Biełarusku Janu Šostak vyklučyli sa śpisa kandydataŭ na vybarach u polski Siejm. Usio praz pazicyju nakont abortaŭ
Kandydaturu Šostak rekamiendavała partyja «Zialonyja», jakaja ŭvachodzić u «Hramadzianskuju kaalicyju», ale ciapier jana prapanuje novaha kandydata dla śpisa.
Biełaruska Jana Šostak nie budzie bałatavacca ŭ polski Siejm u śpisie «Hramadzianskaj kaalicyi». Pra heta paviedamlaje RAR sa spasyłkaj na kiraŭnika «Hramadzianskaj płatformy» ŭ Padlaskim vajavodstvie Kšyštafa Truskalaskaha, piša Reform.by.
«Spadarynia Jana Šostak nie źjaŭlajecca kandydatkaj «Hramadzianskaj kaalicyi». Heta było rašeńnie našaha sajuźnika i nas jak «Hramadzianskaj płatformy», — cytuje jaho ahienctva.
Kandydaturu Šostak rekamiendavała partyja «Zialonyja», jakaja ŭvachodzić u «Hramadzianskuju kaalicyju», ale ciapier jana prapanuje novaha kandydata dla śpisa. Šostak była numaram 13 u śpisie kaalicyi ŭ 24-j vybarčaj akruzie ŭ Padlaskim vajavodstvie.
Polskaje dziaržaŭnaje ahienctva źviazvaje rašeńnie ź intervju Šostak partału Onet, u jakim jana zajaviła, što padtrymlivaje dazvoł na aborty na praciahu ŭsiaho terminu ciažarnaści.
Hetyja vykazvańni raskrytykavała vice-maršałak Siejma ad «Hramadzianskaj kaalicyi» Małhažata Kidava-Błońska.
«Na žal, častka pastułataŭ, ahučanych Janaj, dalokaja ad pastułataŭ «Hramadzianskaj kaalicyi», u šerahach jakoj pryniata pastanova», — skazaŭ ahienctvu sustaršynia «Zialonych» Pšemysłaŭ Słovik.
Janie Šostak 30 hadoŭ. Jana naradziłasia ŭ Hrodnie i z 17 hadoŭ žyvie ŭ Polščy, atrymała polskaje hramadzianstva. Jana viadomaja svaimi pierformansami i akcyjami. Adna ź ich — «Chvilina kryku dla Biełarusi». U 2022 hodzie Šostak stała pieramožcaj prestyžnaha polskaha konkursu Paszporty Polityki.
Parłamienckija vybary ŭ Polščy projduć 15 kastryčnika.
Zdajuć u arendu katedž zahinułaha chakieista Cypłakova. Voś interjery FOTY1
Kamientary