Biełarusy znoŭ mohuć padać zajaŭku na ŭdzieł u prestyžnaj amierykanskaj adukacyjnaj prahramie

Prahrama «Fułbrajt» dla zamiežnych studentaŭ (The Fulbright Foreign Student Program) prapanuje poŭnaje finansavańnie na navučańnie ŭ amierykanskich univiersitetach z metaj atrymańnia stupieni mahistra. Hrant pakryvaje vydatki na navučańnie, avijabilety, a taksama ŭklučaje štomiesiačnuju stypiendyju, miedycynskuju strachoŭku i vizavuju padtrymku (u tym liku dla siamiejnikaŭ). Padčas prahramy taksama jość mahčymaść stažyravacca ŭ amierykanskich arhanizacyjach. Akramia biełaruskaha hramadzianstva kandydaty pavinny mieć zakončanuju vyšejšuju adukacyju i vydatna vałodać anhlijskaj movaj. Dadatkovuju infarmacyju i anłajn-ankietu možna znajści pa spasyłcy.

Prahrama «Fułbrajt» dla navukoŭcaŭ i daśledčykaŭ (The Fulbright Visiting Scholar Program) prapanuje mahčymaść pravodzić daśledavańni abo čytać lekcyi ŭ adnym z univiersitetaŭ ZŠA (vybranym samastojna abo z dapamohaj prahramy) na praciahu 3-6 miesiacaŭ. Kandydaty musiać pracavać va ŭniviersitetach abo daśledčych ŭstanovach (u tym liku NDA) u Biełarusi abo inšych krainach, mieć navukovuju stupień kandydata abo doktara navuk i dobra vałodać anhlijskaj movaj. Udzielniki atrymlivajuć finansavańnie na mižnarodnyja pieraloty, štomiesiačnuju stypiendyju i dadatkovyja adnačasovyja vypłaty na nabyćcio litaratury, uładkavańnie na novym miescy i h. d., vizavuju padtrymku (u tym liku dla siamiejnikaŭ), a taksama miedycynskuju strachoŭku. Dadatkovuju infarmacyju i anłajn-ankietu možna znajści pa spasyłcy.

Prahrama «Fułbrajt» dla vykładčykaŭ VNU (The Fulbright Faculty Development Program) prapanuje prafiesijnuju stažyroŭku na praciahu adnaho siemiestra biez atrymańnia akademičnaj stupieni. Prahrama ŭklučaje znajomstva z adukacyjnymi kursami, raspracoŭku navučalnych prahram, zbor materyjałaŭ, naviedvańnie kanfierencyj, supracu z amierykanskimi kalehami, praviadzieńnie prezientacyj. Udzielnikam apłačvajuć mižnarodnyja i ŭnutranyja pieraloty, miedycynskuju strachoŭku i štomiesiačnuju stypiendyju. Kandydaty musiać źjaŭlacca vykładčykami ŭstanoŭ vyšejšaj adukacyi ŭ Biełarusi ci inšaj krainie, mieć dośvied vykładańnia nie mienš za dva hady, vyšejšuju adukacyju, a taksama dobra vałodać anhlijskaj movaj. Dadatkovuju infarmacyju i anłajn-ankietu možna znajści pa spasyłcy.  

Prahrama stypiendyj Chjubierta Chamfry (Hubert H. Humphrey Fellowship Program) daje mahčymaść navučacca va ŭniviersitecie na ŭzroŭni mahistratury i adnačasova ŭdaskanalvać svajo prafiesijnaje majsterstva ŭ ZŠA na praciahu hoda biez atrymańnia akademičnaj stupieni. Kandydaty pavinny mieć vyšejšuju adukacyju, nie mienš za 5 hadoŭ dośviedu pracy ŭ adpaviednaj halinie, dobra vałodać anhlijskaj movaj, a taksama demanstravać lidarskija jakaści i imknieńnie prynosić karyść hramadstvu. Prahrama apłačvaje mižnarodnyja pieraloty, košt navučańnia va ŭniviersitecie, miedycynskuju strachoŭku, a taksama štomiesiačnuju stypiendyju i adnarazovyja vypłaty (srodki dla nabyćcia padručnikaŭ, udziełu ŭ prafiesijnych mierapryjemstvach i h. d.). Prahrama taksama prapanuje vizavuju padtrymku (u tym liku dla siamiejnikaŭ). Dadatkovuju infarmacyju i anłajn-ankietu možna znajści pa spasyłcy. 

Zajaŭki na dadzienyja prahramy prymajucca da 23:59 (pa minskim časie) 3 vieraśnia 2023 hoda. Prahramy dastupnyja dla ŭsich hramadzian Biełarusi, jakija adpaviadajuć patrabavańniam, niezaležna ad ich miesca žycharstva ŭ ciapierašni čas. Dadatkovaja infarmacyja ab hetych i inšych adukacyjnych mahčymaściach — na sajcie Amierykanskich savietaŭ pa mižnarodnaj adukacyi. Pytańni možna nakiravać na [email protected].

• 2
• 0
• 0
• 0
• 0
• 1
• 1
• 0