Čamu ŭ Pieciarburhu masava harać novyja aŭtobusy MAZ? Nastupstvy sankcyj
Tolki ciaham lipienia ŭ Sankt-Pieciarburhu zhareli dva aŭtobusy MAZ. Usiaho, pavodle adkrytych źviestak i publikacyj u miedyja, u 2022 hodzie ŭ horadzie było zafiksavana nie mienš za vosiem padobnych vypadkaŭ, za 2023 hod — užo dzieviać. Bolšaść zharełych aŭtobusaŭ biełaruskaj vytvorčaści. «Naša Niva» vyśvietliła, što stała prablemaj.
![](http://nashaniva.com/img/w840d4webp1/photos/z_2023_08/dsc04695-t6a2a.jpg.webp)
Aŭtobusy z ahieńčykam
U miežach transpartnaj reformy Sankt-Pieciarburha horad zamoviŭ kala tysiačy aŭtobusaŭ biełaruskaj vytvorčaści. Bolšaść skłała madel MAZ-206. Taksama pastaŭlali MAZ-203 roznych madyfikacyj, ale ŭ značna mienšych abjomach, čym MAZ-206. Pieršyja partyi novych MAZaŭ u aŭtaparki Sankt-Pieciarburha pryvieźli viasnoj 2022 hoda.
![](http://nashaniva.com/img/w732d4webp1/photos/z_2023_08/-xsein.jpeg.webp)
Tady va ŭračystaj pieradačy aŭtobusaŭ udzielničali hubiernatar Sankt-Pieciarburha Alaksandr Biahłoŭ, premjer-ministr Biełarusi Raman Hałoŭčanka i ministr pramysłovaści Piatro Parchomčyk.
Nieŭzabavie paśla vychadu aŭtobusaŭ na maršruty pačali źjaŭlacca naviny pra ich uzharańni.
![](http://nashaniva.com/img/w732d4webp1/photos/z_2023_08/-rfd49.jpeg.webp)
Jak vyśvietliła «Naša Niva», aproč ahulnaviadomych vypadkaŭ, kali aŭtobusy całkam ci amal całkam vyharali, chapała i drobnych incydentaŭ, kali karektna spracoŭvała sistema pažaratušeńnia matornaha adsieka, i praz heta aŭtobus nie vyharaŭ, choć i adbyvałasia zadymleńnie sałona.
Čamu harać novyja aŭtobusy?
Asnoŭnaja prablemnaja detal, z-za jakoj adbyvajecca ŭzharańnie aŭtobusaŭ, — heta hidrapryvad vientylatara. Ab prablemie dobra viedajuć jak u picierskich aŭtaparkach, hetak i na zavodzie ŭ Minsku.
Na prablemy z hidrapryvadam skardzilisia jašče minułym letam. Ale vyrašyć jaje, jak bačym, nie zmahli, bo aŭtobusy praciahvajuć hareć.
«Śpiecyjalisty MAZa nie vyklučajuć imaviernaści taho, što va ŭmovach sankcyjnaha cisku i parušeńniaŭ łahistyčnych łancužkoŭ pry pastaŭkach kamplektaŭ hidrapryvada mahła adbycca zamiena pravieranych fłancaŭ na inšyja, anałahičnyja pa techničnych charaktarystykach, ale jakija nie majuć pravieranych refierencyj», —
kazaŭ jašče ŭ červieni 2022 hoda vice-hubiernatar Sankt-Pieciarburha Kirył Palakoŭ. Prajšoŭ hod, ale aŭtobusy ŭsio adno harać.
![](http://nashaniva.com/img/w732d4webp1/photos/z_2023_08/maz00jpeg-bwg2c.jpg.webp)
Pavodle infarmacyi «Našaj Nivy», apošni raz bryhada ź minskaha zavoda sumiesna z pradstaŭnikami MAZa ŭ Rasii pryjazdžała ŭ Sankt-Pieciarburh u siaredzinie lipienia. Jany pravodzili dadatkovy ahlad aŭtobusaŭ, vykonvali zamienu ŭščylnialnych kolcaŭ la štucara i znoŭ pravodzili kankretnyja pravierki madeli MAZ-203. Zavodskija bryhady vykonvali pracy na placoŭkach aŭtaparkaŭ.
Kažuć, što padobnyja praktyki vyjaŭleńnia niedachopaŭ aktyvizavali jašče letaś, kali ŭ Pieciarburhu tolki pačali masava zaharacca aŭtobusy.
U 206-j madeli takoj kanstrukcyi niama, tamu i ŭzharańni takich aŭtobusaŭ — redkaść. Ale, jak stała viadoma «Našaj Nivie», sama mieniej adzin 206-y MAZ u Sankt-Pieciarburhu taksama zaharaŭsia. Pryčynaj było karotkaje zamykańnie ŭ elektrapravodcy.
«Va ŭsich astatnich vypadkach uzharańni adbyvajucca ŭ 203-j madeli. Usio praz hidrapryvad. Ź jaho pačynaje ciačy aliva, jakaja traplaje na mocna nahretyja častki ruchavika, ad čaho i zdarajecca ŭzharańnie, — raskazaŭ «Našaj Nivie» znajomy ź situacyjaj čałaviek.
— Usie aŭtobusy z adnoj pastaŭki. To-bok heta ŭsio transpart 2022 hoda vypusku».
Hetyja aŭtobusy z honaram nazyvali «antysankcyjnymi».
«Pradstaŭniki zavoda jaje [madel] prezientavali jak «antysankcyjnuju»: u mašynie adsutničajuć kamplektujučyja z zachodnich krain», — havaryłasia ŭ artykule, apublikavanym na sajcie transportspb.com.
Reč u tym, što da 2021 hoda Minski aŭtamabilny zavod supracoŭničaŭ z Mercedes, ruchaviki jakoha staviŭ na ajčynnyja aŭtobusy.
Na zamienu niamieckim ruchavikam ad Mercedes pryjšli ruchaviki kitajskaj firmy Weichai, łakalizavanyja ŭ Biełarusi. Zamiest amierykanskaj aŭtamatyčnaj karobki pieradač firmy Allison na MAZie pačali stavić kitajskuju FastGear, a partalny most niamieckaj ZF byŭ zamienieny na kitajski Hande. Astatnija detali vyrablajucca biełaruskimi i rasijskimi pradpryjemstvami.
Adznačym, što, aproč biełaruskich MAZaŭ, u Piciery adbyvalisia ŭzharańni rasijskich Volgabus. U ich z našymi MAZami jość jak minimum adzin adnolkavy vuzieł — kitajski ruchavik. Nakolki viadoma «Našaj Nivie», pryčyny ŭzharańnia tyja samyja, što i ŭ MAZaŭ.
Paśla čarhovaha incydentu ŭ Sankt-Pieciarburhu z 2 žniŭnia prypynili ekspłuatacyju biełaruskich aŭtobusaŭ MAZ. Paśla čaho MAZ prakamientavaŭ źniaćcie svaich aŭtobusaŭ z rejsaŭ u Sankt-Pieciarburhu i adznačyŭ, što pracuje nad zaŭvahami.
«Naša Niva» — bastyjon biełaruščyny
PADTRYMAĆHruzija zabaraniaje, a Litva ŭzmacniaje kantrol. Nabyć mašynu sa Štataŭ stanie jašče składaniej
Mašyna jak vino. Čamu ŭ Biełarusi rastuć ceny na aŭtamabili rodam z nulavych
Ci zhnili Geely? Kolki kaštujuć i jak vyhladajuć patrymanyja biełaruska-kitajskija aŭto
Kamientary
Tolko jabaťkam možno