Nijakich dasiahnieńniaŭ, zatoje dośvied pracy ŭ aŭtarytaryźmie. Raskazvajem pra novaha treniera futbolnaj zbornaj Biełarusi

Karłas Ałos naradziŭsia ŭ ispanskaj Katałonii ŭ 1975 hodzie, tam ža pačaŭ i karjeru hulca. Jaho ampłua — hałkipier. Kali jamu było 18, Fierer zajhraŭ u Club Deportiu Tortosa — kamandzie jaho rodnaha horada. U jaho žyćci byli i inšyja ispanskija kłuby, ale za hulniavuju karjeru Karłas Ałos tak i nie zdoleŭ padniacca vyšej za čaćviorty ispanski dyvizijon. U 2008 hodzie, kali ispancu było 33 hady, jon skončyŭ šlach hulca — na toj čas Fierer vystupaŭ za kamandu CF Jesús Catalonia.

U 2003-m, niezadoŭha da kanca hulniavoj karjery, katałoniec pasprabavaŭ siabie ŭ trenierstvie. Pačaŭ z kłuba CF Amposta, dzie vystupaŭ sam, — tam Fierer staŭ pracavać z moładździu. U 2008-m jon trapiŭ na trenierskuju pasadu jašče adnaho sa svaich byłych kłubaŭ — CD Tortosa, ale adyšoŭ adtul u lutym 2009-ha i adrazu ž dałučyŭsia da rady dyrektaraŭ kłuba. U nastupnym hodzie katałoniec atrymaŭ pieršuju prapanovu papracavać za miažoj: jaho paklikali jak asistenta treniera ŭ futbolnuju akademiju kłuba Kitchee SC, jaki vystupaje ŭ hankonhskaj premjer-lizie. Ale i tam Fierer zatrymaŭsia tolki na try miesiacy.

Paśla Kitaja Karłas Ałos Fierer pierabraŭsia ŭ Polšču, dzie ŭznačaliŭ akademiju «Barsiełony». U 2015-m jon pačaŭ pracavać z polskaj kamandaj Pogoń Siedlce, ale pakinuŭ jaje paśla čatyroch miesiacaŭ. Dalej byli moładzievaja zbornaja Kazachstana (vosiem miesiacaŭ), kazachstanski kłub «Kajrat» (15 miesiacaŭ), marakanski FAR (šeść miesiacaŭ), zbornaja Katara (dva miesiacy) i kiprskaja kamanda «EN Paralimni» (piać miesiacaŭ). U sakaviku 2022-ha Fierer uznačaliŭ zbornuju Ruandy, dzie pratrymaŭsia da pryznačeńnia ŭ Biełaruś, to-bok amal paŭtara hoda — dla jaho heta rekord.

Jak jamu pracavałasia? Voźmiem, dziela prykładu, Ruandu, dzie trenier za taki doŭhi čas, napeŭna, zdoleŭ by vybudavać choć niejkuju sistemu i trochi pakazać siabie. Za čas ź Fiereram ruandyjskaja zbornaja adyhrała ŭ čatyroch tavaryskich hulniach, vyniki — adna pieramoha, dźvie ničyi i adna paraza. Zbornaja vystupała i ŭ kvalifikacyi Kubka afrykanskich nacyj, vyniki tam — parazy ŭ dvubojach z macniejšymi Sieniehałam i Mazambikam i ničyi, znoŭ ža, z Mazambikam i Bieninam.

Ruandyjcam zastałosia adyhrać tolki adzin matč u hrupie (ź Sieniehałam). Ciapier u ich tolki dva ački i apošniaje miesca ŭ hrupie. Naŭrad ci ruandyjcy projduć dalej u kvalifikacyi Kubka, chacia Fierer i ličyŭ heta adnoj sa svaich zadač na pasadzie.

