U vypusku «Žyćcio-malina» komik Dźmitryj Tankovič raspavioŭ pra toje, jak źmianiŭsia humar pra Łukašenku, pra reziume dla NEXTA, biełaruskaje telebačańnie i byłych kaleh pa KVZ.
Adznačym, što častkova dyjałoh u vypusku adbyvajecca na biełaruskaj (Miełkazioraŭ) i ŭkrainskaj (Tankovič) movach.
Humar pra Łukašenku
Na dumku Tankoviča, paśla pačatku vajny humar pra Łukašenku staŭ bolš žorstkim i «ciapier jość rečy, pra jakija my abaviazany havaryć». «Raniej pra jaho kazali jak pra čałavieka-miema, a ciapier heta pa sutnaści vorah».
Tankovič raspaviadaje, što ciapier va ŭkrainskim «Dyziel-šou», dzie jon zdymajecca, źjavilisia bolš vostryja numary.
Komik zhadvaje, što niekatoryja numary zhadanaha šou stali praročymi: «Zrazumieła, što heta ŭsio ź niejkaj dolaj ironii. Kali my ŭ «Dyziel-šou» zrabili numar pra toje, što Łukašenka zachvareŭ i da jaho pryjechaŭ z Rasii šaman lačyć, a potym adkryłasia, što heta pradstaŭnik ukrainskaj raźviedki, to zdaryłasia tak, što praz dva tydni jon zachvareŭ. My ŭsie pamiatajem jaho vaskovyja zdymki z vajennymi».
Pa słovach humarysta, u jaho skončylisia ŭsie iluzii, što jaho tvorčaść ci tvorčaść «Dyziel-šou» moža niejkim čynam prymusić rasijan dumać pa-inšamu, źmianić punkt pohladu na toje, što adbyvajecca. I tłumačyć, čamu:
«Ja z hetymi dumkami daŭnym-daŭno raźvitaŭsia. Mnie zdajecca, kali prajšoŭ hod i 9 miesiacaŭ paśla pačatku poŭnamaštabnaha ŭvarvańnia, užo luby narmalny čałaviek ź minimalnym krytyčnym myśleńniem zmoh by zrazumieć, što nasamreč adbyvajecca».
Tankovič raspaviadaje, što jaho mierkavańnie hruntujecca na toj kolkaści paviedamleńniaŭ, jakija jon atrymlivaje ŭ sacyjalnych sietkach ad rasijan. Paviedamleńni, pa słovach Tankoviča, «prymityŭnyja». Kštałtu «my pryjedziem, ciabie zabjom. Pry hetym, śćviardžaje komik, jany ŭtrymlivajuć šmat pamyłak. «Dla mianie heta vielmi dziŭna. Ty jedzieš abaraniać ruskuju movu i pry hetym u dziejasłovach zabyvaješ kančatki».
Pra biełaruskaje telebačańnie
Tankovič ličyć, što nieabchodna zrabić archiŭnyja zapisy biełaruskaha telebačańnia, jakoje jość zaraz, dla taho kab potym demanstravać u jakaści prykładu taho, jak ni ŭ jakim razie nie pavinna być i što moža adbyvacca ź ludźmi, jakija heta pastajanna hladziać.
«Heta treba źbierahčy, kab potym nie było padobnych pamyłak».
Da hetych zapisaŭ padčas budučych demanstracyj u škołach i ŭniviersitetach, na dumku komika, možna dadać filmy 30-ch i 40-ch hadoŭ z Hiermanii. Jon ličyć, što pamiž imi budzie šmat padabienstva. Padobny archiŭ možna sabrać i ź pieradač rasijskaha telebačańnia.
Mukavozčyk i biełaruski KVZ
Tamkovič z uśmieškaj zhadvaje prapahandysta Mukavozčyka:
«Mukavozčyk doŭhi čas byŭ, jak jon siabie nazyvaŭ, prezidentam biełaruskaha KVZ. U toj ža čas jon vielmi chacieŭ patrapić na scenu. Jon kajfavaŭ, kali na jaje vychodziŭ. Jon chacieŭ pryciahvać da siabie ŭvahu. Jon šmat piesień sam śpiavaŭ. Darečy, i pra Łukašenku taksama. Jon nie taki i łajalny. Mahčyma, jon vydaliŭ uvieś hety archiŭ. Ale možna pašukać».
