Pryhožyn i Utkin zahinuli, ich samalot raźbiŭsia nad Vałdajem. Što viadoma na hety momant
U adnym materyjale sabrali infarmacyju pra katastrofu samalota kiraŭnika «Vahniera» i pieršyja reakcyi. «Śmierć Pryhožyna pakazała, čaho vartyja «harantyi biaśpieki», vydadzienyja Łukašenkam», — zajaviła Śviatłana Cichanoŭskaja.
Viečaram Ministerstva nadzvyčajnych situacyj Rasii paviedamiła, što ŭ Ćviarskoj vobłaści raźbiŭsia biznes-džet, jaki naležaŭ Jaŭhienu Pryhožynu. Heta zdaryłasia prykładna za 50 kiłamietraŭ ad vałdajskaj rezidencyi Uładzimira Pucina, jakuju achoŭvajuć kompleksy supraćpavietranaj abarony.
U 17:54 Embraer ERJ-135BJ Legacy 600 vylecieŭ z maskoŭskaha aeraporta «Šaramiećcieva» ŭ sankt-pieciarburhskaje «Pułkava». Pa danych «112», biznes-džet źnik z radaraŭ praz 26 chvilin paśla vyletu, a na šmatrazovyja vykliki dyśpietčara ekipaž nie reahavaŭ.
Samalot upaŭ u rajonie nasielenaha punkta Kužankina i zahareŭsia.
Vidavočcy z navakolnych viosak źniali hety momant na videa. Miarkujučy pa zapisach, u samalot abo trapiła rakieta, abo na jaho borcie adbyŭsia vybuch. Abłomki samalota raźlacielisia ŭ radyusie niekalkich kiłamietraŭ, što paćviardžaje viersiju pra vybuch.
Na borcie znachodziłasia 10 čałaviek, ź ich 3 členy ekipaža. Usie, chto znachodziŭsia na borcie, zahinuli.
Ekipaž z troch čałaviek i ŭsie siem pasažyraŭ pamierli da pryjezdu miedykaŭ.
Paśla karotkaha pieryjadu niapeŭnaści rasijskija miedyja, a taksama telehram-kanały, źviazanyja z vahnieraŭcami, paviedamili, što Pryhožyn byŭ na borcie samalota.
Taksama, pavodle danych Rasavijacyi, pry krušeńni biznes-džeta zahinuŭ kamandzir PVK «Vahnier» Dźmitryj Utkin. Ad jaho pazyŭnoha — «Vahnier» — vajskovaja kampanija i atrymała svaju nazvu.
Jak paviedamlała spačatku TASS sa spasyłkaj na adzinuju dziažurna-dyśpietčarskuju słužbu Bałahoŭskaha rajona, ratavalniki, jakija prybyli na miesca krušeńnia samalota ŭ Ćviarskoj vobłaści, dastali z-pad abłomkaŭ cieły siami čałaviek.
Naprykancy dnia 23 žniŭnia ahienctva «Interfaks» paviedamiła, što pošukavaja apieracyja na miescy krušeńnia biznes-džeta Pryhožyna zavieršanaja.
«Na miescy katastrofy znojdzienyja pareštki 10 čałaviek: siami pasažyraŭ i troch členaŭ ekipaža», — zajaviŭ surazmoŭca ahienctva.
Pryčyna krušeńnia samalota Pryhožyna dakładna nieviadomaja. Źviazany z PVK «Vahnier» telehram-kanał Grey Zone paviedamiŭ, što samalot byŭ źbity rakietaj SPA, padviedamnaj Ministerstvu abarony Rasii.
Pa słovach vajskovaha ekśpierta Juryja Fiodarava, na borcie biznes-džeta adbyŭsia vybuch.
Śledčy kamitet Rasii zavioŭ pa fakcie katastrofy kryminalnuju spravu ab parušeńni praviłaŭ biaśpieki ruchu i ekspłuatacyi pavietranaha transpartu.
Kanał RBK paviedamiŭ, što śledstva razhladaje ŭsie viersii krušeńnia samalota Pryhožyna, u tym liku pamyłku piłota i «źniešniaje ŭździejańnie».