Amal z usich trenierskich pasad katałonca zvalniali. Vyklučeńnie (i toje farmalnaje) — chiba što praca z kiprskim «EN Paralimni». Adtul Fierer, zhodna ź jaho zajavaj, adyšoŭ, bo praz pandemiju i ŭłasny kavid nie moh naležnym čynam pracavać z kamandaj. Tym nie mienš pa vynikach taho siezona kamanda pajšła ŭ nižejšuju lihu.

Za ŭsiu trenierskuju karjeru Fierer tolki adnojčy zavajavaŭ trafiej. Było heta ŭ kastryčniku 2017-ha, kali «Kajrat», tady ŭznačaleny katałoncam, pieramoh «Aktabe» ŭ finale Kubka Kazachstana. Ale ž heta, chutčej, vynik pracy asistenta treniera Andreja Karpoviča, mienavita jon pracavaŭ z kamandaj u tym turniry. Fierera tady adchilili ad pracy, bo jon nie pahadziŭsia ź idejaj kłubnaha kiraŭnictva hulać u Kubku tolki miascovymi futbalistami.

Trenier viadzie sacsietki, ale publikuje tam zbolšaha farmalnuju infarmacyju: fota z trenirovak i matčaŭ, biaskryŭdnyja siamiejnyja zdymki. Chacia časam tam traplajucca i takija kałarytnyja kadry. 

Ikipe y'Amavubi yageze i @GisagaraDistr aho igiye gukomereza umwiherero

Amavubi yakiranwe ubwuzu n'Ubuyobozi n'Abaturage ba Gisagara. pic.twitter.com/5p1MsQQK9A

— Rwanda FA (@FERWAFA) June 15, 2023

Biełaruś budzie nie pieršaj aŭtarytarnaj krainaj, dzie Fierer uznačalić zbornuju, bo padobnyja rysy jość i ŭ palitycy Ruandy. U 1994 hodzie sotni tysiač žycharoŭ Ruandy, jakija naležali da narodnaści tutsi, stali achviarami hienacydu. Paśla hetaha krainu ŭznačaliŭ Ruandyjski patryjatyčny front — na siońnia heta kiroŭnaja partyja Ruandy.

Kraina demanstruje vysokija dla Afryki tempy rostu VUP — kala 7% štohod, jaje chvalać i za nizki ŭzrovień karupcyi. Ale pry hetym pravaabaroncy adznačajuć u Ruandzie surjoznyja parušeńni pravoŭ čałavieka. Apanientaŭ režymu zatrymlivajuć i časam navat zabivajuć. Heta zdaryłasia, naprykład, z Andre Kahva Rviserekam, vice-prezidentam Partyi zialonych, jakoha abiezhałovili 14 lipienia 2009 hoda — za niekalki dzion da prezidenckich vybaraŭ.

Ruanda — nie adziny vypadak, kali Fierer pracavaŭ u krainach ź nizkim uzroŭniem pravoŭ čałavieka. Pravaabaroncy, naprykład, majuć šmat pytańniaŭ i da Katara, i da Maroka, dzie katałoniec taksama zaśviaciŭsia. Imavierna, Karłas Ałos Fierer razumieje, jak pracavać u sporcie aŭtarytarnych krain, tamu i ŭ Biełarusi jamu moža spadabacca. Inšaje pytańnie — ci pryniasie heta našaj zbornaj doŭhačakany rost.

Kazachstanski žurnalist Ajdyn Kažachmiet raskazaŭ pra toje, jakim Fierera zapomnili pa pracy z «Kajratam». Vysnovy niesuciašalnyja: katałoniec nie mieŭ vialikaha aŭtarytetu ŭ kamandy i pravalvaŭ vyrašalnyja matčy. «Pra Karłasa mahu skazać adno — jon umieje pracavać z maładymi hulcami. Umieje ich raźvivać. Vykonvać bolš surjoznyja zadačy jamu składana», — padsumoŭvaje Kažachmiet.

• 1
• 5
• 3
• 0
• 5
• 3