Sudździu, jaki asudziŭ Ašurka i Aŭtuchoviča, pryznačyli ŭ Viarchoŭny sud
Łukašenka 31 lipienia padpisaŭ ukaz № 243 «Ab pryznačeńni i vyzvaleńni sudździaŭ», jakim pryznačyŭ troch novych sudździaŭ Viarchoŭnaha suda. Adzin ź ich — Maksim Fiłataŭ, jaki zdabyŭ usiebiełaruskuju viadomaść za svaju biaźlitasnaść padčas praviadzieńnia masavych represij.
Maksim Fiłataŭ u 2020 hodzie byŭ sudździoj Lidskaha rajonnaha suda, i siarod asudžanych im tady byŭ Vitold Ašurak, jaki atrymaŭ ad Fiłatava piać hadoŭ źniavoleńnia i paśla zahinuŭ pry da hetaj pary niavyśvietlenych abstavinach u škłoŭskaj kałonii.
Ale Ašurak byŭ tolki adnym z mnohich, chto prajšoŭ praz kanviejer sudoŭ Fiłatava. Niezdarma jon u pačatku 2022 hoda atrymaŭ pavyšeńnie ŭ sudździ Hrodzienskaha abłasnoha suda, a voś ciapier, usiaho krychu bolš jak praz paŭtara hoda, padniaŭsia jašče vyšej.
Mienavita Fiłataŭ vynies hihanckija prysudy byłomu afhancu Mikałaju Aŭtuchoviču i hrupie źviazanych ź im aktyvistaŭ i siamji śviatara.
Apošni hučny praces z udziełam Maksima Fiłatava — niadaŭni sud u Hrodnie nad žurnalistam Paŭłam Mažejkam i advakatkaj Julijaj Jurhilevič. 26 lipienia Fiłataŭ prysudziŭ Mažejku šeść hadoŭ uzmocnienaha režymu, a Jurhilevič — šeść hadoŭ ahulnaha režymu.
Ź Fiłatavym źviazany i adzin pikantny epizod. Paśla suda nad Ašurkam u Lidzie jamu adnojčy padkłali ŭ zaplečnik fiekalii, pakul jon zajmaŭsia ŭ trenažornaj zale.
Akramia Fiłatava, novymi sudździami Viarchoŭnaha suda pryznačany Alena Rudnickaja i Rusłan Caruk. Pieršaja dahetul była sudździoj Minskaha haradskoha suda, druhi — Homielskaha abłasnoha suda.
Caruk, jak i Fiłataŭ, taksama maje słavu sudździ-«pieradavika», jahonaje proźvišča fihuruje ŭ mnohich pracesach nad zatrymanymi pa palityčnych mierkavańniach na Homielščynie. I chod karjery ŭ ich padobny. Raniej Caruk pracavaŭ u Śvietłahorskim rajonnym sudzie, ale chvala represij dazvoliła jamu padniacca spačatku na abłasny ŭzrovień, a ciapier i na samy vysoki.
Łukašenku stała drenna na samicie ŠAS u Kazachstanie — Dožd́7
Kamientary