Krynica ŭ rasijskaj uładzie paviedamiła The Moscow Times, što pobač ź miescam padzieńnia samalota Jaŭhiena Pryhožyna, niepadalok ad rezidencyi Uładzimira Pucina na Vałdai, stajać čatyry dyvizijony S-300, jakija achoŭvajuć rezidencyju. Pavodle słoŭ krynicy, toje, što adbyłosia z samalotam Pryhožyna, i miesca padzieńnia — nie vypadkovaść, a, chutčej za ŭsio, pakarańnie za miaciež.
Teleram-kanał «Caŕhrad» sa spasyłkaj na svaju krynicu paviedamiŭ, što cieły Jaŭhiena Pryhožyna i Dźmitryja Utkina «papiarednie apaznali». Taksama kanał paviedamlaje sa spasyłkaj na krynicu ŭ kamisii Rasavijacyi, što samalot Pryhožyna nibyta byŭ padarvany. Aficyjnaha paćviardžeńnia hetaj infarmacyi niama.
Telehram-kanał Grey Zone, nabližany da «Vahniera», paćvierdziŭ hibiel Pryhožyna. Raniej hety samy kanał zaklikaŭ čakać pravieranuju infarmacyju.
Inšy rasijski telehram-kanał Readovka sa spasyłkaj na krynicy zajaviŭ, što nibyta adbyvajecca narada kamandziraŭ PVK «Vahnier», i pa jaje vynikach budzie apublikavanaja zajava.
Miž tym kala «PVK Vahnier Centra» ŭ Sankt-Pieciarburhu źjaviŭsia stychijny miemaryjał — ludzi niasuć tudy kvietki i zapalvajuć łampadki.
Uviečary byli taksama fota, što vokny ŭ byłym ofisie «Vahniera» śviacilisia ŭ formie kryža, ale paviedamlajecca, što takoje nazirałasia apošnija miesiacy.
Telehram-kanał «Biełaruski Hajun» paviedamiŭ, što ŭ rajonie vioski Cel Asipovickaha rajona, dzie znachodzicca palavy łahier vahnieraŭcaŭ, jość prablemy z mabilnaj suviaźziu.
Kali vy nazirajecie važnaje i cikavaje, asabliva ŭ rajonach raźmiaščeńnia vahnieraŭcaŭ u Biełarusi, dasyłajcie infarmacyju redaktaru «Našaj Nivy» ŭ telehram ci na [email protected].
Albo pišycie asabista tym žurnalistam i redaktaram «Našaj Nivy», jakich vy viedajecie i jakim daviarajecie (lepš — u sihnał ci telehram).
Śmierć Pryhožyna stavić u tonkuju situacyju i Alaksandra Łukašenku. Mienavita pad harantyi Łukašenki, pavodle aficyjnaj viersii, Pryhožyn spyniŭ ruch na Maskvu, a jaho siły vyjechali ŭ Biełaruś. Vychodzić, słova Łukašenki ničoha nie značyć.
U kułuarach ža chodziać inšyja čutki: što Alaksandra Łukašenku ŭ pytańni Pryhožyna pastavili pierad faktam.
Śmierć Pryhožyna prakamientavała i biełaruskaja nacyjanalnaja lidarka Śviatłana Cichanoŭskaja.
«Pa Pryhožynie ŭ Biełarusi nie buduć sumavać. Jon byŭ zabojcam, i jaho treba pamiatać takim. Čakajem likvidacyi hrupoŭki «Vahniera» ŭ Biełarusi, što źnizić pahrozu našaj krainie i susiedziam. Śmierć Pryhožyna pakazała, čaho vartyja «harantyi biaśpieki», vydadzienyja Łukašenkam», — zajaviła Śviatłana Cichanoŭskaja.
Čytajcie jašče:
Telehram-kanał Grey Zone, nabližany da «Vahniera», paćvierdziŭ hibiel Pryhožyna
Bieły dom adreahavaŭ na padzieńnie borta Pryhožyna
Pobač ź miescam padzieńnia samalota Pryhožyna stajała čatyry dyvizijony S-300 — The Moscow Times
U samalocie, aprača Pryhožyna, moh być i Utkin-Vahnier — miedyja
Śledčyja razhladajuć niekalki viersij krušeńnia samalota Pryhožyna — RBK
Ratavalniki dastali z-pad abłomkaŭ «Embrajera» cieły siami čałaviek
«Padlik hałasoŭ jak sataniscki rytuał». Były člen kamisii raskazaŭ, jak u Biełarusi falsifikujuć vybary11
Kamientary