ZŠA ŭchvalili pieradaču Ukrainie samalotaŭ F-16

Jak piša Reuters, Złučanyja Štaty pahadzilisia adpravić va Ukrainu źniščalniki z Danii i Niderłandaŭ, jak tolki ŭkrainskija piłoty skončać navučańnie.

Vašynhton daŭ Danii i Niderłandam aficyjnyja harantyi, što Złučanyja Štaty paskorać zaćviardžeńnie ŭsich nieabchodnych zapytaŭ trecich bakoŭ na pieradaču F-16 va Ukrainu, kab Ukraina atrymała F-16, jak tolki piłoty projduć navučańnie.

Čym admietnyja samaloty F-16

Źniščalniki F-16 — samyja raspaŭsiudžanyja ŭ śviecie. Usiaho ich vypuščana čatyry z pałovaj tysiačy. Ź ich na ŭzbrajeńni ŭ dvaccaci piaci krainach znachodzicca 2300. Hetyja samaloty składajuć 16% suśvietnaha parku bajavych samalotaŭ.

Hetaja madel vyznačajecca redkaj univiersalnaściu. Pryznačany ŭ asnoŭnym dla pavietranaha boju, samalot taksama moža być vykarystany ŭ jakaści taktyčnaha bambardziroŭščyka, samalota dla naziemnych atak, dla radyjoelektronnaj baraćby abo dla abarony pavietranaj prastory.

Nie źjaŭlajučysia panacejaj, jon efiektyŭny va ŭsich hetych śfierach. 

Pazicyja ZŠA pamianiałasia

Džo Bajden raniej nie raz zajaŭlaŭ, što nie źbirajecca pastaŭlać Ukrainie samaloty. Jon ličyŭ bolš razumnym praciahvać pastaŭki naziemnych sistem abarony. Hetyja sistemy da hetaha času nie dajuć rasijskaj avijacyi, niahledziačy na jaje vidavočnuju pieravahu jak u kolkasnym, tak i ŭ technałahičnym płanie, pranikać za liniju frontu.

Ukraincy ad pačatku vajny addavali pieravahu stratehii «zabarony dostupu da pavietranaj prastory» zamiest «pieravahi ŭ pavietry».

Vialikabrytanija pieršaj pačała davać ukraincam bolšyja mahčymaści, abviaściŭšy ab pastaŭcy rakiet Storm Shadow z maksimalnaj dalokaściu palotu 250 kiłamietraŭ, pry ŭmovie, što ŭkrainskaje vojska nie budzie vykarystoŭvać ich na terytoryi Rasii. Pa śladach Łondana pajšoŭ Paryž. I voś pryjšła čarha Vašynhtona.

Navošta Kijevu F-16

Ad najaŭnaści F-16 zaležać mahčymaści supraćpavietranaj abarony Ukrainy. Pakolki samaloty taksama vykonvajuć rolu latučych zienitnych batarej. Źniščalniki MiH-29 i Su-27, jakija składajuć asnovu ŭkrainskaha avijaparku, znachodziacca na zychodzie svajho terminu słužby. Dyj ich kolkaść nieparaŭnalnaja z rasijskaj.

Analityčny sajt Global Firepower pisaŭ, što na pačatku hoda va ŭkrainskim vajenna-pavietranym fłocie naličvałasia ŭsiaho 187 bajavych samalotaŭ, što ŭ dziesiać razoŭ mienš, čym u rasijskaj armii.

A pres-sakratar ukrainskaha vajenna-pavietranaha fłotu Juryj Ihnat u intervju «Bi-bi-si» zajaŭlaŭ: «Siońnia my nie možam vieści bai na roŭnych umovach z najaŭnymi ŭ nas samalotami. (…) Heta sastarełaje savieckaje abstalavańnie».

Pa słovach Ihnata, samaloty F16 patrebnyja Ukrainie ŭ pieršuju čarhu dla taho, «kab abaranić nas ad rasijskich rakietnych atak suprać našych haradoŭ i našaj krytyčna važnaj infrastruktury» i «dazvolić nam nanosić udary pa varožych naziemnych celach na časova akupavanych terytoryjach».

Ukrainskija ŚMI pisali: dla praciahu efiektyŭnaha zakryćcia nieba pierad varožaj avijacyjaj nieabchodna mieć piać bryhad źniščalnikaŭ, to-bok krychu mienš za dźvieście samalotaŭ. Viadoma, Zachad nie zmoža pastavić až stolki bartoŭ adrazu.

Dyj navučańnie ŭkrainskich piłotaŭ zojmie mienš za šeść miesiacaŭ. Prablema ŭskładniajecca jašče i tym, što nieabchodna taksama zabiaśpiečyć padrychtoŭku nieabchodnaha składu dla absłuhoŭvańnia i zabieśpiačeńnia efiektyŭnaści samalotaŭ: dla adnaho samalota nieabchodna minimum dvanaccać čałaviek. 

Usio heta razam uziataje zmušaje dumać, što pastaŭka F-16 nie adbudziecca chutka, a kali adbudziecca, nie źmienić bałansu siłaŭ radykalna. Tym nie mienš, heta jašče adzin krok u kirunku ŭzmacnieńnia patencyjału Ukrainy.

Čytajcie taksama: U Pavietranych siłach Ukrainy pakazali, što kompleks Patriot źbiŭ dva samaloty i try viertaloty ŭ dzień «samalotapadu» ŭ Branskaj vobłaści

• 26
• 0
• 0
• 2
• 1
• 0
• 1
• 0