«Časam heta moža być łeveł daŭn». Što z pracaj i zarobkami ŭ biełaruskim IT-siektary
Jašče niekalki hadoŭ tamu IT-halinu nazyvali drajvieram rostu biełaruskaj ekanomiki. Internet byŭ poŭny historyj pra lohki ŭvachod u prafiesiju i chutki rost zarobkaŭ. A što ciapier? «Džunam treba być hatovym da taho, što treba budzie pracavać niejki čas za 300—400 dalaraŭ za miesiac».
U paraŭnańni z davajennym pieryjadam zarobki ŭ biełaruskim IT upali. Časam zdarajucca prastoi ci pierachod na čatyrochdzionki. Znajści novuju pracu stała składaniej.
«Znajomyja, jakija nie hatovyja iści na daŭnšyftynh, užo hod nie mohuć znajści pracu», — pryznajecca senior-raspracoŭnik vialikaj biełaruskaj kampanii (senior = staršy).
Siarod inšaha śpiecyjalist adznačaje, što za hety čas na rynku stała mienš zachodnich klijentaŭ.
«Rełakiejt pastupova praciahvajecca, ale asnoŭnaja chvala była ŭ 2022 hodzie. Ëść i tyja, chto, naadvarot, viartajecca ŭ Biełaruś, ale heta adzinkavyja vypadki», — skazaŭ surazmoviec «Našaj Nivy».
Na zavod paśla IT
Kiraŭnik prajekta ŭ inšaj kampanii, śpiecyjalist ź vialikim stažam pracy, adznačaje, što jahonaja zarpłata zastałasia niaźmiennaj, bo zarobak zafiksavany ŭ kantrakcie, a hieahrafija zakazčykaŭ asabliva nie źmianiłasia.
A voś što tyčycca pracaŭładkavańnia džunaŭ, to źmieny jość.
«Śpiecyjalistam biez dośviedu znajści pracu stała składaniej, ja b skazaŭ, niemahčyma, za miažu nichto ich nie voźmie, chiba ŭ jakaści vyklučeńnia, kali heta žonka ci muž IT-śpiecyjalista-sieńjora.
Rełakacyja pavoli praciahvajecca, ale zbolšaha chto chacieŭ, toj užo vyjechaŭ. Litva nie vydaje nacyjanalnych viz dla ŭjezdu, tamu adzinki vyjazdžajuć tudy z šenhienskimi vizami i padajucca na atrymańnie DNŽ užo ŭ samoj Litvie. U Polščy z hetym praściej», — adznačaje surazmoviec.
Pry hetym śpiecyjalist adznačaje, što vypadki, kali rełakavanyja ajcišniki viartajucca nazad u Biełaruś, — nie redkaść.
«Byvaje, hublajuć kantrakt, tut nichto trymać nie budzie. U Polščy siarod džunaŭ (małodšych śpiecyjalistaŭ. — «NN») jość i takija prykłady, kali paśla zvalnieńnia ź IT čałaviek idzie pracavać na zavod, pryčym nie pa svajoj śpiecyjalnaści», — kaža surazmoviec.
«Z taho, što vidać pa adkrytych vakansijach, zarpłaty zusim sumnyja»
Inšy ajcišnik, biełarus, jaki pracuje ŭ Polščy, źviazvaje skaračeńni ŭ halinie nie tolki z vajnoj i represijami, ale i z hłabalnymi tendencyjami. «U Kanadzie skaracili maju byłuju siabroŭku, EPAM u Polščy skaračaje ludziej. Zdajecca, što ciapier aŭtsors u pryncypie padaje hłabalna», — kaža surazmoviec.
Pry hetym kankretna ŭ kampanii, dzie jon pracuje, usio narmalna.
«Naš pradukt — heta płatforma dla łatarej i kazino, dla nas luby kryzis — załaty čas», — kaža jon.
Što tyčycca zarobkaŭ, to, pavodle jaho słoŭ, u biełaruskim IT jany i raniej byli nie asabliva vysokija ŭ paraŭnańni ź inšymi krainami.
«Z taho, što vidać pa adkrytych ciapier vakansijach, to zarpłaty tam prapanujuć zusim sumnyja», — kaža śpiecyjalist.
Havoračy pra skaračeńnie kolkaści zaniatych u IT, surazmoviec adznačaje, što jaho kampanija nie nabiraje novych supracoŭnikaŭ nie tolki ŭ Biełarusi, ale i va Ukrainie. Biełaruś ličycca taksičnaj jurysdykcyjaj, a va Ukrainie jość ryzyka, źviazanaja z vajennymi dziejańniami.
Śpiecyjalist adznačaje, što džunam i raniej było nie prosta ŭładkavacca, a ciapier — pahatoŭ. Bo brać na pracu džuna — značyć inviestavać u jaho navučańnie, tamu, na jaho dumku, na rynku, jaki padaje, rabić takoje było b dziŭnym rašeńniem dla najmalnikaŭ.
Pry hetym, pavodle słoŭ surazmoŭca, achvotnych pierajści ŭ IT usio adno šmat, a vyjezd śpiecyjalistaŭ z krainy praciahvajecca.
