«Ja ašałomleny»: dzieci ŭ litoŭskaj škole atrymali dziońniki ź simvolikaj režymu Łukašenki i słovami biełaruskaha himna
Biełarusy, jakija ŭciakli ad represij u Litvu, byli ździŭleny tym, što ŭ pieršyja dni novaha navučalnaha hoda ŭ adnoj sa škoł ich dzieci prynieśli sa škoły dziońniki, nabytyja ŭ Biełarusi.
U redakcyju LRT.lt pastupiła infarmacyja ad adnaho z baćkoŭ vučniaŭ himnazii ŭ Hryhiškach pad Vilniaj, što dla dziaciej byli zakuplenyja dziońniki ź simvolikaj režymu Łukašenki i słovami biełaruskaha himna.
U śniežni minułaha hoda siamja Andreja pakinuła Biełaruś praz palityčny pieraśled.
«My pryjechali ŭ Vilniu i ŭ pačatku studzienia ŭładkavali dziaciej u škołu. Dzieci zadavolenyja, im tut padabajecca. Kalektyŭ, nastaŭniki i dyrektar pryniali nas dobra. U pačatku navučalnaha hoda my ŭnieśli nievialikuju sumu, kala troch z pałovaj jeŭra, na dziońniki dla dziaciej. Učora dzicia viarnułasia sa škoły ź biełaruskim dziońnikam i, ščyra kažučy, ja ašałomleny ŭbačanym. Razumieju, hety varyjant tańniejšy, mahčyma, baćkoŭski kamitet ci baćki vyrašyli zekanomić», — skazaŭ Andrej i dadaŭ, što dla jaho heta stała šokam.
«Na hetych dziońnikach byli čyrvona-zialonyja ściahi, jakija nahadvali nam pra Biełaruś, dzie pad takimi ściahami ludziej zabivali i dzie siadziać palitviaźni. Dla mianie hetaja situacyja stała jak sa śvietu fantastyki, što ŭ Litvie ja sutyknusia z takoj prablemaj», — zajaviŭ biełaruski aktyvist.
Mužčyna kaža, što ŭ śniežni spoŭnicca roŭna hod, jak jany pryjechali ŭ Litvu: «My źjechali adtul i ciapier vydychnuli, žyviem spakojna. Dzieci bačyli, jak mianie źbivali, kali ŭ nas doma apošni raz prachodziŭ pieratrusy. Tamu jany vydatna razumiejuć, čamu my pakinuli Biełaruś. Ciapier u našaj krainie paŭsiul hetyja čyrvona-zialonyja ściahi.
I ŭčora, kali ja ŭbačyŭ znoŭ hetyja čyrvona-zialonyja ściahi, to niby nažom u serca».
Andrej vyrašyŭ źviazacca z kłasnaj kiraŭnicaj.
«Bolš za ŭsio ja nie chacieŭ vykazvać svaju niezadavolenaść, bo my ludzi novyja ŭ hetym kłasie. Nas usio raduje, i nam usio padabajecca. Prosta ŭźnikła takaja situacyja, jakoj nichto nie moh pradbačyć. Znoŭ ža, ja ničoha nie maju suprać Biełarusi. Ja suprać łukašenkaŭskich čyrvona-zialonych ściahoŭ, ad jakich my źbiehli. Ciapier naša kraina całkam akupavanaja, i hetyja ściahi viešajuć na kožnym słupie. Razumiejecie?», — kaža biełarus.
Baćka kaža, što adkaz kłasnaj kiraŭnicy jaho trochi ździviŭ: «Jana prapanavała zakleić ściahi abo nadzieć vokładku, kab heta nas nie razdražniała. Kali vam nie padabajecca hety dziońnik, jana skazała, vy možacie nabyć litoŭski. Jon krychu daražejšy, ale tady ŭ vas nie budzie hetaj prablemy».
Andrej kaža, što baćki sprabavali zekanomić.
«Ja vyrašyŭ zajści ŭ internet i pahladzieć na ceny. Sapraŭdy, litoŭski dziońnik kaštuje 6 jeŭra, a dva biełaruskija — 3.5 jeŭra. Vynikovaja ekanomija — 3 jeŭra. Ja taksama za ekanomiju, ale ekanomija koštam padtrymki režymu Łukašenki taho nie varta. Ja byŭ by hatovy zapłacić navat 10 jeŭra za hety dziońnik, aby jon byŭ nie biełaruskim, a litoŭskim», — tłumačyć biełarus.
Kiraŭnictva škoły — nie ŭ kursie
Dyrektarka himnazii ŭ Hryhiškach Chanka Hžyboŭska, u svaju čarhu, zajaviła, što ŭpieršyniu čuje pra incydent. «Infarmacyja dla mianie novaja, ja ničoha nie viedaju», — skazała dyrektarka i paabiacała bolš padrabiazna razabracca ŭ situacyi.
Praź niekatory čas dyrektarka škoły źviazałasia z LRT i skazała, što dziońniki sapraŭdy byli nabyty, ale prablema ŭžo vyrašana.
«Vialiki dziakuj za sihnał. Sapraŭdy, taki incydent adbyŭsia, ale vučni hetych dziońnikaŭ nie atrymajuć, ich užo zabrali. Ja pavinna vybačycca pierad baćkami. Reahavać pavinna była, viadoma, nastaŭnica. Jana kaža, što heta ideja była baćkoŭ, jany vyrašyli kupić takija dziońniki, ale jany nie pavinny byli trapić u ruki dziaciej. Ja zhodna całkam, u hetym jość i maja vina, što nie nahledzieła. Ale hetyja dziońniki nie trapiać u ruki dziaciej», — zajaviła Ch. Hžyboŭska.
Taksama dyrektarka himnazii skazała, što papiarovyja dziońniki nie źjaŭlajucca važnym dakumientam: «Naohuł u nas nie praktykujucca takija dziońniki, u nas jość elektronnyja. Adnak baćki skazali, što im tak budzie lepš, što jany buduć bačyć, što zadadziena i hetak dalej. Baćkoŭski kamitet tolki propisy dapamahaje kuplać, kali patrebna dapamoha, ale ŭ asnoŭnym hetym zajmajucca nastaŭniki, jany sami viedajuć, jakija lepšyja».
Viadoma, što ciapier u škołach Vilni vučycca 506 dziaciej, jakija abrali movaj navučańnia biełaruskuju. Usiaho ž, uklučajučy pryvatnyja škoły, takich vučniaŭ u horadzie 740.
Realnyja ličby mohuć być vyšejšyja, bo ŭkazańnie rodnaj movy nie źjaŭlajecca abaviazkovym.
Ciapier čytajuć
«Nabližajecca momant pierałomu situacyi». Vadzim Kabančuk pra płan dla biełarusaŭ2
«Nabližajecca momant pierałomu situacyi». Vadzim Kabančuk pra płan dla biełarusaŭ
U jakoj raźviedki była najlepšaja infarmacyja ź Biełarusi ŭ lutym 2022 i chto paviedamiŭ Budanavu, što asnoŭny ŭdar rasijan budzie na Hastomiel. Źjaviłasia vialikaja publikacyja1616
Kamientary