25 čałaviek padali ŭ sud na kursy ź instahramščycaj. Što z hetaha atrymałasia
Praktyčna ceły kurs patencyjnych tarhietołahaŭ niadaŭna pravieryŭ u sudzie, što budzie, kali navučańnie ŭ papularnaj błohierki vas nie zadavoliła. Historyju raspavioŭ Onliner.
Volha (imia źmieniena na prośbu hieraini) była siarod tych, chto kupiŭ kursy pa tarhiecie, jakija ŭ vyniku pryviali jaje ŭ sud. Dziaŭčyna kaža, što zaŭvažyła ŭ viadomych błohieraŭ tarhietołaha, jakaja pavinna była ŭdzielničać u navučańni. I taksama vyrašyła zapisacca.
Taja samaja tarhietołah była ź dziasiatkami tysiač padpisčykaŭ u Instagram i, jak jana sama pisała, navučyła bolš za 150 čałaviek.
«Ja vybrała hetyja kursy nie tamu, što chtości rekamiendavaŭ hetaha śpiecyjalista jak tarhietołaha, a tamu, što jana časta milhała ŭ błohieraŭ, — kaža Volha. — Jany raskazvali jaje šlach, što takaja dziaŭčynka z hłybinki prabiłasia, i heta padkupiła. Pra jaje prafiesijanalizm ujaŭleńnia nie było. Bačyła rekamiendacyi błohieraŭ, zdavałasia, što jany nie buduć drennaha raić, tamu što taksama pavažajuć svaju aŭdytoryju».
Cana zaležała ad času pakupki i ŭmoŭ (niechta kupiŭ mientarstva) — ad 1390 da 2390 rubloŭ. Pieršyja zaniatki byli 5 studzienia 2023 hoda.
Prykładna praź miesiac Volha pryjšła da vysnovy, što prahrama nie adpaviadaje tamu, što abiacali. Dziaŭčyna kaža, što spynić navučańnie zachacieli i inšyja ludzi ŭ hrupie, u jakich nazapasilisia pytańni da aktyŭnaha ŭ Instagram tarhietołaha i da IP z tym ža proźviščam — arhanizatara kursaŭ.
«My pisali, što chočam spynić navučańnie. Paśla hetaha nam zakryli dostup da čataŭ, zalili pakinutyja moduli na płatformu GetCourse i skazali, što akazali nam pasłuhi ŭ poŭnym abjomie. Navučańnie było spyniena».
«Ja vielmi apiakłasia na hetym dośviedzie, była ŭ šoku, što takija rečy možna pradavać jak navučańnie».
Situacyi, kali klijenty byli niezadavolenyja kursami, zdaralisia i raniej. Zvyčajna prablema vyrašajecca viartańniem hrošaj praparcyjna abjomu akazanych pasłuh, tamu da suda takija kanflikty dachodziać redka, tłumačyć juryst Natalla Hurnievič, jakaja pracavała ŭ hramadskim abjadnańni «Rehijanalnaje tavarystva abarony spažyŭcoŭ» i zajmałasia hetaj spravaj.
«U hramadskim abjadnańni takoha precedentu nie było, kab 25 čałaviek z 29 pajšli ŭ sud, kab viarnuć hrošy. Tak što heta redki vypadak».
Pytańni ŭ navučencaŭ da kursa ŭźnikli nie adrazu. Pieršyja try moduli byli pra śfieru tarhietu, «prapracoŭku myśleńnia» i padrychtoŭku Instagram da nastrojki rekłamy. Potym pa płanie byŭ modul «Prafiesijny tarhietołah» — voś na im i pačalisia prablemy. «Infarmacyju, jakaja tam była, možna było znajści ŭ internecie. Nam pradali infarmacyju z Google», — ździvilisia słuchačy kursa i paličyli heta płahijatam.
Hetyja padazreńni pravieryŭ potym sud — i pryjšoŭ da vysnovy, što «infarmacyja, jakaja davałasia ŭ moduli 4, jość u adkrytych krynicach u internecie».
Jašče adzin momant — pravierka chatnich zadańniaŭ. Na vykananych rabotach stavili «serca» ci «rakietu», heta i była zvarotnaja suviaź.
Pierad navučańniem byŭ vebinar, na jakim abiacali modul ab pracy z klijentami z Amieryki i Jeŭropy, lekcyi ź jurystam i buchhałtaram, dadatkovyja materyjały, ale klijenty hetaha nie atrymali.
