Aryštavanyja aktyvy iduć na finansavańnie vajskovych vydatkaŭ.
Ułady Ukrainy aryštavali abo kanfiskavali rasijskija i biełaruskija aktyvy na sumu amal $2 młrd. Pra heta paviedamiŭ ministr Kabinieta ministraŭ Ukrainy Aleh Niamčynaŭ. Pavodle jahonych słoŭ, aryštavanyja aktyvy iduć na finansavańnie vajskovych vydatkaŭ, piša Kommersant.
«Uklučajučy tyja aktyvy, jakija znachodziacca va ŭpraŭleńni Nacyjanalnaha ahienctva Ukrainy pa pytańniach vyjaŭleńnia, vyšuku i kiravańnia aktyvami, heta bolš za 70 młrd hryŭniaŭ ($1,915 młrd)»,— paviedamiŭ Aleh Niamčynaŭ u efiry ŭkrainskaha telekanała «Rada».
Jak raspavioŭ ministr, častku kanfiskavanych aktyvaŭ pieradajuć ukrainskaj armii i siłavym strukturam, astatnija — Fondu dziaržmajomaści. Bijapaliva i amijak pradajuć z aŭkcyjonu, a atrymanyja srodki zatym układvajuć u ablihacyi — za košt ich finansujucca vajennyja vydatki.
U pryvatnaści, va Ukrainie aryštavanyja abo kanfiskavanyja Demurynski horna-abahačalny kambinat (pavodle źviestak ukrainskich uład, jaho bienieficyjarny ŭładalnik — rasijski biznesoviec Michaił Šaŭkoŭ), aktyvy rasijskaha biznesoŭca Aleha Dzierypaski, a taksama troch rasijskich bankaŭ. Ahułam aryštavana bolš za 3,5 tys. abjektaŭ žyłoj nieruchomaj majomaści, amal 4 tys. abjektaŭ niežyłoj nieruchomaj majomaści.
Pa słovach Aleha Niamčynava, praces kanfiskacyi majomaści idzie dosyć pavolna. Heta abumoŭlena tym, što ŭkrainskija ŭłady chočuć vykanać usie jurydyčnyja pracedury, bo paśla zakančeńnia vajennych dziejańniaŭ uładalniki aktyvaŭ mohuć źviarnucca ŭ sud.
Ciapier čytajuć
Vyśvietlili, dzie adbyvaŭsia «dopyt» kalinoŭca Vasila Hračychi13
Kamientary