Komik pryhadvaje, što z karjeraj na scenie ŭ Mukavozčyka ničoha nie vychodziła: «Narmalnym prezidentam biełaruskaha KVZ jon tak i nie staŭ. Pry im biełaruski KVZ byŭ pa sutnaści źniščany. <…> Nie mahu na sto adsotkaŭ skazać, ale chadzili čutki, što jon byŭ nie vielmi prystojnym čałaviekam adnosna hrošaj biełaruskaha KVZ».
Komik zhadvaje:
«Paśla pieršaha biełaruskaha kancertnaha turu my viarnulisia i na ŭsie hrošy, što nam vypłaciŭ Mukavozčyk, kupili adzin kavun na ŭsich. U toj ža čas sabie jon nabyŭ mašynu».
Na pohlad Tankoviča, Mukavozčyk pa žyćci niaŭdačnik:
«U jaho była mahčymaść stać sapraŭdy krutym čałaviekam, jaki b zmoh zrabić nie prosta KVZ jak KVZ, a niešta bolš karysnaje dla moładzi, bo na toj čas heta realna było mahčymaje. Jon moh by stać, kab sapraŭdy chacieŭ, krutym televizijnym viadučym. Ale ŭ jaho ničoha nie atrymałasia. I toje, što jon robić zaraz, mahčyma, na jaho dumku, heta jaho karjera. Ale ja dumaju, što heta toj vypadak, kali karjera skončycca trochi raniej, čym jon płanuje».
Matyvacyja ŭ Mukavozčyka, pa słovach Tankoviča, «vielmi prostaja — heta hrošy i žadańnie być uładnym čałaviekam, jakoha ŭsie viedajuć, bajacca i pavažajuć».
Što dumaje pra Hałyhina
Tankovič vykazaŭsia pra biełaruskaha komika Vadzima Hałyhina, jaki pracuje ŭ Rasii. Jon ličyć, što ŭ taho jość mahčymaści źjechać z Rasii, praciahvać vystupać i ŭ toj ža čas akreślić svaju pazicyju.
«Napeŭna, jamu tak kamfortniej, praściej, nie treba zamaročvacca».
Tankovič ad niekatorych kaleh pa KVZ atrymlivaŭ paviedamleńni, što Buča — heta pastanoŭka. Jon raskazvaje, jak kapitan kamandy KVZ «Łuna» Anton Marazienka, kali Tankovič raskazaŭ jamu, jak sam sustreŭ vajnu va Ukrainie, adkazaŭ: nie pierajmajsia, zaraz pryjedziem i vas vyratujem.
Humar u NEXTA i «Dyziel-šou»
Tankovič raspaviadaje, što sam nakiravaŭ svajo reziume na NEXTA:
«24 lutaha (2022 hoda) my vyjechali ŭ bok Varšavy. Jechali troje sutak. I zvyčajna ŭvieś čas ja byŭ u telefonie. Prahladaŭ telehram-kanały. Na NEXTA ja byŭ padpisany jašče z 2020 hoda. I tam była abviestka, što šukajuć viadučych, redaktaraŭ, mantažoraŭ. Ja razumieŭ, što zaraz NEXTA budzie rabić vielmi šmat pracy ŭ suviazi z tym, što adbyvajecca va Ukrainie. Ja prosta z telefona napisaŭ i adpraviŭ reziume. I niedzie praz try tydni ja atrymaŭ paviedamleńnie «Davajcie parazmaŭlajem».
Tankovič adznačaje, što jamu vielmi kamfortna pracavać z NEXTA, bo tam nichto nie ŭpłyvaje na toje, što jon robić, i pahadžajecca ź mierkavańniem, što humar, jaki jon pradstaŭlaje ŭ NEXTA (prahrama «A ja siejčas vam pokažu»), adroźnivajecca ad humaru «Dyziel-šou». Pieršy varyjant jamu bolš padychodzić:
«Tut usio zrazumieła. Tamu što ŭsio, što ja rablu na NEXTA, ja rablu samastojna. Heta toje, što ja chaču skazać. U «Dyziel-šou» jość pradziusier, ludzi, jakija prymajuć rašeńni. Tam ja akcior, dapamahaju jak scenaryst. Ja mahu adkryta skazać, što jość numary, jakija mnie vielmi nie padabajucca. Ale dla mianie zaraz, asabliva paśla 24-ha [lutaha 2022 hoda] stała vielmi važnym, što my možam u toj ža čas rabić vielmi nieabchodnyja numary».
Čytajcie jašče:
«Apošni dzień Łukašenki» — novaje šou
Kamientary