Arfahrafičnyja pamyłki ŭ materyjałach, niecenzurnaja leksika ŭ adnym z modulaŭ, niezrazumiełaja kvalifikacyja kurataraŭ — pytańniaŭ stanaviłasia ŭsio bolš.
U sudzie bok adkazčyka sprabavaŭ dakazać, što zakon «Ab abaronie pravoŭ spažyŭcoŭ» nie raspaŭsiudžvajecca na kanflikt z vučniami i ŭvohule niekatoryja ź ich pazicyjanujuć siabie jak tarhietołahi. Sud nie pahadziŭsia: niekatoryja paznačali hetuju infarmacyju ŭ sacsietkach jak častku chatniaha zadańnia, a niechta ŭžo paśpieŭ prajści inšyja kursy tarhietynhu.
I jašče cikavy momant: adkazčyk nastojvaŭ, što metaj kursaŭ nie było navučańnie prafiesii tarhietołaha. Pry hetym vypusknikam adpraŭlali siertyfikaty z ukazańniem «tarhietołah».
Juryst Natalla Hurnievič rastłumačyła:
«U hetym vypadku pasłuhi nie pazicyjanavalisia jak adukacyjnyja, prosta jak infarmacyjna-kansultacyjnyja, adkazčyk nastojvaŭ na hetym u sudzie. Ale ŭ toj ža čas, kali davaŭ tłumačeńni, niekalki razoŭ kazaŭ pra navučańnie.
Kali spažyviec zaklučaje taki dahavor, treba jaho ŭvažliva vyvučyć i zrazumieć, ci źjaŭlajecca asoba, jakaja akazvaje pasłuhu, indyvidualnym pradprymalnikam abo jurydyčnaj ci fizičnaj asobaj. Kali heta jurydyčnaja asoba ci IP, to ŭ takim vypadku viarnuć srodki možna, ale treba ŭličvać dva momanty:
1) kali možna skasavać dahavor, bo pasłuha akazana niajakasna;
2) dahavor možna skasavać u adnabakovym paradku. U takim vypadku treba ŭličyć faktyčna paniesienyja vydatki adkazčyka, zvyčajna heta aznačaje, što možna viarnuć hrošy za tuju častku kursa, jakuju vy nie prajšli. Da faktyčnych vydatkaŭ adnosiać tyja, jakija ŭžo adkazčyk patraciŭ na prachodžańnie kursa hetym spažyŭcom. Heta moža być apłata płatformy, zarpłata vykładčyka, kali kurs afłajn — arenda pamiaškańnia.
Kali sudom budzie ŭstanoŭlena parušeńnie pravoŭ spažyŭca, to zakon dazvalaje spahnać kampiensacyju maralnaj škody. Pamier kampiensacyi budzie raźličany sudom zychodziačy z maralnych pakut spažyŭca».
Navučency ž prajšli pałovu kursa, tamu pretendavali na viartańnie 50% koštu.
«Kali b nie było mocnaj dokaznaj bazy, składana skazać, jak by ŭsio paviarnułasia. Sprava była ci to na 6, ci to na 7 tamoŭ, my prynosili skrynšoty, pierapiski, zapisy z ekranaŭ, zapisy vebinara i pieršaha ŭstupnaha ŭroka. Tamu zmahli dakazać, što abiacali klijentam adno, a ŭ vyniku jany atrymali inšaje», — tłumačyć juryst.
Pa rašeńni suda navučencam pavinny viarnuć pałovu koštu kursaŭ, niaŭstojku ŭ pamiery 100 rubloŭ i kampiensavać maralnuju škodu ŭ pamiery 100 rubloŭ.
Razam heta 25740 rubloŭ. Takuju ž sumu składzie štraf (90% pojdzie ŭ biudžet, 10% — Rehijanalnamu tavarystvu abarony spažyŭcoŭ). Akramia taho, adkazčyk pavinien zapłacić 6528 rubloŭ hramadskamu abjadnańniu za pradstaŭleńnie intaresaŭ navučencaŭ u sudzie i dziaržpošlinu 4975 rubloŭ.
Što zapisana aficyjnaj pryčynaj śmierci adzinaha syna Jarmošynaj?8
Kamientary