Patreba ŭ novych śpiecyjalistach amal nulavaja
HR-śpiecyjalist adnoj ź biełaruskich IT-kampanij kaža, što załatyja časy biełaruskaj ajciški ŭžo minuli.
«Biełaruś, na žal, pastupova hublaje svaje pazicyi ŭ IT. Niekatoryja zachodnija zakazčyki pierastali z nami supracoŭničać, bo naša kraina stała dla ich taksičnaj. Plus nakładajucca prablemy ŭ bankaŭskim siektary, jakija ŭskładniajuć raźliki. Praz heta zahružanaść krychu spała pa miery taho, jak my zakryli staryja kantrakty», — kaža śpiecyjalist.
Što tyčycca zarobkaŭ, to, pa słovach surazmoŭca, u ich kampanii niejkich prykmietnych prasiadańniaŭ niama. A rełakiejt zhubiŭ svaju papularnaść, choć całkam nie spyniŭsia.
«Niekatoryja ajcišniki i navat cełyja kampanii praciahvajuć rełakacyju, ale toj masavaści, što była letaś, i blizka niama. Ëść i tyja, chto viartajecca nazad. I heta nie adzinkavyja vypadki, choć vyjazdžaje ŭsio adno bolš».
Surazmoviec kaža, što ludzi viartajucca z samych roznych pryčyn. Niekamu prosta nie vielmi padabajecca žyć u Jeŭropie, u kahości prablemy sa zdaroŭjem, inšym treba dahladać baćkoŭ i h.d.
«Nie sakret, što niekatoryja rełakanty adčuvajuć paharšeńnie ŭzroŭniu žyćcia praz toje, što tut u ich jość ułasnaje žytło, a ŭ Varšavie ci Vilni arenda moža lohka paciahnuć na 600—1000 jeŭra.
Tamu častka praź niejki čas viartajecca i z ekanamičnych pryčyn. U Biełarusi ajcišnik — heta vielmi zabiaśpiečany čałaviek na ahulnym fonie, a tam takoj roźnicy niama».
NR-mieniedžar kaža, što praz usie niehatyŭnyja źmieny, jakija adbyvajucca na rynku, zajści ŭ IT navičkam stała značna składaniej.
«Ciapier kampanii mała zacikaŭlenyja ŭ džunach. Siońnia chapaje midłaŭ (śpiecyjalistaŭ siaredniaha ŭzroŭniu. — «NN») i sieńjoraŭ, jakija znachodziacca ŭ pošukach pracy, bo ich kampanija rełakavałasia, a čałaviek źjazdžać nie choča ci, naadvarot, choča viarnucca.
Daśviedčany śpiecyjalist pracu znojdzie, časam heta moža być łeveł daŭn pa apłacie, ale ŭsio adno heta buduć dobryja hrošy», — kaža śpiecyjalist.
Pry hetym surazmoviec nie admaŭlaje, što kali ŭ čałavieka jość talent i žadańnie, to jon zmoža znajści siabie ŭ IT i ciapier. Prosta šlach staŭ bolš składanym.
«Džunam treba być hatovymi da taho, što treba budzie pracavać niejki čas za 300—400 dalaraŭ za miesiac, a kali ŭžo pašancuje, to zarobak budzie raści, ale ŭžo nie tak, jak heta było hady try tamu.
Ludziej, jakija skončyli niejkija kursy ci VNU, stanovicca ŭsio bolš, a pracoŭnych miescaŭ, naadvarot, mienš. Tamu całkam łahična, što prabicca budzie niaprosta, a zarobki mohuć być bolš ścipłyja».
Jakija zarobki prapanujuć pa vakansijach?
Adna z samych vysokich ukazanych zarpłat u raździele vakansij na dev.by — 5000—7000 dalaraŭ. Stolki hatovy płacić śpiecyjalistu ŭzroŭniu sieńjor z dośviedam pracy ad piaci hadoŭ i anhlijskaj movaj uzroŭniu V2.
Siarod prapanoŭ dla midłaŭ možna znajści vakansiju z zarpłataj $2200—2400. Stolki hatovy płacić supracoŭniku, u jakoha jość dośvied pracy ŭ IT ad troch hadoŭ, dva ź jakich musić być pa pracy z Yii2. Anhlijskuju, miarkujučy pa apisańni, dastatkova viedać na ŭzroŭni pačatkoŭca.
Dla džunijaraŭ prapanovy taksama sustrakajucca, ale abiacanyja zarobki sapraŭdy nievysokija — ad 300 dalaraŭ za miesiac.
U adnoj z vakansij ajcišniku-pačatkoŭcu z dośviedam pracy ad šaści miesiacaŭ abiacajuć zarpłatu ŭ pamiery ad $40 da 1500 dalaraŭ. Aproč nievialikaha dośviedu pracy ŭ IT, ad jaho patrabujecca siaredni ŭzrovień vałodańnia anhlijskaj movaj.
Čytajcie taksama:
Minčanka apłaciła adny zaniatki ŭ IT-škole. A praz hod u šoku: jana vinavataja canu cełaha kursa
Kaho jašče ŭziali ŭ PVT i kudy idzie industryja na prykładzie naboru-2023
93% zajavak na vizy Poland.Business Harbour — ad biełarusa
Kamientary