Minimum dva rehijony admovilisia ŭznaharodzić syna Kadyrava. U Kramli naohuł nie viedajuć, što z hetymi ŭznaharodami rabić — Viorstka
Jak śćviardžaje «Viorstka», ułady Kabardzina-Bałkaryi i Adyhiei nie pahadzilisia vystupić u abaronu Adama Kadyrava paśla źbićcia Mikity Žuraŭla. Raniej uznaharody synu kiraŭnika Čačni ŭručyli ŭ Tatarstanie i Karačajeva-Čarkiesii. Inicyjatyva z uznaharodžańniem zychodzić nie ad Kramla, a ad čačenskaha kiraŭnictva, piša vydańnie.
Pradstaŭniki administracyi čačenskaha kiraŭnika Ramzana Kadyrava źviartalisia da ŭładaŭ Kabardzina-Bałkaryi i Adyhiei z prośbaj padtrymać jaho syna, Adama Kadyrava.
Kiraŭnikam hetych rehijonaŭ prapanoŭvałasia ŭručyć Kadyravu-małodšamu adnu z nacyjanalnych uznaharod, «čym vyšej — tym lepš», raspaviała vydańniu «Viorstka» krynica, blizkaja da ŭładaŭ Adyhiei.
Jaje słovy paćvierdziła krynica ŭ parłamiencie, blizkaja da ŭładaŭ inšaj kaŭkazskaj respubliki.
Pa słovach pieršaj ź ich, u adyhiejskaha kiraŭnika Murata Kumpiłava «składanaje stanovišča», tamu što jon nie chacieŭ by admaŭlać čačenskim uładam, ale i ŭviazvacca ŭ situacyju z Adamam Kadyravym nie choča.
Paśla skandału sa źbićciom Mikity Žuraŭla demanstracyja stanoŭčaha staŭleńnia da syna kiraŭnika Čačni moža być «nieadnaznačna aceniena» fiederalnym centram, kaža surazmoŭca.
«Nijakaha kankretnaha ŭkazańnia, jak dziejničać u hetych adnosinach, rehijanałam nie dali, — padkreśliŭ jon. — Tamu ŭ rehijonach niervujucca». U suviazi z hetym kiraŭniki drabniejšych, u paraŭnańni z Čačnioj, subjektaŭ na Kaŭkazie «samaŭchilajucca» ad udziełu ŭ historyi z Adamam Kadyravym «jak tolki mohuć», zajaviła krynica.
Pakolki tema «składanaja», to kamientavać jaje pradstaŭniki kaŭkazskich uładaŭ zvyčajna nie chočuć, pahadziŭsia druhi surazmoŭca.
Abodva surazmoŭcy syšlisia ŭ tym, što Kreml u situacyi z Kadyravym-małodšym i Žuraŭlom «maŭčyć, ale i nie pieraškadžaje», i što inicyjatyva ŭznaharodžańnia syna čačenskaha kiraŭnika nie zychodzić ad Maskvy. «Kreml nie choča mieć spravy z hetaj brudnaj, nieadnaznačnaj historyjaj», — raspaviała krynica ŭ parłamiencie i padkreśliła, što fiederalnamu centru «zusim nie padabajecca» aktyŭnaść Ramzana Kadyrava.
Adnak umiešvacca ŭ adnosiny kiraŭnikoŭ rehijonaŭ i ŭ pijar patencyjnaha pierajemnika čačenskaha kiraŭnika tam nie płanujuć, kažuć surazmoŭcy «Viorstki».
Surazmoŭca «Viorstki», blizki da Administracyi prezidenta, kaža, što «inakš jak treš i hamon» uručeńnie ŭznaharod Kadyravu-małodšamu «mała chto ŭsprymaje».
«Kali b nas niechta spytaŭ, ci možna heta rabić, adkazam było b kateharyčnaje «nie», — zajaviŭ jon. — Nielha raspaŭsiudžvać śpiecyfiku adnaho ŭsim viadomaha svajoj śpiecyfičnaściu rehijona na ŭsiu krainu». Pa słovach krynicy, «biada ŭ tym», što raniej pra toje, ci rabić takija akcyi, rehijony pytalisia ŭ Administracyi prezidenta. «Z Adamam hetaha nie adbyłosia», — adznačyŭ surazmoŭca.
Kadyraŭ ciapier vystupaje pieršym z rehijanałaŭ, chto aktyŭna sprabuje na tryvałaść miežy dazvolenaha fiederalnymi ŭładami, i vyśviatlajecca, što jany stali šyrejšymi, čym usie pryvykli dumać, adznačyła krynica.
«Uśled za Ramzanam užo iduć inšyja rehijanalnyja kiraŭniki, — dadaŭ jon. — Mahčyma, my bačym farmavańnie pieršaha rehijanalnaha aljansu. Kali ŭ ich heta atrymajecca, dakładna źjaviacca i inšyja».
25 kastryčnika 15-hadovy syn Ramzana Kadyrava Adam byŭ uznaharodžany ordenami Tatarstana «Dusłyk» i Karačajeva-Čarkiesii — «Za zasłuhi pierad respublikaj». U Čačni syn Ramzana Kadyrava atrymaŭ atrymaŭ zvańnie Hieroja Respubliki.
Adam Kadyraŭ staŭ šyroka viadomy paśla taho, jak źbiŭ u SIZA źniavolenaha Mikitu Žuraŭla, aryštavanaha za spaleńnie Karana. Pa rasijskich zakonach, heta zjaŭlajecca kryminalnym złačynstvam. Pradstaŭnik Kramla Dźmitryj Piaskoŭ admoviŭsia davać kamientary na hety kont.
Ciapier čytajuć
Startavała anłajn-apytańnie biełarusaŭ nakont ekanomiki i žyćcia, anansavanaje premjeram Turčynym1
Kamientary