Usie z SADu

Nastupiła para hoda, kali ad ranicy treba palić śviatło ŭ chacie. Z paŭdnia — ciamnieje. Nastroju nijakaha niama. Psichołahi zavuć heta siezonnym emacyjnym razładam (SAD). Jak jaho pieramahać?

Pavodle statystyki, da hetaj chvaroby schilnyja 6% amierykancaŭ, 8% kanadcaŭ, 10% brytancaŭ i 20% žycharoŭ skandynaŭskich krain, piša Wall Street Journal. Čym dalej ad ekvatara, tym bolš ludziej pakutujuć na SAD.

Biełaruś nie vyklučeńnie — pahladzicie na tvary pasažyraŭ u mietro ranicaj. Ludzi ŭžo stomlenyja, a dzień i pačacca nie paśpieŭ. Simptomy: depresija, mlavaść, razdražnialnaść. Kali ŭ vas rezka padvysiŭsia apietyt i vy prahniecie vuhlavodnych praduktaŭ, heta taksama adna z prykmietaŭ SAD.

Vyklikaje SAD, najchutčej, pamianšeńnie śvietłavoha času sutak uvosień i ŭzimku. Skaračeńnie dnia parušaje bijałahičnyja hadziny, jakija adkazvajuć za adčuvańnie času. Abo ciemra rujnuje pracesy ŭ mozhu, jakija adkazvajuć za nastroj. A mienšaja kolkaść soniečnych promniaŭ abvastraje niedachop vitamina D.

Ale hetyja teoryi nie tłumačać, čamu pik simptomaŭ nazirajecca ŭ studzieni i lutym, kali dzień užo raście. Ci čamu SAD bolš mocna prajaŭlajecca va ŭzroście ad 18 da 30 hadoŭ, ci čamu žančyny pakutujuć ad jaho ŭtraja čaściej za mužčynaŭ. Pry hetym, da prykładu, siarod nasielnictva Isłandyi hetaha zachvorvańnia amal niama.

Samaje papularnaje lačeńnie — śviatłoterapija.

Treba pasiadzieć pierad jarkaj lampaj 15—20 chvilin u dzień, rajać navukoŭcy z Kałumbijskaha ŭniviersiteta (ZŠA). Heta dapamahaje pazbavicca 80% simptomaŭ. Vyniki majuć być praz try dni, choć lačeńnie varta praciahvać minimum try tydni.

Antydepresanty. Kali śviatło nie dapamahaje, možna pasprabavać pihułki. Ale ŭsio ž śviatłolačeńnie niasie ŭ sabie mienš pabočnych efiektaŭ.

Vitamin D. Jon vypracoŭvajecca arhanizmam padčas uździejańnia na skuru soniečnych pramianioŭ, uzimku jaho kolkaść rezka pamianšajecca. Zahar u salaryi dapamahaje arhanizmu vypracoŭvać vitamin D i padniać nastroj za košt stymulacyi endarfinaŭ. Adnak taki zahar niasie surjoznuju ryzyku — raka skury, paškodžańniaŭ siatčatki vačej, rańniaha stareńnia.

Praktykavańni na śviežym pavietry. Dla tych, u kaho niama času biehać uranku, možna zamianić pajezdku na pracu špacyram da ofisa pieški. Jašče adzin varyjant — dyjeta z admovaj ad spažyvańnia vuhlavodnych praduktaŭ. Bolš harodniny i lohkaja ježa dapamohuć naładzić vykidy insulinu, što taksama palapšaje nastroj.

Kali hetyja varyjanty dla vas zanadta prostyja, zaŭsiody možna pasprabavać technałahičnyja navinki.

Simulatary śvitanku. Śvietłavy budzilnik stvaraje pavolnaje śvitańnie ŭ vašym pakoi. Pastupova śviatło stanovicca jarčejšym i padrychtoŭvaje arhanizm da abudžeńnia. Paśla takoha budzilnika ŭstavać praściej i pryjemniej.

Ijanizatary. Paśla navalnicy pavietra zaradžanaje malekułami kisłarodu z dadatkovymi elektronami ci admoŭnymi ionami, jakija stanoŭča ŭpłyvajuć na nastroj. Na rynku jość niekalki madelej hienierataraŭ ionaŭ. Niekatoryja vyhladajuć jak branzalety, ich možna nasić na ruce. Inšyja — pastavić ŭ pakojčyku i jany pieryjadyčna buduć vykidać u pavietra iony, jakija palepšać atmaśfieru, naprykład, na pracy.

• 0
• 0
• 0
• 0
• 0
• 0
• 0
• 0