Bahatyja taksama płačuć. U Biełarusi chočuć uvieści padatak na zvyšprybytki i darahija aŭto
Prajekt źmienaŭ u Padatkovy kodeks na 2024 hod praduhledžvaje istotnyja novaŭviadzieńni dla tych, chto maje vialikija zarobki i darahija aŭtamabili.
Moža źjavicca padatak na zvyšprybytak
Zakonaprajekt jašče nie pryniaty. Ale z taho, što ŭ im prapanujuć, — padniać z nastupnaha hoda staŭku padachodnaha padatku z 13 da 25% dla fizičnych asob, čyj sukupny hadavy dachod pieravysić 200 000 rubloŭ. Heta kala 5 tysiač dalaraŭ u miesiac pa biahučym kursie.
Pad sukupnym dachodam razumiejecca suma, atrymanaja nie tolki pa pracoŭnych abo hramadzianska-pravavych damovach, ale i ad krynic u vyhladzie dyvidendaŭ, dachodaŭ ad akazańnia pasłuh i stvareńnia abjektaŭ intelektualnaj ułasnaści.
Nie zabylisia pra IP
Taksama źmieny mohuć čakać i indyvidualnych pradprymalnikaŭ ź vialikimi dachodami. Razmova pra IP, u jakich u biahučym padatkovym pieryjadzie dachody ad ažyćciaŭleńnia pradprymalnickaj dziejnaści z narastajučym vynikam z pačatku kalandarnaha hoda pieravysili 500 000 biełaruskich rubloŭ. Dla ich staŭka padachodnaha padatku budzie składać 30% na praciahu ŭsiaho padatkovaha pieryjadu. Da hetaj sumy staŭka padachodnaha padatku dla IP zastajecca niaźmiennaj — 20%.
Dziesiacirazovy padatak na darahija aŭto
Taksama z nastupnaha hoda moža značna pavialičycca padatkovaja nahruzka na ŭładalnikaŭ niekatorych darahich aŭto.
Padatak u 10-kratnym pamiery płanujuć spahaniać z transpartnych srodkaŭ pavyšanaj kamfortnaści, z času vypusku jakich prajšło nie bolš za try hady.
Śpis takich aŭto musić vyznačyć Saviet Ministraŭ. Tamu pakul jasnaści, jakija transpartnyja srodki mohuć patrapić u hety śpis, niama. Adziny dakładna viadomy paramietr — uzrost da 3 hadoŭ.
Dla prykładu, kali za zvyčajny aŭtamabil vahoj ad 1,75 da 2 ton treba budzie zapłacić 110 rubloŭ, to za «transpartny srodak pavyšanaj kamfortnaści» — 1100 rubloŭ. A kali vaha aŭtamabila pieravysić 3 tony, to padatak składzie 2400 rubloŭ zamiest 240 za zvyčajnaje aŭto.
Pra płany pavysić padatki na pieršuju kvateru, aŭtatranspart i staŭki adzinaha padatku dla IP možna pračytać tut.
Z poŭnym śpisam źmien u Padatkovy kodeks možna aznajomicca pa spasyłcy.
Čytajcie taksama:
Chočuć pavysić padatak na pieršuju kvateru i aŭtamabili, pavialičyć nahruzku na IP. Jakija źmieny rychtujuć u Padatkovy kodeks
Kamientary