23 vieraśnia projdzie pieršy ŭ historyi Jeŭrapiejski dzień falkłoru. Paŭdzielničać u im mohuć i biełarusy
Jeŭrapiejski dzień falkłoru 2023 — heta piłotny prajekt, dziakujučy jakomu ŭ falkłornaj supolnaści źjavicca ciapier svaja data ŭ štohadovym kalendary. Budzma.org raskazała, jak dałučycca da inicyjatyvy.
Ideja prajekta ŭźnikła padčas dyskusij na EFN — Jeŭrapiejskaj falkłornaj sietcy. Tam chacieli pakazać tuju krytyčnuju masu ludziej pa ŭsioj Jeŭropie, jakija tak ci inakš dałučajucca da falkłornaha mastactva.
Dałučycca da Jeŭrapiejskaha dnia falkłoru moža kožny. Udzieł adkryty dla hurtoŭ, supołak, majsterniaŭ — adnym słovam, usich, chto maje dačynieńnie da falkłornaj dziejnaści ŭ luboj jaje prajavie.
Jak paŭdzielničać u Jeŭrapiejskim dni falkłoru?
- praściej za ŭsio — zapisać videa z vašym vykanańniem, zahruzić jaho ŭ sacyjalnyja sietki i adznačyć teham #europeanfolkday;
- jašče adzin varyjant — pravieści 23 vieraśnia admysłovaje mierapryjemstva ci fiestyval, jaki budzie abvieščany častkaj Jeŭrapiejskaha dnia falkłoru — dla hetaha treba zapoŭnić adpaviednuju formu na sajcie prajekta, i vaša padzieja źjavicca na mapie Jeŭropy;
- a kali vy žurnalist, to možacie zrabić u svaim ŚMI adpaviednyja publikacyi i taksama źviazacca z arhanizatarami;
- jość žadańnie, ale niama idej? Pišam arhanizataram na elektronnuju poštu i źviartajemsia pa dapamohu.
Jak źviazacca z arhanizatarami?
EFN maje nievialikuju kamandu, jakaja kaardynuje prajekt Jeŭrapiejskaha dnia falkłoru. Arhanizatary stvaryli indyvidualnyja elektronnyja listy na roznyja zapyty:
- Pa pytańniach udziełu źviartajciesia da Eryka pa adrasie particip@europeanfolkday.eu
- Pa pytańniach ad žurnalistaŭ i ŚMI źviartajciesia da Araseli pa adrasie media@europeanfolkday.eu
- Pa inšych pytańniach źviartajciesia da Nod pa adrasie info@europeanfolkday.eu
«My ź nieciarpieńniem čakajem, što kožny dałučycca da hetaj novaj ahulnajeŭrapiejskaj inicyjatyvy pa padtrymcy i śviatkavańni tradycyjnaha mastactva supołak pa ŭsioj Jeŭropie. Jeŭrapiejski falkłorny dzień z vami, dla vas, dla nas!», — zaprašaje da ŭdziełu kamanda arhanizataraŭ.
Ideja finansujecca Jeŭrapiejskim sajuzam praz prahramu MusicAIRE.
Kamientary