŭ, Uładzimir Hłotaŭ.
Nad scenaryjem pracavali Alena Kalunava, Alaksandra Barysava, Uładzimir Jankoŭski.
Apieratar — Ilja Puhačoŭ. Kampazitar — Uładzimir Sivicki.
Što za čamadan nosić kala Łukašenki jahony achoŭnik? Nie, tam nie jadziernaja knopka20
Kamientary